«Na pracu pryjšoŭ HUBAZiK — u toj ža dzień ja źjechała za miažu». Pačaŭsia cisk na arhanizatarak žanočych akcyj
Dziaŭčaty, jakija zaklikali biełarusak vychodzić na žanočyja akcyi pratestu, raskazvajuć pra cisk na ich z boku siłavikoŭ.
Maryna Mientusova adna ź ich. Apošnija hady jana žyvie ŭ Rasii, ale paśla vybaraŭ pryjechała na radzimu, kab razam ź inšymi žančynami vykazać pratest hvałtu. Nie mahła na heta hladzieć moŭčki. Dziaŭčyna niadaŭna viarnułasia ŭ Maskvu, a ŭ aŭtorak atrymała paviedamleńnie ad «pravaachoŭnych orhanaŭ Respubliki Biełaruś». Nieviadomy pytaŭsia, kali jana znoŭ budzie ŭ Minsku. Maryna ŭ adkaz prosta adžartoŭvałasia.
«Jon admoviŭsia pradstavicca, tamu razmova chutka skončyłasia», — kaža jana. Cikavaść da jaje asoby pravaachoŭnyja orhany prajavili ŭpieršyniu. Dahetul, niahledziačy na miesiac akcyj, zvankoŭ i vizitaŭ milicyi nie było.
Cisk pačaŭsia i na inšych arhanizatarak žanočych łancuhoŭ. Apošnija dni supracoŭniki siłavych orhanaŭ šukali ich na pracy, sprabavali trapić u kvatery.
«Učora na pracu pryjšoŭ HUBAZiK. Pytalisia, dzie ja, kali budu, dzie žyvu. Siabroŭku šukali sa słovami «na jaje kryminalnaja sprava», ale nie fakt, što sprava była. U toj ža dzień ja vyrašyła pakinuć krainu. Pajechała na miažu biez rečaŭ, jak była. Bajałasia, što, kali budu ciahnuć, na nastupny dzień užo nie vypuściać ź biełaruskaj miažy. Mnie dapamoh MZS Litvy, jany vielmi chutka zreahavali», — raskazała adna ź dziaŭčat.
Treba adznačyć, što da žančyn padčas akcyj milicyja zvyčajna nie prymianiała siłu. Adnak u aŭtorak heta miaža była piarojdziena — amapaŭcy i nieviadomyja ŭ formie brutalna zatrymlivali žančyn, šturchali da ściany i ciahnuli za šyju u busik.
Kamientary