Vajna za niezaležnaść pieramahła Kany
Sioletnija Kany «vajennyja» i sacyjalna-krytyčnyja
«Załatuju halinu» Kanskaha kinafestu atrymała stužka brytanskaha režysera Kiena Łoača «Viecier, što kałychaje jačmień». Film raspaviadaje pra baraćbu Irlandyi za niezaležnaść i ŭtrymlivaje strašnyja sceny raspraŭ akupantaŭ ź irlandzkimi sialanami.
70-hadovy Kien Łoač – aŭtar filmaŭ «Kies» i «Ryf-Raf» – viadomy svaimi levymi pohladami, sa spačuvańniem stavicca da pracoŭnaje klasy j pryhniečanych narodaŭ.
Film pra brytanskuju akupacyju pastaŭleny režyseram u dakumentalisckaj maniery. Ser Łoač padkreśliŭ, što karcina jość «krokam pa ŭśviedamleńni Vialikabrytanijaj svajho kalanijalnaha minułaha».
U antyvajennaj karcinie «Flandryja» laŭreata Hran-Pry francuza Brune Dziumona taksama panuje vajna. Ale heta, chutčej, vajna abstraktnaja.
Vajskovaj temaj i ŭvahaj da dyskryminavaj hrupy paznačany film francuza ałžyrskaha pachodžańnia Rašyda Bušareba «Dni słavy». Jon raspaviadaje pra vajskoŭcaŭ z Panočnaj Afryki, jakija zmahalisia za vyzvaleńnie Francyi ŭ 1944 hodzie. Aktorski skład filmu atrymaŭ uznaharodu za lepšuju mužčynskuju rolu.
Analahičnaje rašeńnie było pryniataje j da stužki «Viartańnie» Pedra Almadovara – tolki tut kalektyŭny pryz dali žančynam na čale z Peniełopaj Kruz.
Film «Viartańnie», dzie dzie pryvid maci viartajecca dapamahčy dačcy, uvohule, ličyŭsia favarytam festu – ale sioleta rej viali vajskova-realistyčnyja karciny. Tym nia mienš, stužka Almadovara taksama ŭziała ŭznaharodu za lepšy scenar.
A voś histaryčnaj karcinie Safii Kopały «Maryja-Antuaneta» zusim nie pašenciła. Jojo nie dali anivodnaha pryza.
Mistyčny składnik taksama pryjšoŭsia nie daspadoby sioletnim Kanam. Karcina Hiljerma del Tora «Labirynt Pana», dzie maleńkaja dziaŭčynka ŭciakaje ad vajny ŭ strašnyja kazki – sastupiła miesca stužkam sacyjalnaha realizmu.
Andrej Rasinski
Ciapier čytajuć
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja1
Kamientary