Statkievič naviedaŭ pasiadžeńnie Sacinterna ŭ Pieciarburzie
Mikoła Statkievič razam z žonkaj Marynaj Adamovič pryniaŭ udzieł u pasiedžańni kamitetu krainaŭ SND, Kaŭkazu i Čornaha mora Sacyjalistyčnaha internacyjanału. Biełaruski palityk byŭ abrany adnym z kiraŭnikoŭ hetaha kamitetu — orhanu suśvietnaha abjadnańnia sacyjał-demakratyčnych partyjaŭ, piša Radyjo Svaboda.
U pasiedžańni, jakoje prachodziła 25—26 traŭnia ŭ Sankt-Pieciarburhu, uziali ŭdzieł delehacyi levacentrysckich palityčnych partyjaŭ z Rasiei, Azerbajdžanu, Armenii, Biełarusi, Vuhorščyny, Kazachstanu i Kirhizstanu. Biełaruś na sustrečy pradstaŭlaŭ Statkievič. Jahonaja «Narodnaja Hramada» — adzinaja biełaruskaja partyja, jakaja ŭvachodzić u Sacyjalistyčny internacyjanał.
U Pieciarburh Statkievič pryjechaŭ z žonkaj Marynaj Adamovič. Pavodle palityka, jana pačała atrymlivać asabistyja zaprašeńni na sustrečy SI paśla adnoj z pramovaŭ Maryny Adamovič, kali sam jon byŭ źniavoleny. Ale jaje prysutnaść mieła i inšuju matyvacyju.
«Mnie ryzykoŭna padarožničać adnamu. Byli vypadki — to na miažy spyniać, to kajdanki, a tut možna było ŭvohule było trapić u niepieradbačanuju sytuacyju. Tamu heta i dla biaśpieki, kab ja nia trapiŭ u sytuacyju biaź śviedkaŭ», — raspavioŭ Mikoła Statkievič.
U hetaj samaj sustrečy prymaŭ udzieł i lider «Spraviadlivaj Rasiei» Siarhiej Mironaŭ. Jahonaja partyja ŭ 2014 hodzie adnahałosna padtrymała aneksiju Krymu. Sam jon uvajšoŭ u sankcyjny śpis EZ, ZŠA, Kanady, Aŭstralii i Švajcaryi ŭ suviazi z vajnoj va Ŭkrainie. U 2015 hodzie jaho ŭklučyli ŭ sankcyjny śpis i sami ŭkraincy, što Mironaŭ ŭspryniaŭ, pavodle jaho samoha, «nie biaz honaru».
Pavodle Mikoły Statkieviča, heta nia pieršy vypadak, kali ŭ adnoj struktury pracujuć partyi krain, jakija znachodziacca ŭ stadyi kanfliktu. Sam jon nia bačyć prablemy ŭ takim tavarystvie.
«Doŭhi čas u kamitecie pracujuć partyi Azerbajdžanu i Armenii, u jakich kanflikt praz Nahorny Karabach. Viedajecie, raniej byli sprečki Izrailskaj partyi pracy i Arhanizacyi vyzvaleńnia Palestyny, ale potym jany navučylisia prychodzić da sumiesnych rašeńniaŭ. U tym i kaštoŭnaść hetaj placoŭki, što kiraŭniki krainaŭ u kanflikcie majuć mahčymaść vykazvacca i, mahčyma, lepš zrazumieć adzin adnoha», — skazaŭ Statkievič u interviju Svabodzie.
Ukraincy, darečy, sioleta nie prymali ŭdziełu ŭ sustrečy kamitetu ŭ Pieciarburhu. Ale ŭkrainskaja tematyka tam usio ž prahučała. Ź inicyjatyvy Mikoły Statkieviča kamitet źviarnuŭsia da Ŭładzimira Pucina i Piatra Parašenki z prośbaj «sadziejničać abmienu ŭkrainskich hramadzian, jakija znachodziacca ŭ rasiejskich turmach, na rasiejskich hramadzian, jakija znachodziacca va ŭkrainskich turmach, pavodle pryncypu «ŭsich na ŭsich»».
«Dla mianie heta blizkaja tema. Ja razumieju, što takoje źniavoleńnie, što takoje pakuty, u tym liku i blizkich ludziej. Daviałosia vieści abmierkavańnie tekstu, ale my pryjšli da parazumieńnia, bo heta humanitarnaja prablema. «Spraviadlivaja Rasieja» taksama padtrymała hety zvarot», — skazaŭ staršynia «Narodnaj Hramady».
U vynikovaj deklaracyi kamitetu ŭdzielniki sustrečy ŭzhadali i Biełaruś. Jany vykazali zakłapočanaść u suviazi ź «niaspynnym ciskam na pradstaŭnikoŭ hramadzianskaj supolnaści ŭ Biełarusi, uklučajučy partyju «Narodnaja Hramada», prafsajuz REP i inšyja demakratyčnyja arhanizacyi».
«Zaklikajem ułady hetaj krainy spynić usiaki pryhniot pavodle palityčnych matyvaŭ i vyzvalić usich palityčnych źniavolenych. My taksama zaklikajem biełaruskija ŭłady zabiaśpiečyć bolšuju prazrystaść jak samoha pracesu hałasavańnia, tak i mechanizmu padliku hałasoŭ», — havorycca ŭ zvarocie.
Deklaracyju padtrymała i partyja «Spraviadlivaja Rasieja». Pavodle Mikoły Statkieviča, partyja Mironava paabiacała ŭklučyć u tekst rezalucyi padčas sustrečy SI ŭ Ženevie ŭzhadku pra pieraśled žurnalistaŭ u Biełarusi i blakavańnie sajtu Chartyja'97.
«Lepš razmaŭlać, čym vajavać. Kab vyratavać zakładnikaŭ, viaduć pieramovy. Čałaviečaje i źviarynaje ŭłaściva roznym ludziam. Kali jość mahčymaść, treba šukać parazumieńnia».
Jak paviedamlajecca na sajcie «Spraviadlivaj Rasiei», «udzielniki pasiedžańnia abmierkavali prasoŭvańnie ahulnaj stratehii ŭmacavańnia sacyjał-demakratyi ŭ rehijonie; raźvićcio demakratyi i jaje instytutaŭ u rehijonie; ŭkład SI jak «ruchu za mir» va ŭrehulavańnie i papiaredžvańnie kanfliktaŭ.
Kali Kanapackaja stała całkam padkantrolnaja Łukašenku?16
Kamientary