Kredyt pradastaŭlajecca terminam na 15 hadoŭ, pa staŭcy LIBOR plus marža ŭ pamiery 3% hadavych.
Rasijski kredyt u pamiery 500 młn. dalaraŭ ZŠA 12 sakavika pastupiŭ u Biełaruś i zaličany na rachunak Ministerstva finansaŭ u Nacyjanalnym banku,paviedamili BiełaPAN va ŭpraŭleńni infarmacyi hałoŭnaha banka krainy.
Mižuradavaje biełaruska‑rasijskaje pahadnieńnie ab pradastaŭleńni Biełarusi dziaržaŭnaha kredytu Rasii ŭ sumie 500 młn. dalaraŭ było padpisana 6 sakavika 2009 hoda. Ad biełaruskaha boku pahadnieńnie padpisaŭ ministr finansaŭ Andrej Charkaviec, ad rasijskaha — namieśnik staršyni ŭrada — ministr finansaŭ Alaksiej Kudryn.
Kredyt pradastaŭlajecca terminam na 15 hadoŭ, pa staŭcy LIBOR plus marža ŭ pamiery 3% hadavych,z adterminoŭkaj pahašeńnia asnoŭnaha doŭhu na praciahu piaci hadoŭ.
Pavodle infarmacyi biełaruskaha finansavaha viedamstva, srodki kredytu buduć nakiravany na dalejšaje raźvićcio handlova‑ekanamičnych suviaziej pamiž Biełaruśsiu i Rasijaj, padtrymańnie ekanamičnaha patencyjału i ŭmacavańnie nacyjanalnaj valuty krainy.
Biełaruś i Rasija ŭ 2008 hodzie zaklučyli pahadnieńnie, jakoje praduhledžvaje vydzialeńnie Biełarusi stabilizacyjnaha kredytu ŭ pamiery 2 młrd. dalaraŭ. Pieršy tranš kredytu RF u pamiery 1 młrd. dalaraŭ na anałahičnych umovach pastupiŭ u Biełaruś 18 listapada minułaha hoda.
Płanavałasia, što druhi tranš u pamiery 1 młrd. dalaraŭ budzie pieraličany Biełarusi da kanca lutaha 2009 hoda paśla padpisańnia prahramy sumiesnych dziejańniaŭ pa raźvićci ekanamičnaha supracoŭnictva. U studzieni premjer‑ministr Uładzimir Pucin abiacaŭ paskoryć vydaču druhoj častki kredytu.
U kancy lutaha stała viadoma, što Minfin Rasii źviarnuŭsia da biełaruskich partnioraŭ z prośbaj raździalić srodki druhoj častki kredytu jašče na dva tranšy — pa 500 młn. dalaraŭ u lutym i sakaviku.
Viadoma taksama, što akramia stabilizacyjnaha kredytu biełaruskija ŭłady zapytali ŭ Rasii kredyt u 100 młrd. rasijskich rubloŭ u abmien na pierachod na raźliki ŭ rublach va ŭzajemnym handli.Rašeńnie pa hetym zapycie pakul nie pryniata.
Na 1 studzienia 2009 hoda zołatavalutnyja reziervy (ZVR) Biełarusi, raźličanyja pa standartach MVF, składali 3 młrd. 61 młn. dalaraŭ. Na praciahu pieršych dvuch miesiacaŭ Biełaruś atrymała z‑za miažy 1,4 młrd. dalaraŭ (u studzieni 788 młn. ad MVF, u lutym 625 młn. ad prodažu 12,5% akcyj «Biełtranshazu»), jakija byli nakiravany na papaŭnieńnie mižnarodnych reziervaŭ.
Zychodziačy z hetaha abjom ZVR Biełarusi pavinien byŭ vyraści prykładna da 4,5 młrd. dalaraŭ. Adnak, jak paviedamlaje Nacbank, na 1 sakavika 2009 hoda reziervy pa standartach MVF skłali tolki 3 młrd. 327 młn. dalaraŭ.
Kamientary