Kiraŭnik Biełarusi abviaściŭ, što hatovy ŭvieści miratvorcaŭ na Danbas i ŭziać pad kantrol učastak ŭkraina-rasijskaj miažy. Ale pry ŭmovie, što na heta budzie zhoda bakoŭ. Pra heta Alaksandr Łukašenka zajaviŭ 26 vieraśnia na sustrečy z pradstaŭnikami ŭkrainskich ŚMI. Tranślacyju vioŭ telekanał «112 Ukraina», piša Tut.by
— Kali vy chočacie, kab my zakryli miažu 400 kiłamietraŭ pamiž Ukrainaj i Rasijaj, jakaja ciapier nie kantralujecca ŭładami Ukrainy, my zakryjem hetuju miažu. Choć dla mianie heta vialikaja prablema ŭviazvacca ŭ hety kanflikt, ale my hatovyja ŭvieści tudy miratvorcaŭ, pamiežnikaŭ, vojski, jak chočacie, ale my hatovyja zakryć hety ŭčastak miažy, kali budzie zhoda dvuch bakoŭ, — skazaŭ Łukašenka.
Kiraŭnik Biełarusi padkreśliŭ, što Danbas, «a heta 20% VUP krainy», pavinien viarnucca va Ukrainu. Jon adznačyŭ, što «Ukraina pavinna być adzinaj i niepadzielnaj».
— I samaje hałoŭnaje — cełasnaść i adzinstva Ukrainy, voś tak ja b acharaktaryzavaŭ. Ale heta takaja vielizarnaja tema, što treba, pa-pieršaje, nie tolki surjozna padrychtavacca (mnie, pierš za ŭsio, ale i vam), strukturavać adkaz na hetuju prablemu - što siońnia važna, što zaŭtra. Jakaja situacyja tam, jak dziejničać. Ale adkazvajučy na hetaje pytańnie: ja nie pavinien nastolki hłyboka ŭłazić, kab nie začapić tam intaresy Rasii, intaresy Amieryki ci jašče chto tam udzielničaje, a hałoŭnaje, Ukrainy, uładaŭ i ŭkrainskaha naroda, — adznačyŭ Łukašenka.
Kiraŭnik Biełarusi nie ŭ pieršy raz prapanoŭvaje svaju dapamohu ŭ urehulavańni kanfliktu na ŭschodzie Ukrainy. Jašče ŭ 2014 hodzie jon zajaviŭ, što hatovy pasłać biełaruskija vojski ŭ Ukrainu, kab raźvieści vajujučyja baki. Paśla hetaha jon unios prapanovu ab kantroli Biełaruśsiu rasijska-ŭkrainskaj miažy, adnak jaho prapanovy nie znajšli padtrymki, u pryvatnaści, u Piatra Parašenki, jaki ŭ toj čas zajmaŭ pasadu prezidenta Ukrainy.
Taksama jon prapanoŭvaŭ razhledzieć varyjant raźmiaščeńnia sumiesnaj misii AAN i ABSIE ŭ Ukrainie.
«Dali 3600 rubloŭ štrafu». Na biełarusku napisaŭ palityčny danos chłopiec, ź jakim jana chadziła na spatkańni i jakoha złaviła na zdradzie30
Kamientary