Syn pieršaha sakratara KPSS Mikity Chruščova pamior ad ahniastrelnaha ranieńnia ŭ hałavu, paviedamili ŭ koranierskaj słužbie štata Rod-Ajlend, piša bbc.com.
Siarhiej Chruščoŭ zahinuŭ 18 červienia ŭ svaim domie ŭ horadzie Krenstan, štat Rod-Ajlend. Palicyju vyklikała jaho žonka Valancina Halenka.
Na miesca vyjechaŭ narad z dvuch palicejskich i chutkaja dapamoha. Pryjechaŭšy, jany vyjavili Chruščova i adrazu zrazumieli, što jon miortvy, paviedamiŭ miascovaj haziecie Providence Journal major palicyi Tod Patałana.
Miesca śmierci Chruščova abśledavali kryminalisty, jakija nie znajšli nijakich padazronych prykmiet, dadaŭ Patałana.
Tym nie mienš sprava pa fakcie hibieli Chruščova była raspačataja. Pryčynaj śmierci było ranieńnie ŭ hałavu, Patałana paćvierdziŭ heta žurnalistam.
Ciapier rasśledavańnie skončana, sprava zakrytaja i nikomu nie vystaŭlena abvinavačvańniaŭ.
Pradstaŭnik koranierskaj słužby Rod-Ajlenda Džozef Uendełkien paćvierdziŭ Bi-bi-si infarmacyju pra pryčynu śmierci, ale taksama ničoha bolš nie raspavioŭ, padkreśliŭšy, što sprava zakrytaja.
Udava Chruščova Valancina Halenka miž tym zajaviła, što jaje muž pamior ad staraści i pierad tym chvareŭ dva hady.
Siarhiej Chruščoŭ — adzin ź piaciarych dziaciej savieckaha lidara Mikity Chruščova. Jon byŭ navukoŭcam, kanstruktaram kaśmičnych sistem.
Ad 1958 da 1991 hoda Siarhiej Chruščoŭ pracavaŭ namieśnikam dyrektara troch savieckich instytutaŭ. U pryvatnaści, jon raspracoŭvaŭ prajekty kryłatych i balistyčnych rakiet.
U ZŠA Chruščoŭ pryjechaŭ jak zaprošany lektar u 1991 hodzie z treciaj žonkaj, Valancinaj Halenka.
Jon tak i nie viarnuŭsia ŭ Rasiju, praciahnuŭšy čytać lekcyi pa historyi chałodnaj vajny ŭ Braŭnaŭskim univiersitecie ŭ horadzie Providens, niepadalok ad svajho doma ŭ Krenstanie.
Kamientary