Połacki sud 29 listapada vynies rašeńnie aryštavać na 15 sutak hramadskaha aktyvista i błohiera Alesia Krutkina za repost ŭ fejsbuku. Sudździa paličyŭ, što pierapost ad 12 listapada źmiaščaŭ «zaklik na niezakonnaje mierapryjemstva na Kastryčnickaj płoščy ŭ Minsku», piša «Viciebskaja viasna».
Napiaredadni, 28 listapada, Aleś Krutkin sam pajšoŭ u Połacki RAUS, kab zabrać svaje mabilnyja telefony, jakija byli kanfiskavanyja pa raniejšych administracyjnych spravach. Ale ŭ milicyi błohiera zatrymali — na padstavie administracyjnaj spravy pavodle art. 23.34 (parušeńnie arhanizacyi masavaha mierapryjemstva). Aktyvist pravioŭ noč u połackim izalatary časovaha ŭtrymańnia, ale ŭ sud jaho z ranicy nie pryvieźli. Miascovyja aktyvisty znajšli jaho ŭ Połackim RAUS, zmahli pieradać jamu ježy.
Alesia abvinavacili ŭ tym, što jon 12 listapada pierapościŭ na svajoj staroncy ŭ fejsbuku paviedamleńnie «z zaklikam na niezakonnuju akcyju». Błohier zrabiŭ pierapost infarmacyi z hrupy «Jeŭrapiejskaja Biełaruś» ab praviadzieńni pieradvybarčaha mitynhu na Kastryčnickaj płoščy ŭ Minsku 15 listapada.
Sudździa začytaŭ dakumient z materyjałaŭ spravy, pavodle jakoha Minharvykankam zabaraniaŭ praviadzieńnie na Kastryčnickaj płoščy pieradvybarčych mierapryjemstvaŭ.
Na sudzie vyśvietliłasia, što administracyjnaja sprava suprać Krutkina była raspačataja jašče ŭ Viciebsku i stała vynikam starannaha vyvučeńnia słužbovaj asobaj z Upraŭleńnia ŭnutranych spraŭ tekstaŭ u sacyjalnych sietkach.
Krutkin svaju vinu nie pryznaŭ. Paviedamiŭ, što nie ličyć hety repost zaklikam na niezakonnaje mierapryjemstva ŭ pieryjad vybarčaj kampanii.
U vyniku sudździa, uličyŭšy, što Krutkin sioleta ŭžo pryciahvaŭsia da administracyjnaj adkaznaści, pastanaviŭ pakarać jaho administracyjnym aryštam na 15 sutak.
Adrazu paśla pasiadžeńnia Krutkin zajaviŭ, što maje namier abskardzić hetaje rašeńnie Połackaha suda, ale pryznaŭsia, što nia viedaje, jak heta zrabić, znachodziačysia ŭ IČU.
Kamientary