Pasły Polščy i Litvy źjechali ź Biełarusi, pasoł Niamieččyny źjazdžaje siońnia
Pasoł Polščy Artur Michalski i Litvy Andrus Pułokas pakinuli Biełaruś napiaredadni ŭviečary. Pasoł Hiermanii Manfred Chuterer źjazdžaje siońnia — jon adklikany dla kansultacyj u Bierlin. Pra heta Tut.by paviedamili infarmavanyja krynicy.
Vyklik pasłoŭ u svaje stalicy dla kansultacyj źviazany z dypłamatyčnym skandałam, jaki razhareŭsia 2 kastryčnika, kali biełaruski MZS zapatrabavaŭ ad pasolstvaŭ Polščy i Litvy ŭ našaj krainie skaracić kolkaść dypłamataŭ, jakija pracujuć u Biełarusi. Tam taksama paviedamili, što pasły Biełarusi ŭ Polščy i Litvie z 5 kastryčnika adklikajucca ŭ Miensk dla kansultacyj, i prapanavali Varšavie i Vilni pieraniać hety prykład.
Litva i Polšča adrazu zajavili, što nie majuć namieru adklikać svaich pasłoŭ u Biełarusi dla kansultacyj. Ale 5 kastryčnika kiraŭnik MZS Litvy Linas Linkiavičus paviedamiŭ ab adklikańni svajho pasła ŭ Biełarusi dla kansultacyj. Śledam za im takuju zajavu zrabiŭ kiraŭnik MZS Polščy Źbihnieŭ Rau.
Rau ŭ siabie ŭ Tvitary adznačyŭ, što «ŭ kaardynacyi ź Jeŭrapiejskaj słužbaj źniešnich suviaziaŭ i krainami — členami ES pryniata sumiesnaje rašeńnie adklikać dla kansultacyj niekatorych z pasłoŭ, akredytavanych u Biełarusi». Heta značyć, havorka idzie nie tolki pra pasłoŭ Polščy i Litvy, ale i inšych krain ES.
U Pradstaŭnictvie ES u Minsku situacyju pakul nie kamientujuć.
Kamientary