22—25 listapada ŭ kinateatrach — «Nievierahodny mistar Foks» pa-biełarusku

Jak pahladzieć multfilm Uesa Andersana pa-biełarusku i hetym dapamahčy dzikim žyviołam.

U ramkach prajekta «Biełaruskija ŭikendy» ŭ minski kinaprakat upieršyniu vychodzić multfilm riežysiora Uesa Andersana «Nievierahodny mistar Foks».

Znakamity film u biełaruskaj ahučcy možna budzie ŭbačyć u kinateatrach z 22 da 25 listapada.

A 22 listapada ŭ 19:00 u kinateatry velcom cinema sietki Silver Screen adbudziecca dabračynny premjerny sieans multfilma. Prybytak z pakazu arhanizatary pieraličać Centru dapamohi dzikim žyviołam i ptuškam «Siryn».

Pierakład i ahučka stužki na biełaruskaj movie vykananyja kamandaj «Kinakonh» pry padtrymcy velcom.

U 2010 hodzie multfilm «Nievierahodny mistar Foks» byŭ naminavany na «Oskar» za najlepšy saŭndtrek i najlepšy animacyjny film.

Heta ekranizacyja adnajmiennaj kazki Roalda Dala, viadomaha pa apovieści «Čarli i šakaładnaja fabryka».

Stvoranaja ŭručnuju multyplikacyja ad režysiora Uesa Andersana, aŭtara filmaŭ «Hatel «Hrand Budapiešt», «Ciahnik u Dardžylinh» i «Siamiejka Tenienbaŭm», u charakternaj aŭtarskaj maniery raskazvaje pra šałaputnaha baćku lisinaj siamji. Adkazvajučy na napadki raźjušanych jahonymi vychadkami fiermieraŭ, lis-avanturyst mistar Foks adpraŭlajecca ŭ adčajnyja pryhody, u jakich jamu treba budzie nie tolki viarnuć svajo dobraje imia, ale i ŭratavać svaju siamju.

Paśla premjery pakazy filma «Nievierahodny mistar Foks» na biełaruskaj movie taksama projduć 23—25 listapada ŭ kinateatry «Maskva» i 24—25 listapada ŭ kinateatry velcom cinema. Sačyć za navinami prajekta i raskładam sieansaŭ možna na sajcie kinakong.by.

Pavialičyć

Na žal, nie tolki ŭ kazcy, ale i ŭ žyćci dzikija žyvioły časta traplajuć u pieraplot: u pastki ci pad koły aŭtamabilaŭ, vypadajuć z hniazda ci hublajucca ŭ lesie. Adnavicca paśla traŭmy i viarnucca ŭ zvykłaje asiarodździe im dapamahaje Centr dapamohi dzikim žyviołam i ptuškam «Siryn».

U ramkach prajekta «Biełaruskija ŭikendy», jaki realizuje kampanija «Kinakonh» pry padtrymcy velcom, viadomyja pradstaŭniki teatra i kino Biełarusi ŭdzielničajuć u pierakładzie i ahučcy na biełaruskuju movu raznapłanavych zamiežnych filmaŭ, jakija paśla demanstrujucca ŭ šyrokim prakacie.

Siarod ich — «Chroniki Narnii: leŭ, viadźmarka i harderob», «Maleńki prync», «Forest Hamp», «Štorm», «Žonka nahladčyka zaaparka», «Kniha Iłaja», «Tajamnica Kiełz», «Tajemnaje žyćcio Uołtera Mici», «Rybka Pońjo» «Padymajecca viecier», «Moj siabar žyrafa», a taksama lehiendarnaja stužka «Vohniennyja kalaśnicy», jakaja atrymała čatyry statuetki «Oskar».

• 0
• 0
• 0
• 0
• 0
• 0
• 0
• 0