Adnu z klučavych pasadaŭ zaniaŭ patomny vajskoviec, jaki da apošniaha času byŭ načalnikam Hienštaba.
Pasada dziaržsakratara Rady biaśpieki była volnaj z kastryčnika 2020, kali Valeryja Vakulčyka niečakana adpravili pamočnikam Łukašenki pa Bresckaj vobłaści. Na pošuki novaj kandydatury syšło try miesiacy.
Alaksandru Valfoviču 53 hady. Jon usio žyćcio źviazaŭ z armijaj. Paśla škoły pajechaŭ vučycca ŭ Maskoŭskaje vyšejšaje vajskova-kamandnaje vučylišča, jakoje skončyŭ jašče da razvału SSSR u 1988 hodzie. Cikava, što vučylisia jany tam razam z byłym ministram abarony i dziaržsakratarom Rady biaśpieki Andrejem Raŭkovym. Dalej jany taksama pracavali časta razam, ale vyšejšyja pasady niaźmienna zajmaŭ Raŭkoŭ. Paśla Valfovič zamacoŭvaŭ adukacyju ŭ Vajskovych akademijach Biełarusi i Rasii.
U 2005 hodzie staŭ pracavać u Hałoŭnym apieratyŭnym upraŭleńni Hienštaba. Z 2008 — kamandzir 120-j asobnaj hvardziejskaj miechanizavanaj bryhady. Byŭ namieśnikam kamandujučaha Zachodniaha apieratyŭnaha kamandavańnia i kamandujučym Paŭnočna-Zachodniaha apieratyŭnaha kamandavańnia. U 2012 staŭ hienierał-majoram. Apošnija try hady byŭ u Hienštabie: spačatku pieršym namieśnikam, a sa studzienia 2020 — načalnikam, pieršym namieśnikam ministra abarony.
U bytnaść kamandujučaha Paŭnočna-Zachodniaha apieratyŭnaha kamandavańnia Alaksandr Valfovič zapomniŭsia tym, što staŭ inicyjataram taho, kab pryzyŭniki ŭ Barysavie prynieśli prysiahu SSSR.
«Była zadača pakazać padčas cyrymonii pryniaćcia prysiahi pierajemnaść pakaleńniaŭ. Siońnia, jak by na imhnieńnie zazirnuŭšy ŭ lehiendarnaje minułaje, my pakazali, jak prymali prysiahu našy pradziedy i dziady ŭ dalokim 1918-m i 1941 hodzie, jak prymali jaje ŭ časy Savieckaha Sajuza. I ŭśled za imi, vykonvajučy pierajemnaść pakaleńniaŭ abaroncaŭ Ajčyny, prynieśli ŭračystuju klatvu na viernaść našaj Radzimie — Respublicy Biełaruś — i našy vajskoŭcy. Ja dumaju, što heta mierapryjemstva stanie dobraj tradycyjaj», — cytavała słovy Valfoviča «Biełaruskaja vajskovaja hazieta».
«Naša Niva» datelefanavałasia da mamy ciapierašniaha dziaržsakratara Rady biaśpieki Taćciany Jakaŭleŭny, kab jana raskazała pra syna.
«Jon vielmi sumlenny i spraviadlivy, vydatny siemjanin i syn, takich dziaciej, jak jon, bolš niama na śviecie. I jon tak pieražyvaje za bol inšych ludziej, jak nichto. Biaspłatna dapamahaje ŭsim, kamu tolki moža. I nikoli b jaho nie pryznačyli, kali b usiaho hetaha nie viedali», — adrazu chvalić svajho syna mama, pierachodziačy na ślozy.
Alaksandr Valfovič naradziŭsia ŭ Kazani. Sprava ŭ tym, što tam słužyŭ jahony baćka Ryhor Alaksandravič Valfovič, padpałkoŭnik u adstaŭcy, tankist. Syn, darečy, nie staŭ tankistam praz vysoki rost. Ciapier baćku 74 hady, niadaŭna zrabili šuntavańnie na sercy.
Baćka rodam z Bałty Adeskaj vobłaści Ukrainy, ale žyła siamja z małych hadoŭ u Słucku. Dzied — taksama Alaksandr Ryhoravič — byŭ vajskoŭcam. «Jon vajar ad Boha, pamior u 49 hadoŭ, maładym», — kaža pra cieścia niaviestka.
«Sašańka naradziŭsia ŭ Kazani. Sprava ŭ tym, što jahony baćka dzie tolki nie słužyŭ: u Lenkarani (Azierbajdžan), potym — u Hiermanii, potym — u Maskvie, a jašče paźniej u Barysavie. U škołu syn chadziŭ u Barysavie, vydatna skončyŭ, adkul pajechaŭ pastupać u Maskvu. Jon vielmi lubiŭ vajskovuju spravu, biez hetaha nie moh», — raskazvaje Taćciana Jakaŭleŭna.
U siamji jašče jość syn Dźmitryj, jon taksama vajskoviec, pałkoŭnik. Słužyć pry Vajskovym kamisaryjacie Viciebskaj vobłaści, namieśnik vajskovaha kamisara. Nasamreč ža bijahrafija ŭ Dźmitryja našmat bolš cikavaja i roznabakovaja.
Dźmitryj byŭ udzielnikam pieršaj čačenskaj vajny. Tudy małady lejtenant trapiŭ paśla taho, jak jaho zavierbavała Fiederalnaja słužba kontravyviedki Rasii. I ŭdzielničaŭ Valfovič u hetaj vajnie nie ŭ składzie rasijskaj armii, a siarod čačenskaj apazicyi Dudajevu, jakaja, na dumku kontravyviedki, i pavinna była ŭziać uładu ŭ respublicy. Dla hetaha z Maskvy apazicyi dapamahali zbrojaj i ludźmi, siarod jakich i byŭ Valfovič.
Taki płan kramloŭskich stratehaŭ nie spracavaŭ, a Valfovič trapiŭ u pałon, adkul źviartaŭsia da Barysa Jelcyna sa słovami, što čačenski narod sapraŭdy padtrymlivaje Dudajeva. Valfovič byŭ vyzvaleny ŭ śniežni 1994 hoda. Na pres-kanfierencyi ŭ Dumie Dźmitryj raskazaŭ, što pavinien byŭ atrymać ad FSK 6 miljonaŭ rubloŭ za svoj udzieł u čačenskaj apazicyi. Heta vyklikała vialiki skandał. Nie ŭsim pałonnym pašancavała tak, jak Valfoviču.
Baćki Valfoviča pierajechali z Barysava ŭ Minsk u 1985 hodzie. Baćka pracavaŭ da 70 hadoŭ. Zajmaŭ pasadu namieśnikam hiendyrektara pradpryjemstva «BiełEZ», jakoje naležyć kiraŭnictvu spravami prezidenta. «BiełEZ» zajmajecca pytańniami ekspłuatacyi budynkaŭ.
U Alaksandra Valfoviča adzin syn — Maksim. Jon taksama vajskoviec, major. Da niadaŭniaha času Valfovič-małodšy ŭznačalvaŭ miechanizavany bataljon pry 6-j asobnaj hvardziejskaj miechanizavanaj bryhadzie, jakaja raźmiaščajecca ŭ Hrodnie. Admietna, što ŭ hetym bataljonie ciaham apošnich hadoŭ było zafiksavana dva suicydy. Babula Taćciana Jakaŭleŭna kaža, što ciapier unuk pracuje pry Vajskovaj akademii.
Žonka Alaksandra Valfoviča — administratarka ŭ cyrulni.
Bondarava zachacieła dvuchmoŭja, jak u Finlandyi. My taksama za4
Kamientary