U Łunincy ad karanavirusa pamior vykładčyk pa kłasie bajana, zasnavalnik i kiraŭnik dziciačaha ansambla «Krosny», unikalny naładčyk instrumientaŭ Siarhiej Rychter. Jamu było 59 hod. Z 25 hadoŭ vykładčyk muzyki chvareŭ na cukrovy dyjabiet. Piša «Miedyja-Paleśsie».
U siamji Siarhieja Rychtera vychoŭvalisia try dački. Usie skončyli muzyčnuju škołu, lubiać muzicyravać, a starejšaja Iryna vykładaje muzyku ŭ Čučavickaj škole.
Pra toje, jakim čynam u jaho apynuŭsia hety virus, žonka Valancina Michajłaŭna i vykazać zdahadku nie moža. Bo zaścierahaŭsia mužčyna ŭsimi mahčymymi sposabami. Uvieś krasavik naohuł znachodziŭsia doma.
— U adzin momant, tady my jechali da majoj mamy na Zaleśsie, adčuŭ siabie błaha… Pakłali ŭ balnicu… Test na karanavirus paćvierdziŭsia. Lačyli ŭsimi mahčymymi i, ja b navat skazała, niemahčymymi sposabami. Ale… Imunnaja sistema z-za chvarob akazałasia zanadta słaboj. Bo jon trymaŭsia šmat hadoŭ na tabletkach.
U miedycynskaj daviedcy pra pryčynu śmierci tak i značycca: «Karanavirusnaja infiekcyja. Covid-19».
Śpiecyjalnaść vykładčyka pa kłasie bajana Siarhiej Uładzimiravič atrymaŭ u Bresckim muzyčnym vučyliščy, kiravaŭ samadziejnym arkiestram narodnych instrumientaŭ. Pracavaŭ bajanistam RDK, akampanijataram kłuba čyhunačnikaŭ, vykładčykam pa kłasie bajana Paleskaj DMŠ, zatym — u Łuninieckaj dziciačaj škole mastactvaŭ.
Kamientary