Viktar Marcinovič: Nu jak tak, Piatro Alaksiejevič?

Viktar Marcinovič na budzma.by daje 7 paradaŭ ad Biełarusi, jak nie ŭpuścić krainu na vybarach:

1. Što značyć «sacyjałahičnyja apytańni»? Nu što vy jak durnyja! Jakaja sacyjałohija? Pieršaje, što treba zrabić — kab navat abdrystanaja karova ŭ krainie nie viedała realnaha rejtynhu prezidenta! Bo hety rejtynh — samaja strašnaja dziaržaŭnaja tajamnica!

Navat ideałahična viernyja centry nie musiać pravodzić zamieraŭ, ličby im spuskajucca źvierchu. Bo kali budzie navat «dziaržaŭnaje», ale sapraŭdnaje apytańnie, usio roŭna infa trapić da vorahaŭ — i pačniecca!

A voś kali rejtynh — dziaržtajamnica, kali sacyjołahi vycisnutyja z krainy — voś tady možna brachać pra «uravień padździeržki nasielnictvam dziakreta pra tuniajadstva». I nichto ŭ prezidenty navat nie suniecca!

2. Što značyć ekzit-poły? Vy łupanulisia? Jašče za try hadziny da taho jak Parašenka pralacieŭ, uvieś śviet užo viedaje, što Parašenka pralacieŭ! Jaki cisk heta akazvała na tych, chto padličvaŭ hałasy! Jany ž navat naziralnikaŭ ad stałoŭ nie navažacca adahnać! Jany ž narmalnyja ličby pasaromiejucca ŭnieści! Jany musiać stajać i sapraŭdy «ščytać». Ich chiba dla hetaha ŭ kamisii ŭvodzili? Kab «ščytali»? Ja ž vam kazaŭ, vybary — heta praktykavańnie pa čystapisańni, a nie pa aryfmietycy! 

3. Što značyć niama «daterminovaha hałasavańnia»? A jak u skryniach akažucca hałasy za vas, Piatro Alaksiejevič? Sami pa sabie? Ci vy dumajecie, što vašy debaty ź Zialenskim tudy hetyja hałasy zaniasuć? Zrazumiejcie, tavaryš były kaleha: ludzi na našaj terytoryi nienavidziać tych, u kaho niekali pavieryli. U niezaležnaści ad taho, nakolki toje dobryja ci drennyja ludzi. Raz na piać hadoŭ im chočacca ryknuć: «Heć!» Ci prahałasavać za taho, chto «nie vaš apanient, a vaš prysud». To niavažna, što vy ŭznavili dziaržavu, što vy ŭ situacyi chaosu vybudavali armiju, niavažna navat toje, što vy zdoleli heta danieści da publiki padčas dyskusii z hetym maładym sałabonam.

Hałoŭnaje, što nasielnictva pabačyła: vas prynižajuć i taho, chto prynižaje, nie raźbiraje kandracij. Što z vas možna ździekavacca. Što vy — čałaviek. A jak čałaviek moža być prezidentam?

4. Što značyć Zialenskaha ni razu nie aryštoŭvali? Nie, patłumačcie mnie, čym vy dumali? Tak, mnie ciapier zachodnija tavaryšy, maje najlepšyja siabry, kažuć, što niedemakratyčna zakryvać kandydata ŭ turmu. Dyk a administracyjny aryšt vam našto dadzieny? U mianie niekatoryja — Statkievič, naprykład — z administracyjnych aryštaŭ prosta nie vyłaziać. Žyvuć tam, u astrohu. A pra toje, što try dni možna trymać zatrymanych palityčnych za kratami «ŭ čakańni suda», čuli? Nie? Nu dyk jak vy źbiralisia prezidentam być? 

5. Kałamojski, kažacie? Surjozna? Nu dyk čamu ździŭlacca? U vas «baraćba z karupcyjaj» — kali vy ŭvodzicie źniešniaje kiravańnie na svaim «Rašenie», bo soramna być i aliharcham, i prezidentam adnačasova.

A ŭ mianie «baraćba z karupcyjaj» — kali za chabar u $2500 biaruć čałavieka, jaki rasparadžaŭsia dziaržaŭnymi sotniami miljonaŭ. Kali ŭsie aliharchi pa pieršym śvistku robiać toje, što kaža najmalejšy dziadziečka z rajvykankama.

Kali, narešcie, adsiadzieŭšy tracinu terminu, čynoŭnik ci aliharch vychodzić pa asabistaj amnistyi i skiroŭvajecca na novuju kirujučuju pasadu. A toj biźniesoviec, jaki zadumaje finansavać majho apanienta, pazbaŭlajecca ŭsiaho, uklučajučy svabodu, u ličanyja hadziny. Nie tak vy z karupcyjaj barolisia, naiŭny vy naš! 

6. Jak vy dali jamu vyhladać hierojem? U vas ža jość pravaachoŭnyja struktury, Piatro Alaksiejevič? Dyk čym jany zajmajucca? Niaŭžo takoj bzduraj, jak «baraćba sa złačynstvam»? Jak tak adbyłosia, što na vašaha apanienta vam nie prynieśli čornaj papki? Z fotazdymkami, tracinu ź jakich namalavali ŭ trecim adździele? Dzie vaša Frau A.? Dzie vaš «džyp, što sprabavaŭ prabicca praź miažu»? Dzie vašy pacuki ŭ viadry? Dzie «Žalezam pa škle»? Dzie voś heta ŭsio?

7. Vybirać musiać z tych, kaho vybrali vy! Zapomnicie naš biascenny dośvied, Piatro Alaksiejevič! Vybary vas prezidentam — zanadta adkaznaja reč, kab puskać usio na samaciok. Kožny vaš apanient musiŭ być adabrany asabista. Z ulikam vašych pierakanaŭčych pieravah nad im!

Jak vy puścili hetaha ŭ pieršy tur? Chiba ŭ vas nie znajšłosia začuchanych pnioŭ z hramadzianskich i psieŭdapartyjnych arhanizacyj?

Dyk ci viedajecie vy, što takoje palityka, spadar były kaleha? Hańba vam, adnaznačna! Siabie padstavili i narodu niajomka zrabili! To biarycie svaje miljony i čakajem u Biełarusi.

• 0
• 0
• 0
• 0
• 0
• 0
• 0
• 0