Biełarus vydaliŭ akaŭnt u VK, ale da jaho ŭsio adno pryjšli praz kamientary. Jak znajšli?

U materyjale paznačanyja vydumanyja imiony. Sapraŭdnyja źviestki ŭdzielnikaŭ raźbiralnictva ŭ apublikavanym dakumiencie schavanyja.

Jak znachodziać karystalnikaŭ «VKontaktie» — realny vypadak

U 2023 hodzie žychara Bresckaj vobłaści Aleha sudzili pa art. 369 KK (Abraza pradstaŭnika ŭłady).

Padstavaj dla raźbiralnictva stała publikacyja ŭ sacsietcy «VKontaktie». U joj raźmiaścili asabistyja źviestki pałkoŭnika pamiežnaj słužby Kanstancina. A taksama infarmacyju «pra nibyta spryjańni taho ŭ pierasiačeńni zamiežnymi hramadzianami dziaržaŭnaj miažy». Kamientary pad hetaj publikacyjaj vajskoviec paličyŭ abraźlivymi.

Adzin z hetych kamientaroŭ pakinuŭ Aleh. Pavodle viersii ekśpiertyzy, u tekście było łajankavaje słova, sam mužčyna tak nie ličyŭ. Kamientar sabraŭ vosiem łajkaŭ.

Imavierna, Aleh ličyŭ svoj akaŭnt «VKontaktie» ananimnym. U im było inšaje imia — Alaksiej, a paźniej hetaja staronka naohuł była vydalenaja. Adnak śledčyja źviarnulisia da administracyi sacyjalnaj sietki.

«Z metaj vyśviatleńnia asoby karystalnika pad imiem Alaksiej skiravany zapyt u RF pra akazańnie pravavoj dapamohi, a mienavita pieradaču źviestak pra IP-adrasy, jakija vykarystoŭvalisia asobami, što raźmiaścili kamientary», — havorycca ŭ dakumiencie.

Miarkujučy z prysudu, siłaviki atrymali davoli padrabiazny adkaz, u jakim byli IP-adras i numar telefona, źviazanyja z akaŭntam.

Dalej znajści aŭtara kamientara śledčym było nieskładana: jany źviarnulisia da apieratara sotavaj suviazi i daviedalisia, što numar telefona zarehistravany mienavita na Aleha. A jašče vyśvietlili, što toj karystaŭsia internetam u dzień, kali byŭ napisany kamientar.

Praviali navat śledčy ekśpierymient, u jakim pravieryli ŭ mužčyny «mahčymaść i navyki karystańnia sacyjalnaj sietkaj «VKontaktie» z vykarystańniem smartfona». Vyjaviłasia, što takaja mahčymaść u jaho była.

U vyniku sud pryznaŭ vinu dakazanaj i asudziŭ Aleha na dva hady pazbaŭleńnia voli, štraf na 3700 rubloŭ i kanfiskacyju smartfona.

Darečy, hety prysud staŭ dla mužčyny druhim. Da hetaha jaho ŭžo sudzili pa tym ža artykule ŭ 2021 hodzie, sud tady pryznačyŭ jamu 2,5 hoda «chatniaj chimii». Paźniej pakarańnie zamianili na pazbaŭleńnie voli, mužčynu adpravili ŭ kałoniju. Pamiž vyzvaleńniem paśla pieršaha terminu i prysudam pa druhim prajšło mienš za try miesiacy.

«VKontaktie» sapraŭdy vydaje źviestki?

Tak. «Lusterka» znajšło jašče jak minimum niekalki prysudaŭ, abvinavačańni ŭ jakich hruntavalisia ŭ tym liku na źviestkach, pieradadzienych administracyjaj placoŭki.

«VKontaktie» — rasijski servis, jaki adkazvaje na zapyty pravaachoŭnych orhanaŭ. Z pryčyny ščylnaha supracoŭnictva śpiecsłužbaŭ Biełarusi i Rasii pytańnie vyśviatleńnia asoby ŭładalnika akaŭnta ŭ nazvanaj sacsietcy pry nieabchodnaści moža być vyrašanaje za niekalki hadzin, — raskazvaŭ «Lusterku» pradstaŭnik arhanizacyi Bypol u 2021 hodzie. — Tamu my nastojliva raim nie karystacca dla takich metaŭ VK i «Adnakłaśnikami».

Navat kali ŭ akaŭncie niama sapraŭdnaha proźvišča i realnaha fota, akaŭnt zarehistravany na čužy numar telefona, a karystalnik zachodzić u VK praz VPN — pry žadańni siłaviki mohuć znajści čałavieka, jaki staić za akaŭntam.

«Zychodziačy z praktyki, možam skazać, što i heta na 100% nie zaścieraže ad deanonu: VK łahuje zanadta vialiki abjom źviestak, analizujučy jakija, całkam realna vyjavić karystalnika. Tak, heta zapatrabuje ad śledčaha (apieratyŭnika) kiemlivaści, času i žadańnia. Ale tym nie mienš niama ničoha niemahčymaha», — ličyŭ pradstaŭnik Bypol.

Jakija źviestki moža vydać «VKontaktie»?

Biez sudovaha rašeńnia ŭ administracyi placoŭki mohuć zapatrabavać infarmacyju pra karystalnika, pišuć pradstaŭniki sacsietki. Heta moža być, naprykład:

• adras asabistaj staronki;
• čas i IP-adras rehistracyi profilu;
• numar mabilnaha telefona;
• adras elektronnaj pošty;
• historyja źmieny imieni karystalnika i prymacavanaha numara mabilnaha telefona;
• čas i IP-adras raźmiaščeńnia nazvanaha ŭ zapycie kantentu;
• historyja i pieralik IP-adrasoŭ dla ŭvachodu na staronku.

U vypadku vydačy źviestak karystalnika jamu samomu pra heta paviedamlać zabaroniena.

Pryčym, miarkujučy z historyi Aleha z Pružanaŭ, navat vydaleńnie akaŭnta nie harantuje taho, što «ličbavyja ślady» ściortyja.

Zhodna z palitykaj pryvatnaści servisu, piersanalnyja źviestki karystalnikaŭ zachoŭvajucca ciaham usiaho pieryjadu karystańnia servisam. Adnak paśla vydaleńnia akaŭnta niekatoryja źviestki mohuć zachoŭvacca peŭny čas «z metami vykanańnia jurydyčnych abaviazańniaŭ ci zabieśpiačeńnia biaśpieki». Dakładnyja terminy zachoŭvańnia źviestak paśla vydaleńnia akaŭnta nie ahučanyja.

Jak siabie zaścierahčy?

• Kali ŭ vas jość akaŭnt «VKontaktie» — pa hetaj spasyłcy vy možacie pahladzieć, jakija kamientary pakidali ŭ minułym. Kali niejkija ź ich ciapier padajucca vam niebiaśpiečnymi, vy možacie ich vydalić. Darečy, pravieryć łajki i padpiski taksama nie budzie lišnim.
• Nie kamientujcie «palityčnyja» pasty ŭ sietcy «VKontaktie». Pamiatajcie: nijaki profil na hetaj placoŭcy nie ananimny.
• Kali ŭ vas bolš niama žadańnia karystacca «VKontaktie» — možna vydalić akaŭnt pa spasyłcy.

• 0
• 0
• 0
• 0
• 0
• 0
• 1
• 0