Jak dziadulu Kim Čen Yna prymali ŭ Minsku. Archiŭnyja FOTA i VIDEA

Pakul u Synhapury rychtujecca histaryčnaja sustreča kiraŭnikoŭ Złučanych Štataŭ Ameryki i Paŭnočnaj Karei, Svaboda zhadvaje, jak u Biełaruś u saviecki čas pryjaždžaŭ Kim Ir Sen, dziadula ciapierašniaha kiraŭnika KNDR.

Pavialičyć

Prezydent ZŠA Donald Tramp i kiraŭnik KNDR Kim Čen Yn majuć sustrecca ŭ Synhapury zranku ŭ aŭtorak, Tramp abiacaje «ŭzdymać usie pytańni», pačynajučy z admovy KNDR ad jadziernaj zbroi. Žychary Paŭdniovaj Karei spadziajucca na pośpiech samitu.

34 hady tamu, u traŭni 1984 hodu ŭ Miensku sustrakali Kim Ir Sena — pazaminułaha lidera KNDR, dziadulu Kim Čen Yna. Toj prybyŭ u Saviecki Sajuz na bronieciahniku, bo bajaŭsia latać samalotam.

Pavialičyć

«Kali kartež z hieneralisimusam pajechaŭ pa biełaruskaj stalicy, ciełaachoŭniki tavaryša Kima apuścili škło ŭ limuzinach i vystavili aŭtamaty, — pisaŭ Siarhiej Navumčyk. — Treba mierkavać, supracoŭniki KDB, jakija adkazvali za achovu, až spałatnieli: da hetaha mienčukoŭ ad niepradkazalnych haściej nadziejna achoŭvała kulenieprabivalnaje škło, a ciapier adzin niahiehły ruch moh skončycca trahiedyjaj — ludziej ža vyvieli na praspekt machać paŭnočnakarejskimi ściažkami. Dziakuj Bohu, va ŭradavuju rezydencyju ŭ Zasłaŭi dajechali biez pryhodaŭ.

Pavialičyć

A pra toje, što było ŭ Zasłaŭi, raspaviadaŭ adzin z byłych sakrataroŭ CK KPB. Da pryjezdu Kim Ir Sena karejski bok paprasiŭ pastavić u rezydencyi łožak niestandartna vialikich pamieraŭ — jaho admysłova i zrabili da vizytu hościa. Zaintryhavanyja haspadary ŭstalavali ŭ spalni kamery nazirańnia (a mahčyma — jany tam i byli ŭvieś čas; nie ździŭlusia, kali i ciapier zastalisia).

Toje, što ŭbačyli čekisckija vočy, kali tavaryš Kim adyšoŭ da snu, ździviła ich značna bolej, čym prahlad kanfiskavanych u niaŭstojlivych elementaŭ zabaronienych u SSSR parnafilmaŭ.

Da hieneralisimusa ŭ spalniu pryjšli piaciora ci šaściora dziaŭčat. Nie — ničoha takoha, što supiarečyła b śvietłamu vobrazu vialikaha tearetyka idejaŭ Čučche, nie adbyłosia. Dziaŭčaty prosta lehli na łožak i prycisnulisia da cieła tavaryša Kima. I tavaryš Kim imhnienna zasnuŭ. Napeŭna, tak tavaryšu Kimu było ciaplej».

Pavialičyć

Kim Ir Sen i jahony syn Kim Čen Ir zrabili ad 9 da 11 vizytaŭ u SSSR, ale ichny nastupnik Kim Čen Yn pačaŭ aficyjnyja zamiežnyja vizyty tolki ŭ biahučym hodzie. Jašče da taho, jak Kim Ir Sen staŭ kiraŭnikom Paŭnočnaj Karei — da taho, jak źjaviłasia KNDR — jon žyŭ u SSSR: kali ŭ 1940 hodzie japoncy razhramili antyjaponskich partyzan u Mańčžuryi i Karei, niekatoryja atrady zdoleli ŭciačy ŭ SSSR, a Kim Ir Sen, jaki byŭ kamandziram adnaho ź ich, zastaŭsia ŭ rajonie Ŭsuryjska. Słužyŭ u Čyrvonaj armii, byŭ kamandziram strałkovaha bataljonu z karejskich i kitajskich partyzanaŭ. Paśla Karejskaj vajny, kali kraina była padzielenaja na demakratyčny Poŭdzień i kamunistyčnuju Poŭnač, SSSR padtrymlivaŭ režym Kima, choć toj šukaŭ balansu pamiž zaležnaściu ad SSSR i «čyrvonaha» Kitaju. BBC paraŭnoŭvała stasunki KNDR i SSSR ź ciapierašnimi adnosinami Kramla z Alaksandram Łukašenkam.

• 1
• 0
• 0
• 0
• 0
• 0
• 0
• 0