Historyja Ksienii Łuckinaj, jakaja 15 hod pracavała na BT, a ciapier apynułasia ŭ SIZA za sprobu stvaryć alternatyŭny kanał
Byłaja karespandentka «Biełaruś 2» Ksienija Łuckina 15 hod addała telebačańniu. Jana zvolniłasia paśla vybaraŭ i źbirałasia stvarać alternatyŭny kanał, kali jaje zatrymali. Žurnalistku abvinavacili va ŭchileńni ad padatkaŭ u asabliva bujnym pamiery (č. 2 art. 243 Kryminalnaha kodeksa). Pakul Ksienija na Vaładarcy, bieź jaje sumuje maleńki syn, a baćki niepakojacca za zdaroŭje dački.
Ź siamji vajskoŭca, historyk pa adukacyi
Ksienii 36 hod. Naradziłasia jana ŭ rasijskim horadzie Pierm. Baćka-biełarus pajechaŭ tudy vučycca ŭ Vyšejšaje vučylišča rakietnych vojskaŭ, tam i ažaniŭsia. Maci Ksienii — piarmiačka, pracavała nastaŭnicaj.
Paśla baćku pieraviali ŭ Pietrykaŭ, a adtul — u Słuck. Ksienija vučyłasia ŭ 10-j słuckaj škole.
«Udzielničała pastajanna ŭ alimpijadach pa historyi, pačynajučy z 8-9 kłasa, zajmała pryzavyja miescy. Adpaviedna, sfarmiravałasia žadańnie pajści vučycca ŭ BDU na histaryčny fakultet. Univiersitet dačka skončyła z adznakaj, — raskazvaje baćka Aleh. —
Jana vielmi načytany čałaviek. Pa biblijatekach pastajanna chadziła, siadzieła ŭ archivach. Bolš za ŭsio jaje cikaviła historyja rodnaha kraju. U jaje byli dumki abaranić kandydackuju dysiertacyju pa temie Vialikaj Ajčynnaj vajny, ale pakolki jana była mocna zahružana pracaj na BT, na heta nie chapiła času».
Małodšy brat Ksienii skončyŭ Minski instytut kiravańnia, pracuje mieniedžaram. Ci nie chaciełasia baćku, kab dzieci taksama abrali karjeru vajskoŭcaŭ?
«Viedajecie, z časoŭ Savieckaha sajuza ŭsio vielmi mocna źmianiłasia», — adkazaŭ jon.
Na BT zaprasiŭ adnahrupnik, zdymała dakumientalnyja filmy
Na telebačańnie Ksienija patrapiła paśla ŭniviersiteta. Pasprabavać siabie ŭ kadry joj prapanavaŭ adnahrupnik Alaksandr Macias, ciapierašni karespandent ANT.
Na BT žurnalistka ŭ asnoŭnym zdymała dakumientalnyja filmy pra historyju. Blizkaj joj temie Vialikaj Ajčynnaj vajny Ksienija pryśviaciła cykł «1418 dzion. Historyja Pieramohi». Jana rychtavała taksama repartažy z Čarnobylskaj zony — pra katastrofu i žyćcio ludziej paśla jaje.
«Ksiušy padabałasia rabić dakumientalnyja filmy ŭ svaim aŭtarskim styli. Jana pieratvarała časam sumnyja padziei ŭ mastacki šedeŭr. Joj padabałasia tvorčaja svaboda ŭ prafiesii», — dzielicca były kaleha.
Inšy aŭtarski prajekt žurnalistki — dokudramy «Siamiejnyja historyi». Heta žyćciovyja raskazy pra kachańnie, dziaciej, adzinotu.
«Jana čałaviek ambicyj, lubić raskazvać pra svaje dasiahnieńni. Dobry arhanizatar», — apisvaje žurnalistku znajomaja.
Pytańni da lubimaha kanała ŭźnikli, kali pačałasia letašniaja vybarčaja kampanija. U kancy žniŭnia Łuckina zvolniłasia z telebačańnia.
«Pieršym tryvožnym zvankom stała zvalnieńnie Dzianisa Dudzinskaha za zvyčajny post u instahramie. A dalej usio išło pa nakatanaj. Ksiuša supastaŭlała toje, što adbyvajecca za vaknom, z tym, što pakazvajuć u navinach rodnaha kanała. I heta roźnica była kardynalnaj.
Jana adrazu nie chacieła zvalniacca — chacieła pracavać sumlenna. Pakazvać padziei tak, jak jany jość. Ksiuša była hatova sama vyjazdžać sa zdymačnaj hrupaj na maršy i aśviatlać padziei. Nie adnaboka, a ź mierkavańniem usich — ludziej, čynoŭnikaŭ, siłavikoŭ.
Nam kazali, što ŭ «Hałoŭnym efiry» 17 žniŭnia pakažuć sumlennuju karcinu padziej. Ale ŭ vyniku akazałasia, što takija naviny nie patrebny hałoŭnamu dziaržkanału. Kali dajšło da kropki niezvarotu, Ksienija zvolniłasia», — raspavioŭ były kaleha.
Łuckina źbirałasia stvaryć alternatyŭny kanał abjektyŭnych navin. Z prajektam dapamahała Akademija Pres-kłuba.
Žurnalistka taksama dałučyłasia da asnoŭnaha składu Kaardynacyjnaj rady, adkazvała za suviazi z presaj.
«U jaje była dobraja pasada na BT, ale Ksienija jaje kinuła. Choć joj było ciažka i kryŭdna, kali jaje prajekty razdali ludziam, jakija byli jaje pamočnikami», — zaŭvažajuć znajomyja.
Za kratami abvastrylisia prablemy sa zdaroŭjem
Zatrymali Ksieniju 22 śniežnia niedaloka ad CUMa — jana vyjšła za pakupkami. U toj ža dzień u jaje doma byŭ ahlad (ci vobšuk). Zabrali techniku i dakumienty. Usio adbyvałasia na vačach syna-piacikłaśnika.
«Jon tady zvaniŭ mnie ŭvieś u ślazach, bo ŭ dźviery łamilisia. Unuk usio razumieje, vielmi pastaleŭ paśla hetaha zatrymańnia, — kaža Aleh Łuckin. — Jon žyvie z Ksiušynym bratam, bo škoła pobač. Ja za horadam žyvu, ale my bačymsia praktyčna kožny dzień. Schadzili ŭ niadzielu ŭ carkvu ź im. Unuk bolš matematyk — lubić kampjutary, ličby».
Siamja atrymała ad Ksienii šeść listoŭ. Žurnalistka piša, što šmat čytaje, zyčyć baćkam mocnaha zdaroŭja i chvalujecca za syna. U kamiery ź joj jašče siem čałaviek (dvoje palityčnych).
Ksienija maje prablemy sa zdaroŭjem, tamu baćka pieražyvaje, što heta zatrymańnie adbivajecca na jaje stanie.
«Usie balački tam abvastrylisia. Ja pieradaju nieabchodnyja leki, ale Ksienija piša, što jaje zdaroŭje pahoršyłasia. Choć daktary staviacca da jaje z razumieńniem», — dzielicca Aleh Łuckin. —
Ź siabroŭkami dački kamunikuju, jany padtrymlivajuć, listy joj šluć, pieradački nosiać. Ja kantraluju, kab vahu nie pierabrać, štości lišniaha nie pieradać. Kuplaŭ Ksienii ziefir u šakaładzie, babrujskaj vytvorčaści, jaje lubimy.
My trymajemsia. A jak možna jašče pieranosić situacyju, kali dačka ŭ turmie siadzić?»
***
Pisać Ksienii Łuckinaj možna pa adrasie: SIZA-1, 220030, h. Minsk, vuł. Vaładarskaha, 2
Kamientary