Hańnie Sieviaryniec nie praciahnuli kantrakt u himnazii. Praź vierš pra Kolu
«[Dyrektar] skazaŭ, što jak nastaŭnik ja maju prava na dumki nakont sistemy adukacyi, ale ja nie maju prava jak nastaŭnik krytykavać uładu, što naša zadača — absłuhoŭvać ideałohiju, jakaja jość. I pakul ja nie vykazvałasia na adras pieršaj asoby, to heta razumieli, a ciapier nie razumiejuć», — piša Radyjo Svaboda.
Hanna Sieviaryniec pracuje ŭ Smalavickaj rajonnaj himnazii. Kaža, što dačynieńni z kiraŭnictvam zaŭsiody byli dobryja.
«Jak dyrektar navučalnaj ustanovy ja prymaju rašeńnie, praciahvać ci nie praciahvać kantrakt, — adkazaŭ Radyjo Svaboda dyrektar Smalavickaj rajonnaj himnazii Dzianis Dubanievič na prośbu prakamientavać sytuacyju z Hannaj Sieviaryniec. — Bolš ničoha na hety kont kamientavać nia budu».
Vierš «A ja za vas nie hałasavała nikoli» Hanna Sieviaryniec apublikavała na svajoj staroncy ŭ fejsbuku 5 červienia.
«Nie dumaj pra mianie, stralaj. Dumaj pra Kolu». Rep ad Hanny Sieviaryniec
5-hadovy pracoŭny kantrakt Hanny Sieviaryniec zakančvajecca 17 žniŭnia.
«Ja doŭha dumała, ci rabić hetuju situacyju publičnaj, — tłumačyć Hanna, čamu rašyłasia raskazać pra heta. — Ale paśla ja zrazumieła, što kali ničoha nie skažu i prosta ŭ vieraśni pierajdu na inšuju pracu, to dzieciam ci mała što skažuć — «zvolniłasia, znajšła lepšaje». Tolki hetaja dumka mianie nasamreč prymusiła vykazacca, bo ja razumieju, što nazad darohi niama. Na žal, bo ja b, viadoma, da dziaciej viarnułasia. Ale ja prosta nie chaču, kab dzieci dumali, što ja ich «pramianiała na niešta».
Jana kaža, što paśla taho jak ludzi daviedalisia pra jaje zvalnieńnie, prapanovy pracy pastupajuć. «Ale dla mianie tut hałoŭnaje, kab dzieci razumieli, što ja ich nie kinuła», — tłumačyć Hanna Sieviaryniec.
Kamientary