Хапун на Зыбіцкай: ноччу ў суботу народ масава вывозілі аўтазакамі ў аддзяленне міліцыі

Галоўная тусовачная вуліца Мінска працягвае фігураваць у навінах.

Мінулыя выхадныя на Зыбіцкай шмат каму запомняцца надоўга: людзі скардзяцца, што амапаўцы масава затрымлівалі «тусоўшчыкаў» без дай прычыны, пасля чаго на іх складалі пратаколы.

Павялічыць

Падрабязна пра свой няўдалы адпачынак на Зыбіцкай «Нашай Ніве» распавёў чытач Андрэй Арлоўскі. Ён з сябрамі таксама трапіў «пад раздачу» на выходных.

«Нас было чацвёра: я з дзяўчынай і двое хлопцаў. Адпачывалі на Зыбіцкай. Так, мы трохі выпілі, але пілі толькі ў барах. Былі адэкватныя і паводзілі сябе прыстойна. Недзе пасля 11-й ночы мы трохі прайшліся яшчэ па Зыбіцкай і сталі пакурыць — вырашалі, што рабіць далей, можа, паехаць дадому.

Да нас падышлі амапаўцы — пашпарт не пыталі, нічога такога. Проста сказалі хлопцам: «Прайдзёмце».

Дзяўчыне «прайсці» было не трэба, ёй загадалі застацца, — расказаў Андрэй. — Нас завялі ў аўтазак, які стаяў на прыпынку каля станцыі метро «Няміга». Нас заводзяць — а там ужо чалавек восем, толькі хлопцы. Ну мы нават павесяліліся трохі, падумалі, разбяруцца і адпусцяць».

Але не адпусцілі. Па словах Арлоўскага, затрыманых адвезлі ў РУУС Цэнтральнага раёна.

«Там завялі ў нейкі пакой. У пакоі было некалькі міліцыянтаў і чалавек 15 затрыманых. Міліцыянты складалі на ўсіх пратаколы. Як канвеер: склалі пратакол — новых вядуць.

Пісалі, што мы былі п’яныя і перашкаджалі людзям адпачываць. Мой таварыш пагадзіўся падпісаць. Яго адпусцілі праз гадзіну. Я спачатку не хацеў нічога падпісваць, але пасля пагадзіўся. Мяне адпусцілі пад ранак.

А іншы мой сябар, які катэгарычна адмовіўся падпісваць пратакол, застаўся да панядзелка. Яму адразу сказалі: здымай шнуркі, пойдзеш у камеру. І ўсім паведамілі: хто падпісваць не будзе, застаецца да панядзелка»,

— кажа Андрэй.

Тое ж расказвае і іншы хлопец — забіралі народ масава. Амапаўцы падыходзілі, калі бачылі, што чалавек хоць трохі нападпітку.

Разам з суразмоўцам у аўтазаку ехала чалавек дзесяць. Сам хлопец таксама атрымаў пратакол за знаходжанне ў публічным месцы ў стане алкагольнага ап’янення. У яго крыві было 0,4 праміле.

Суразмоўца пацвярджае: варыянтаў было два. Ці падпісваеш пратакол, ці цябе затрымліваюць да панядзелка. Сам ён вырашыў падпісаць.

Ані ў прэс-службе УУС Мінгарвыканкама, ані ў РУУС Цэнтральнага раёна не змаглі даць аператыўны каментар у сувязі з сітуацыяй.

Вуліца Зыбіцкая даўно непакоіць сталічныя ўлады. Нагадаем, у панядзелак 4 чэрвеня стала вядома, што на Зыбіцкай усталююць сістэму відэаназірання і ўзмоцняць патруляванне вуліцы. Таксама забароняць выступы вулічных музыкаў пасля 23.00.

• 0
• 0
• 0
• 0
• 0
• 0
• 0
• 0