U čym sakret daŭhalećcia žycharoŭ Akinavy? Zdajecca, navukoŭcy znajšli adkaz
Žychary astravoŭ Akinava va Uschodnie-Kitajskim mory (Japonija) majuć samuju vialikuju praciahłaść žyćcia siarod usich na Ziamli. Bolš za toje, pieravažnaja bolšaść žyvie ź vielmi dobrym zdaroŭjem. Navukoŭcy ličać, što ŭvieś sakret — u vysokavuhlavodnaj dyjecie.
Na kožnyja 100 000 žycharoŭ Akinavy prypadaje 68 doŭhažycharoŭ. Navat pa standartach Japonii heta vielmi šmat — u akinaŭcaŭ na 40% vyšejšyja šancy dažyć da 100-hodździa, čym u inšych japoncaŭ.
Navukoŭcy patracili dziesiacihodździ, sprabujučy raskryć sakrety daŭhalećcia akinaŭcaŭ — jak u ich hienach, tak i ŭ ładzie žyćcia. I adzin z samych cikavych faktaraŭ, jaki niadaŭna pryciahnuŭ uvahu navukoŭcaŭ, — heta niezvyčajna vysokija suadnosiny vuhlavodaŭ da białkoŭ u akinaŭskaj dyjecie. Pry hetym hałoŭnaj krynicaj kałoryj dla žycharoŭ Akinavy źjaŭlajecca batat (sałodkaja bulba).
«Heta poŭnaja supraćlehłaść sučasnym papularnym dyjetam, jakija prapahandujuć dyjetu z vysokaj kolkaściu białku i nizkaj kolkaściu vuhlavodaŭ», — kaža Samanta Sołan-Bjet, jakaja daśleduje pytańni charčavańnia i stareńnia va ŭniviersitecie Sidnieja.
Dyk ci mohuć «suadnosiny Akinavy» — vuhlavody da białku 10:1 — być sakretam doŭhaha i zdarovaha žyćcia?
Sołan-Bjet praviała sieryju daśledavańniaŭ, pryśviečanych upłyvu składu ježy (ale nie kolkaści) na stareńnie žyvioł, i jaje kamanda pastajanna vyjaŭlaje, što dyjeta z vysokaj kolkaściu vuhlavodaŭ i nizkaj kolkaściu białku pavialičvaje praciahłaść žyćcia roznych vidaŭ, a jaje apošniaje daśledavańnie pakazała, što jana pamianšaje niekatoryja prykmiety stareńnia mozhu. Dziŭna, ale jany vyjavili, što aptymalnyja suadnosiny składajuć 10 častak vuhlavodaŭ da adnoj častki białku — toje ž samaje, što i tak zvanyja «suadnosiny Akinavy».
Ciapier čytajuć
Načalnik milicyi Brahina stralaŭ u svaju žonku. Jana cudam vyžyła7
Kamientary