Palityk Alaksandr Kazulin padzialiŭsia ŭražańniami ad niadaŭniaj varšaŭskaj sustrečy z Z.Paźniakom i S.Šuškievičam. Razmova adbyłasia napiaredadni vyletu Kazulina na pražski samit «Uschodniaha partniorstva».
Palityk Alaksandr Kazulin padzialiŭsia ŭ hutarcy z karespandentam «NN» uražańniami ad niadaŭniaj varšaŭskaj sustrečy ź lideram KCHP‑BNF Zianonam Paźniakom i staršyniom BSDH Stanisłavam Šuškievičam. Razmova adbyłasia napiaredadni vyletu Kazulina na pražski samit «Uschodniaha partniorstva».
Alaksandr Kazulin: Heta była vielmi važnaja i źmiastoŭnaja sustreča. Kali Paźniak, Šuškievič, Surviłła i Kazulin zrabili sumiesnuju zajavu da Jeŭrasajuzu, to my razumiejem, što i nadalej pavinny ruchacca razam. Na hetaj sustrečy my abmiarkoŭvali vielmi šmat pytańniaŭ. Najpierš havaryli ŭvohule pra toje, ci varta jechać u Prahu. My vyrašyli, kali Łukašenka źbirajecca na samit, to my taksama tam musim być. My pavinny danieści jeŭrapiejskaj supolnaści našy dumki, raskazać ab sapraŭdnaj situacyi ŭnutry krainy. Važna toje, što razam pracujuć ludzi roznych pohladaŭ i znachodziać parazumieńnie. Simvalična, što miž saboj sustrakalisia kandydaty ŭ prezidenty vybaraŭ 1994 i 2006 hadoŭ. I ŭ nas budzie ahulnaja pazicyja, my damovilisia pa ŭsich punktach.
«Naša Niva»: A čamu z Vami niama Milinkieviča?
AK: Hetaje pytańnie lepš zadać samomu Alaksandru Milinkieviču. Skažu tolki što my prapanoŭvali jamu dałučycca da nas, ale zhody nie atrymali.
«NN»: Z Paźniakom u vas byli nie samyja prostyja stasunki. Jak atrymałasia, što ciapier vy apynulisia razam?
AK: Viedajecie, u mianie nikoli nie było z Paźniakom ciažkich stasunkaŭ. Mahčyma, nie było siabroŭstva. Moža, było niejkaje nieparazumieńnie. Adnak kali my sustrakajemsia asabista, kali majem mahčymaść pahladzieć adzin adnamu ŭ vočy i paraicca, to ŭsio stanovicca zrazumiełym i vidavočnym. Ja zaŭsiody byŭ samaha lepšaha mierkavańnia pra Paźniaka. Heta — čałaviek‑historyja, čałaviek‑epocha.
«NN»: I čaho vy budziecie dabivacca ŭ Prazie?
AK: Jość piać umovaŭ, jakija ŭžo nieadnarazova staviŭ Jeŭrasajuz pierad biełaruskimi ŭładami. Ich nichto nie admianiaŭ. Taksama my ličym vielmi važnym, kab byŭ dałučany jašče adzin punkt. Havorka pra abaronu biełaruskaj kultury, adukacyi, a taksama svabody tvorčaści. Kali nie budzie biełaruskaj kultury i adukacyi, to nie budzie ničoha. Ni niezaležnaści, ni demakratyi.
«NN»: Z kim budziecie mieć sustrečy?
AK: Papiarednie zapłanavana, što my sustreniemsia z premjer‑ministram Čechii Tapałaniekam, ministram zamiežnych spravaŭ Švarcenbierham. Napeŭna, ź niekim jašče z palitykaŭ. Budziem znachodzicca ŭ Prazie ad 5 da 7 traŭnia.
Ciapier čytajuć
Čamu YouTube vydaliŭ kanały BiełTA, STB i ANT? Voś što viadoma28
Kamientary