Кіраўнік Беларусі абвясціў, што гатовы ўвесці міратворцаў на Данбас і ўзяць пад кантроль участак ўкраіна-расійскай мяжы. Але пры ўмове, што на гэта будзе згода бакоў. Пра гэта Аляксандр Лукашэнка заявіў 26 верасня на сустрэчы з прадстаўнікамі ўкраінскіх СМІ. Трансляцыю вёў тэлеканал «112 Украіна», піша Tut.by
— Калі вы хочаце, каб мы закрылі мяжу 400 кіламетраў паміж Украінай і Расіяй, якая цяпер не кантралюецца ўладамі Украіны, мы закрыем гэтую мяжу. Хоць для мяне гэта вялікая праблема ўвязвацца ў гэты канфлікт, але мы гатовыя ўвесці туды міратворцаў, памежнікаў, войскі, як хочаце, але мы гатовыя закрыць гэты ўчастак мяжы, калі будзе згода двух бакоў, — сказаў Лукашэнка.
Кіраўнік Беларусі падкрэсліў, што Данбас, «а гэта 20% ВУП краіны», павінен вярнуцца ва Украіну. Ён адзначыў, што «Украіна павінна быць адзінай і непадзельнай».
— І самае галоўнае — цэласнасць і адзінства Украіны, вось так я б ахарактарызаваў. Але гэта такая велізарная тэма, што трэба, па-першае, не толькі сур'ёзна падрыхтавацца (мне, перш за ўсё, але і вам), структураваць адказ на гэтую праблему - што сёння важна, што заўтра. Якая сітуацыя там, як дзейнічаць. Але адказваючы на гэтае пытанне: я не павінен настолькі глыбока ўлазіць, каб не зачапіць там інтарэсы Расіі, інтарэсы Амерыкі ці яшчэ хто там удзельнічае, а галоўнае, Украіны, уладаў і ўкраінскага народа, — адзначыў Лукашэнка.
Кіраўнік Беларусі не ў першы раз прапаноўвае сваю дапамогу ў урэгуляванні канфлікту на ўсходзе Украіны. Яшчэ ў 2014 годзе ён заявіў, што гатовы паслаць беларускія войскі ў Украіну, каб развесці ваюючыя бакі. Пасля гэтага ён унёс прапанову аб кантролі Беларуссю расійска-ўкраінскай мяжы, аднак яго прапановы не знайшлі падтрымкі, у прыватнасці, у Пятра Парашэнкі, які ў той час займаў пасаду прэзідэнта Украіны.
Таксама ён прапаноўваў разгледзець варыянт размяшчэння сумеснай місіі ААН і АБСЕ ў Украіне.
Цяпер чытаюць
«Я не прадугледзела толькі аднаго: што менавіта гэты кружочак выкарыстаюць супраць мяне». Споведзь Аліны Харысавай пасля скандалу з КДБ38
Каментары