Try hady tamu byŭ zabity Pavieł Šaramiet. Kalehi i rodnyja ŭšanavali jaho pamiać FOTA
U treciuju hadavinu zabojstva žurnalista kalehi i rodnyja naviedali mahiłu Paŭła Šaramieta na Paŭnočnych mohiłkach u Minsku.
Maci Paŭła Ludmiła Stanisłavaŭna Šaramiet raspaviała, što sioleta mieła vypadkovuju sustreču s Piatrom Parašenkam, jaki niekali abiacaŭ, što zabojstva Paŭła budzie raskrytaje. Ale hetaha nie adbyłosia, tamu Ludmiła Stanisłavaŭna bolš nie vieryć abiacańniam palitykaŭ.
«Va Ukrainie novy prezident, novyja słužby biaśpieki, novaje kiraŭnictva. Jany pavinny prymać niejkija miery, ale ničoha niama… Kali b niešta adbyvałasia, my b viedali. Źviartacca da ich ja bolš nie chaču.
Vialiki dziakuj vam, što pamiatajecie Paŭła, prychodzicie siudy. Nizki pakłon vam za heta. Ale ja jašče chaču skazać, kab vy bierahli siabie, byli aściarožnyja, — źviarnułasia mama Paŭła da prysutnych. — Pobač staić mama Vieraniki Čarkasavaj. Hetaja była słaŭnaja dziaŭčynka, jana pisała vydatnyja artykuły…(Žurnalistka Vieranika Čarkasava była zabitaja 20 kastryčnika 2004 hoda ŭ asabistaj kvatery. Śledstva pa hetaj kryminalnaj spravie prypyniena «ŭ suviazi ź nievyśviatleńniem asoby, jakaja padlahaje pryciahnieńniu ŭ jakaści abvinavačanaha». — Red.)
Kali heta zdaryłasia z Paŭłam, mama Vieraniki skazała mnie: «Ludmiła Stanisłavaŭna, trymajciesia». Ja adkazała: «Nu, vy ž trymajeciesia». Tak my i trymajemsia».
— Ludmiła Stanisłavaŭna raspaviała siońnia prykruju historyju pra toje, jak biełaruskija kiroŭcy admaŭlalisia pieradać fotazdymki Paŭła ŭ Kijeŭ. Jaho pomniać, a niechta i praz try hady paśla zabojstva baicca — baicca jaho, jaho spraŭ. Mnie asabista ciažka zrazumieć takuju pazicyju, ale heta pakazvaje, što i tady, i ciapier asoba Paŭła maje svaju rolu, — skazaŭ staršynia HA «BAŽ» Andrej Bastuniec.
«Dziakuj usim, chto sabraŭsia tut. Pavieł — čałaviek, na jakoha my hladzim, jaki jość dla nas nastaŭnikam, prykładam śmiełaha žurnalista. Žurnalisty nie mohuć abaraniać siabie zbrojaj, naša zbroja — słova. My možam zadavać pytańni, šukać na ich adkazy, chto b ni byŭ pry ŭładzie tut ci va Ukrainie», — skazaŭ namieśnik staršyni HA «BAŽ» Barys Harecki.
«Pavieł byŭ asablivym čiełoviekom. Sychodziać vieličyni, asoby vialikaha maštabu — Pavieł Šaramiet, Aleś Lipaj u minułym hodzie. Ja ź vielizarnaj ciepłynioj uspaminaju Paŭła, u im sumiaścilisia vieličyni žurnalista i čałavieka. My budziem pamiatać jaho, heta nie prosta naš abaviazak, a narmalnyja pačućci čałavieka», — skazaŭ žurnalist Dźmitryj Navažyłaŭ, jon šmat hadoŭ viedaŭ Šaramieta.
Z Maskvy pryjechała i žonka Paŭła Šaramieta Natalla. U Paŭła zastalisia dvoje dziaciej — Mikałaj i Lizavieta.
***
Pavieł Šaramiet zahinuŭ 20 lipienia 2016 hoda, padarvaŭšysia ŭ aŭtamabili ŭ centry Kijeva, dzie jon žyŭ i pracavaŭ apošnija piać hadoŭ. Akaličnaści jaho śmierci da hetaha času nie rasśledavanyja.
20 lipienia 2016 hoda ŭ mašynie, na jakoj jechaŭ viadomy žurnalist, spracavała vybuchovaje prystasavańnie. Vybuch prahrymieŭ u 7.45 na skryžavańni vulic Bahdana Chmialnickaha i Ivana Franka ŭ Kijevie. Mahutnaść uzryŭčatki, pavodle acenki pravaachoŭnikaŭ, skłała 400-600 h u tratyłavym ekvivalencie. Paśla vyśvietliłasia, što heta była madyfikavanaja madel supraćpiachotnaj miny MON-50.
Nacyjanalnaja palicyja Ukrainy raspačała kryminalnuju spravu na padstavie artykuła «Naŭmysnaje zabojstva». Da rasśledavańnia padklučylisia supracoŭniki FBR, pa dapamohu da jakich źviarnulisia ŭkrainskija ŭłady. U jakaści asnoŭnaj viersii zabojstva razhladajecca pomsta za prafiesijnuju dziejnaść. Śledstva taksama nie vyklučaje, što Šaramieta mahli zabić u metach destabilizacyi stanovišča va Ukrainie, z-za asabistych matyvaŭ abo pamyłkova (metaj mahła być hramadzianskaja žonka zahinułaha — uładalnica «Ukrainskoj pravdy» Alena Prytuła, mienavita na jaje aŭtamabili ruchaŭsia Šaramiet u momant trahiedyi).
Pavieł Šaramiet naradziŭsia 28 listapada 1971 hoda ŭ Minsku. Paśla škoły pastupiŭ na histaryčny fakultet BDU, dzie pravučyŭsia try kursy. Skončyŭ fakultet mižnarodnych ekanamičnych adnosinaŭ Biełaruskaha dziaržaŭnaha ekanamičnaha ŭniviersiteta. Da 1992 hoda pracavaŭ u adnym ź biełaruskich bankaŭ. Zatym pryjšoŭ na biełaruskaje telebačańnie. Viadomaść atrymaŭ jak viadučy štotydniovaj analityčnaj prahramy «Praśpiekt».
U 1996 hodzie pracavaŭ hałoŭnym redaktaram «Biełorusskoj diełovoj haziety». U tym ža hodzie byŭ pryznačany zahadčykam biełaruskaha biuro Hramadskaha rasijskaha telebačańnia (ciapier — Pieršy kanał) i ŭłasnym karespandentam kanała pa Biełarusi.
U lipieni 1997 hoda, padčas zdymki repartažu ab situacyi na biełaruska-litoŭskaj miažy, byŭ aryštavany supracoŭnikami siłavych struktur Biełarusi pavodle abvinavačańnia ŭ niezakonnym pierasiačeńni dziaržaŭnaj miažy, u atrymańni hrošaj ad zamiežnych śpiecsłužbaŭ i ŭ niezakonnaj žurnalisckaj dziejnaści. Jaho pryhavaryli da dvuch hadoŭ pazbaŭleńnia voli ŭmoŭna i da adnaho hoda vyprabavalnaha terminu, žurnalist pravioŭ u turmie try miesiacy.
U 1998 hodzie Šaramiet pačaŭ pracavać śpiecyjalnym karespandentam prahram «Naviny» i «Čas» dyrekcyi infarmacyjnych prahram rasijskaha kanała ORT, a ŭ studzieni 1999-ha zaniaŭ pasadu šef-redaktara rasijskaj i zamiežnaj karespandenckaj sietki dyrekcyi infarmacyjnych prahram ORT. Byŭ viadučym štotydniovaj analityčnaj prahramy «Vriemia».
U 2000 hodzie Šaramiet pakinuŭ prahramy navin i praciahvaŭ pracavać na Pieršym kanale jak aŭtar dakumientalnych filmaŭ i śpiecyjalnych prajektaŭ u miežach infarmacyjnych prahram. Kančatkova pakinuŭ telekanał u 2008 hodzie.
Z 2009 hoda byŭ redaktaram adździeła palityki i hramadstva ŭ časopisie «Ohoniok». U 2011 hodzie Šaramiet niadoŭha vioŭ pieradaču «Prysud» na telekanale RIEN TV.
Byŭ suzasnavalnikam papularnaha hramadska-palityčnaha internet-resursu «Biełaruski partyzan» i navukova-papularnaha internet-vydańnia «Histaryčnaja praŭda».
Z 2012 hoda vioŭ błoh u internet-haziecie «Ukrainskaja pravda», u dalejšym staŭ jaje vykanaŭčym dyrektaram.
Ź vieraśnia 2013-ha pa 2014 hod pracavaŭ viadučym prahramy «Prav? Da!» na Hramadskim telebačańni Rasii.
U červieni 2015 hoda zapuściŭ aŭtarski prajekt «Dyjałohi» na ŭkrainskim telekanale 24. Ź vieraśnia 2015 hoda vioŭ ranišnija pieradačy na «Radio Viesti», z pačatku 2016-ha — budzionnuju prahramu «Ranica Paŭła Šaramieta» tam ža.
Suaŭtar knihi «Vypadkovy prezident», pryśviečanaj praŭleńniu Alaksandra Łukašenki.
Kamientary