Hałoŭnaja tusovačnaja vulica Minska praciahvaje fihuravać u navinach.
Minułyja vychadnyja na Zybickaj šmat kamu zapomniacca nadoŭha: ludzi skardziacca, što amapaŭcy masava zatrymlivali «tusoŭščykaŭ» biez daj pryčyny, paśla čaho na ich składali pratakoły.
Padrabiazna pra svoj niaŭdały adpačynak na Zybickaj «Našaj Nivie» raspavioŭ čytač Andrej Arłoŭski. Jon ź siabrami taksama trapiŭ «pad razdaču» na vychodnych.
«Nas było čaćviora: ja ź dziaŭčynaj i dvoje chłopcaŭ. Adpačyvali na Zybickaj. Tak, my trochi vypili, ale pili tolki ŭ barach. Byli adekvatnyja i pavodzili siabie prystojna. Niedzie paśla 11-j nočy my trochi prajšlisia jašče pa Zybickaj i stali pakuryć — vyrašali, što rabić dalej, moža, pajechać dadomu.
Da nas padyšli amapaŭcy — pašpart nie pytali, ničoha takoha. Prosta skazali chłopcam: «Prajdziomcie».
Dziaŭčynie «prajści» było nie treba, joj zahadali zastacca, — raskazaŭ Andrej. — Nas zaviali ŭ aŭtazak, jaki stajaŭ na prypynku kala stancyi mietro «Niamiha». Nas zavodziać — a tam užo čałaviek vosiem, tolki chłopcy. Nu my navat paviesialilisia trochi, padumali, raźbiarucca i adpuściać».
Ale nie adpuścili. Pa słovach Arłoŭskaha, zatrymanych advieźli ŭ RUUS Centralnaha rajona.
«Tam zaviali ŭ niejki pakoj. U pakoi było niekalki milicyjantaŭ i čałaviek 15 zatrymanych. Milicyjanty składali na ŭsich pratakoły. Jak kanviejer: skłali pratakoł — novych viaduć.
Pisali, što my byli pjanyja i pieraškadžali ludziam adpačyvać. Moj tavaryš pahadziŭsia padpisać. Jaho adpuścili praz hadzinu. Ja spačatku nie chacieŭ ničoha padpisvać, ale paśla pahadziŭsia. Mianie adpuścili pad ranak.
A inšy moj siabar, jaki kateharyčna admoviŭsia padpisvać pratakoł, zastaŭsia da paniadziełka. Jamu adrazu skazali: zdymaj šnurki, pojdzieš u kamieru. I ŭsim paviedamili: chto padpisvać nie budzie, zastajecca da paniadziełka»,
— kaža Andrej.
Toje ž raskazvaje i inšy chłopiec — zabirali narod masava. Amapaŭcy padychodzili, kali bačyli, što čałaviek choć trochi napadpitku.
Razam z surazmoŭcam u aŭtazaku jechała čałaviek dziesiać. Sam chłopiec taksama atrymaŭ pratakoł za znachodžańnie ŭ publičnym miescy ŭ stanie ałkaholnaha apjanieńnia. U jaho kryvi było 0,4 pramile.
Surazmoŭca paćviardžaje: varyjantaŭ było dva. Ci padpisvaješ pratakoł, ci ciabie zatrymlivajuć da paniadziełka. Sam jon vyrašyŭ padpisać.
Ani ŭ pres-słužbie UUS Minharvykankama, ani ŭ RUUS Centralnaha rajona nie zmahli dać apieratyŭny kamientar u suviazi ź situacyjaj.
Vulica Zybickaja daŭno niepakoić staličnyja ŭłady. Nahadajem, u paniadziełak 4 červienia stała viadoma, što na Zybickaj ustalujuć sistemu videanazirańnia i ŭzmocniać patrulavańnie vulicy. Taksama zabaroniać vystupy vuličnych muzykaŭ paśla 23.00.
Ciapier čytajuć
Łukašenka: U 2020 hodzie kala Pałaca Niezaležnaści nie pakistancy biehali20
Kamientary