U rasijskaj presie praciahvajecca aktyŭnaje abmierkavańnie biełaruska-rasijskich adnosin i ich budučyni. «Naša Niva» publikuje čarhovy ahlad rasijskich ŚMI na hetuju temu.
Vzhlad: Łukašenka admaŭlajecca pryniać novuju realnaść
Dacent departamienta palitałohii Finansavaha ŭniviersiteta pry Uradzie Rasii Hievorh Mirzajan piša, što rasijska-biełaruskija adnosiny pieražyvajuć čarhovaje abvastreńnie. I prablema zusim nie ŭ tym, što Maskva i Minsk nie damovilisia pa jabłykach. Prablema ŭ roznaści padychodaŭ — Łukašenka nie moža prabić ledziany prahmatyzm Uładzimira Pucina.
«Praśviatleńnie Rasii, vierahodna, źviazana nie tolki z tym, što reekspart dasiahnuŭ vielmi značnych maštabaŭ. Kreml nie zadavalniaje zaraz sama formuła rasijska-biełaruskaj intehracyi, u ramkach jakoj Minsk atrymlivaje značnyja lhoty i prefierencyi (jak na aficyjnym uzroŭni, tak i de-fakta) i navat patrabuje novyja, ale pry hetym admaŭlajecca pahłyblać intehracyjnyja pracesy na instytucyjanalnym uzroŭni», — piša Mirzajan.
Aŭtar piša, što Łukašenka baicca straty suvierenitetu krainy i razmyvańnia svajho asabistaha kantrolu nad joj na karyść Rasii, adnak prymać heta Kreml ciapier admaŭlajecca.
«Viadoma, Baćka admaŭlajecca pryniać novuju realnaść i ličyć, što moža dać Rasii pa rukach starym pravieranym sposabam — praz emacyjny publičny šantaž», — piša Mirzajan.
Zvyčajna Maskva sapraŭdy sastupała pad naporam biełaruskich emocyj, adnak ciapier, u ramkach novaj palityki, padychod źmianiŭsia, piša aŭtar.
«U Maskvie razumiejuć, što šantaž Łukašenki, chutčej za ŭsio, naceleny mienavita na emacyjnaje praciskańnie Rasii. Na realnaje zakryćcio trubapravoda Baćka naŭrad ci pojdzie», — piša Mirzajan.
Aŭtar piša, što kali rasijskija pastaŭki spyniacca, to stanuć Mazyrski i Navapołacki NPZ, paśla čaho Minsk pazbavicca dachodaŭ i značnaj častki valutnaj vyručki. Naŭrad ci biełaruskaja ekanomika moža sabie dazvolić takija straty.
«Chutčej za ŭsio, Alaksandru Ryhoraviču prosta pryjdziecca vyznačycca — ci hatovy jon ruchacca pa šlachu intehracyi z Rasijaj i atrymlivać za heta ekanamičnyja prefierencyi, albo jamu hetyja prefierencyi nie patrebnyja, i jon hatovy pahulać u šmatpalarnaść (prytym što ŭsie inšyja polusy siły vystupajuć za źmienu režymu ŭ Minsku)», — piša aŭtar «Vzhlada».
Kommiersant: Biełaruski «Krymnaš» usio bližej
Palityčny ahladalnik «Kommiersanta» Dźmitryj Dryzie nie vyklučaje, što ŭ kalidorach rasijskaj ułady abmiarkoŭvajecca scenar pahłynańnia Biełarusi pry peŭnych umovach.
Jon piša, što Rasija nie moža prosta tak pahłynuć Biełaruś. Pavinny skłaścisia peŭnyja ŭmovy, naprykład, abrynucca ekanomika.
«Rasijskija piensii i zarpłaty, haz u kožny dom — voś, što možna prapanavać brackamu narodu ŭ vypadku abjadnańnia. Tym bolš ad Alaksandra Łukašenki, miakka kažučy, stamilisia, a raźvićcio pa jeŭrapiejskim demakratyčnym šlachu niemahčyma. Značyć, u Rasiju. Kudy ž jašče?» — piša Dryzie.
Aŭtar upeŭnieny, što z vysokaj dolaj imaviernaści taki scenar aktyŭna prapracoŭvajecca.
Ahladalnik «Kommiersanta» ŭpeŭnieny, što Alaksandr Łukašenka sam zahnaŭ siabie ŭ tupik, pastaviŭšy krainu ŭ zaležnaść ad uschodniaha susieda.
«Jaho ekanamičnaja madel nie pracuje, i nijakija łupcoŭki čynoŭnikaŭ hetaha nie vypraviać. U Rasii haz jość, va Ukrainie, na dumku Zachadu, — demakratyja, a ŭ Biełarusi ničoha. <…> Biełaruski «Krymnaš» usio bližej», — piša Dryzie.
Sobiesiednik: Kazyroŭ u Łukašenki ŭsio mienš
Usie adnosiny Rasii i Biełarusi na praciahu mnohich hadoŭ pabudavany na biaskoncym handli, padčas jakoha baki imknucca atrymać pabolš, a dać pamienš, piša hałoŭny redaktar časopisa «Rasija ŭ hłabalnaj palitycy» Fiodar Łukjanaŭ.
«Łukašenka — čałaviek fantastyčnych palityčnych talentaŭ. Jon hienij nie tolki vyžyvańnia, ale i vybivańnia, vyciskańnia sabie niejkich pieravah», — piša aŭtar.
Adnak mahčymaść vytarhoŭvać sabie ekanamičnyja prefierencyi za prajavy łajalnaści zvužajecca.
«Što budzie? Dumaju, ničoha. Nu, patarhujucca… Vastrynia siońniašnich razboraŭ źviazana mienavita z tym, što mahčymaściaŭ stanovicca ŭsio mienš. Źmianiajecca ahulnaja situacyja, dy i sam Baćka nie maładzieje, a biełaruskaja ekanomika ŭsio bolš załazić u rasijskuju abałonku…» — piša Łukjanaŭ.
Kamientary