Fota Nadziei Bužan
Niezakonnyja vuličnyja akcyi dobra arhanizavany, kirujucca praz Telegram-kanały. Pra heta siońnia paviedamiŭ ministr unutranych spraŭ Juryj Karajeŭ, adkazvajučy ŭ parłamiencie na pytańni deputataŭ, piša BiełTA.
Hienadź Davydźka paprasiŭ prakamientavać napadki, jakija viaduć u bok MUS internet-krynicy. «Što pradprymaje Ministerstva ŭnutranych spraŭ pa infarmacyjnym supravadžeńni metazhodnaści, pravamiernaści i nieabchodnaści svaich dziejańniaŭ?» — spytaŭ deputat. Juryj Karajeŭ adznačyŭ u cełym niadrennuju pracu pres-słužby MUS, ale pryznaŭ, što rabić u hetym kirunku treba jašče bolš.
Ministr padkreśliŭ, što «ludzi, jakija chočuć zrabić vuličnuju revalucyju, vielmi dobra arhanizavany». U jakaści prykładu jon pryvioŭ Strym «Radyjo Svaboda» 18 červienia. «Jany zamianili saboj strym Cichanoŭskaha. U biahučym radku, z kamientarami samaarhanizoŭvalisia i arhanizoŭvalisia z kimści: «Ssoŭvajemsia naprava», «Ssoŭvajemsia naleva», «Razryŭ łancužka», — raspavioŭ jon.
Juryj Karajeŭ źviarnuŭ uvahu, što jany nie sychodzili paśla taho, jak było abvieščana, što pikiet zaviaršyŭsia. «Jany ŭžo dziejničajuć całkam śviadoma nie ŭ metach pikieta, a razumiejuć vydatna, što vynajšli i demanstrujuć novuju formu masavaha mierapryjemstva. Tolki heta nie raniejšaja natoŭp, a doŭhi łancužok. Ale sutnaść ad hetaha nie źmianiłasia. Jany kirujucca praz Telegram-kanały i praz strym «Radyjo Svaboda», — rastłumačyŭ kiraŭnik milicejskaha viedamstva.
Takija masavyja mierapryjemstvy niebiaśpiečnyja tym, što pryciahvajuć vialikuju kolkaść inšych ludziej.
«A tyja, jakija datyčnyja, potym pačynajuć dakazvać, što «išli z kramy», — skazaŭ ministr.
Jon pryvioŭ niekalki prykładaŭ, u tym liku z uračom-ankołaham, jaki nibyta apynuŭsia ŭ miescy praviadzieńnia akcyi vypadkova.
Ale videa dakazvaje, što heta nie tak, što mužčyna stajaŭ u łancužku śviadoma. «Ale ciapier modna prykryvacca daktarami Doktar lečyć, a vy jaho, milicyjanty, schapili. Našy ideałahičnyja apanienty vykarystoŭvajuć mienavita takija rečy», — kanstatavaŭ Juryj Karajeŭ.
Prakamientavaŭ jon i dziejańni pravaachoŭnikaŭ u Homieli, dzie byli zatrymanyja hłuchaniamyja.
«Kiraŭniku UUS skazaŭ pajechać i paprasić prabačeńnia pierad tavarystvam hłuchaniamych», — skazaŭ ministr. Jon padkreśliŭ, što čapać hetych ludziej nie treba było, navat kali jany śviadoma stali ŭ łancužok. «My pavinny być vytrymanyja ŭ razy, u dziasiatki razoŭ. Tamu što nas abvinavacić lohka», — dadaŭ ministr. U internecie, pavodle jaho słoŭ, niamała materyjałaŭ, u jakich praca AMAPa pradstaŭlena ŭ skažonym vyhladzie. MUS płanuje pavialičyć kolkaść hrup dakumientavańnia, kab pakazvać kontrarhumienty.
