«U mianie alerhija na pracu». Doktar — pra vielmi dziŭnyja vidy alerhii
Vyrazy, jakija my časam havorym na emocyjach: «U mianie na ciabie alerhija!», «Nie mahu bolš pracavać, u mianie ŭžo alerhija na ŭsio heta!» čaściakom daloka nie vydumka, a surovaja praŭda žyćcia, za jakoj stajać nasmark, kanjuktyvit, krapiŭnica.
My pahutaryli z doktaram-alerhołaham Taćcianaj Litvinavaj miedycynskaha centra «Łade» na pradmiet «i takoje byvaje».
Ujavicie sabie, što ŭ vas alerhija na hrošy.
Vy płačacie ŭ kramie nie tamu, što vam škada ich na niejkuju abnoŭku, a tamu, što ŭ vas sapraŭdnaja alerhija na hrošy.
«Dakładniej skazać, na drukarskuju farbu. Jeść takoje paniaćcie, jak kantaktna-alerhičny dermatyt. U ludziej, jakija pracujuć z hrašyma, ličać ich štodzień, moža ŭźniknuć takaja reakcyja. U majoj praktycy byŭ vypadak, kali davodziłasia vydavać daviedku rabotnicy banka, što jana sapraŭdy nie moža zajmać pasadu, źviazanuju ź pieralikam hrošaj».
Havorka idzie pra tak zvanuju «prafiesijnuju» alerhiju, jakaja ŭźnikaje praz doŭhi kantakt z razdražnialnikam. Zvyčajna, kali čałaviek mianiaje pracu, takaja alerhija adstupaje.
Top-5 prafiesij, pradstaŭniki jakich sutykajucca z najbolš redkimi vidami alerhii:
— bankaŭskija rabotniki,
— vieterynary (tłumačyć tut asabliva ničoha nie treba, zrazumieła, što alerhija na poŭść žyvioł nie takaja i redkaść),
— cyrulniki (vałasy čałavieka taksama mohuć być alerhienam),
— biblijatekary i archivisty (isnuje alerhija na biblijatečny pył),
— miedycynskija rabotniki (u ich moža być alerhija na preparaty, jakich u paliklinikach, asabliva ŭ pracedurnych kabinietach, vialikaje mnostva, na roznyja dezynfiekcyjnyja srodki, a taksama na łateks).
A jak vam alerhija na chłopca ci dziaŭčynu?
«Mianie ad ciabie vanituje», — pačuć takoje pryznańnie ad kachanaha ci kachanaj nie pažadaješ nikomu. Ale sapraŭdy ŭ miedycynskaj litaratury apisanyja vypadki, kali ŭ čałavieka źjaŭlałasia alerhija na inšaha čałavieka.
«Tut treba ŭdakładnić. Nie ŭ pramym sensie na čałavieka, a na niejkija bijałahičnyja vydzialeńni. Alerhija na pacałunki ŭ majoj praktycy nie sustrakałasia, a voś na intymnuju blizkaść, na žal, była».
Taćciana Litvinava robić remarku: «Na ščaście, padobnaje zdarajecca nadzvyčaj redka. I chacia farmakałahičnaja pramysłovaść nie staić na miescy, źjaŭlajucca supraćalerhiennyja preparaty, jakija možna ŭžyvać doŭhi čas, ale heta nie vyjście. Pastajanny dyskamfort rana ci pozna vymusić skazać «byvaj» pryčynie alerhii».
Darečy, zdarajecca jašče i nie takoje — isnuje alerhija na mabilny telefon.
Chacia nasamreč nie zusim tak. 1% ludziej u śviecie pakutujuć na alerhiju na nikiel. «Nikielevy dermatyt» atrymaŭ raspaŭsiudžańnie nie tak daŭno, kali ŭ naša žyćcio ŭvajšli telefony, ajpady dy inšyja hadžety, u składzie jakich utrymlivajecca nikiel.
«Ja b nie bajałasia takoha vidu alerhii. Usio ž jana sustrakajecca nie tak časta, jak alerhija na toj ža łateks. Chirurhičnyja palčatki, soski-pustyški, preziervatyvy, matracy, spartyŭny invientar — usio heta moža spravakavać alerhiju. A voś chvali, radyjochvali ci wi-fi — jany naohuł upłyvajuć na navakolle i pravakujuć bolš častaje ŭźniknieńnie alerhičnych zachvorvańniaŭ, čym heta było raniej».
Chacia kali vam niechta kaža, što nie budzie jeści šakaładku abo apielsin, jakimi vy prapanujecie pačastavacca, bo ŭ čałavieka na heta alerhija, to jon, chutčej za ŭsio, chłusić.
Šakaład, kłubnicy abo cytrusavyja — tyja pradukty, jakija radziej za inšyja vyklikajuć alerhiju. A voś charčovuju niepieranosnaść — tak. Z praduktaŭ čaściej za ŭsio alerhiju mohuć vyklikać zbožžavyja, małako, jajki, arechi.
Pryčym charčovuju alerhiju vylečyć nielha. Daviadziecca źmirycca z tym, što ŭ racyjonie nikoli nie budzie areškaŭ.
A voś alerhiju bytavuju, pyłkovuju i navat epidermalnuju (to bok na poŭść žyvioł), vylečyć možna.
«Hety mietad lačeńnia maje nazvu alerhienśpiecyfičnaj imunaterapii. Kali tłumačyć prostaj movaj, to čałavieku pastupova ŭvodzicca mikradoza alerhienu i pastupova pavialičvajecca da prymalnaj dla čałavieka. Paśla na praciahu 3—5 hadoŭ uvodzicca hetaja prymalnaja doza, jakaja pryvučaje arhanizm pravilna reahavać na alerhien. Paśpiachovaść takoha mietadu lačeńnia kala 80%».
Darečy, kali vy praźmierny «čyścik», budzie hatovyja, što vaš arhanizm budzie bolš schilny da alerhii.
«Čym čyściej my žyviom, tym čaściej uźnikajuć alerhičnyja reakcyi. Praściej kažučy, vašamu arhanizmu, kali ŭsio vakoł sterylna, niama čym zaniacca. Jon nie zmahajecca z bakteryjami ci parazitami, a «vydumlaje» sabie alerhiju. Tamu nie śpiašajciesia izalavać siabie ci svajo dzicia ad pyłu. Nie treba kipiacić usio navokał abo rabić pryborku pa niekalki razoŭ na dzień. Dy i z žyviołami imunnaj sistemie dziciaci kantaktavać tolki na karyść. Hałoŭnaje — miera».
Leta — siezon vielmi raspaŭsiudžanych alerhij
Siezonnuju letniuju alerhiju miedyki padzialajuć na piać vidaŭ: alerhija na kvietkavy pyłok, na kampanienty pavietra, jakija aktyvizujucca pad uździejańniem soniečnych pramianioŭ, na ŭkusy roznych nasiakomych, na hrybok ćvili i klaščoŭ.
Letam, u suviazi z tym, što sonca stanovicca bolš ahresiŭnym, a vilhotnaść pavietra pavialičvajecca, ludziam, schilnym da alerhii, treba być asabliva pilnymi.
U letni pieryjad alerhija moža ŭźniknuć navat na pavietra. Adnym z najvialikšych razdražnialnikaŭ źjaŭlajecca azon, jaki ŭtvarajecca pry apramieńvańni žorstkim ultrafijaletavym vypramieńvańniem letniaha sonca. Mienavita ŭ zacišnaje soniečnaje nadvorje, kali adbyvajecca navała azonavych chmar, i moža ŭźniknuć alerhija, navat z astmatyčnym uskładnieńniem.
Alerhija na ŭkusy nasiakomych taksama ŭźnikaje pieravažna letam. Asabliva budźcie ŭvažlivyja, kali vas ukusić pčała, čmiel abo šeršań.
Letam, kali tempieratura pavietra i vilhotnaść padvyšajucca, dla ŭźniknieńnia hrybka ćvili, razmnažeńnia klaščoŭ i inšych pavukapadobnych stvarajucca samyja spryjalnyja ŭmovy. Adpaviedna, i dla ŭźniknieńnia alerhii na hetyja razdražnialniki.
Parada, jak paźbiehnuć prablem, vielmi prostaja: pakłapaciciesia ab prafiłaktycy. Naprykład, radziej byvajcie na soncy, čaściej prymajcie duš i nie karystajciesia parfumaj z mocnymi pachami. A taksama nie ihnarujcie parady svajho doktara.
Chto taja žančyna, jakuju Marzaluk u efiry BT abazvaŭ «švallu z Hrodna», i što jana piša ŭ čatach? Raskazvajem pra doktarku Stefanovič23
Kamientary