Biskup Viciebski zabaraniŭ apładziravać u chramach. Heta vyklikała palemiku
Biskup Viciebski Aleh Butkievič vydaŭ pastanovu ab zabaronie apładysmientaŭ u kaściołach svajoj dyjacezii. Adnačasova jon zahadaŭ, kab Śviatuju Kamuniju prymali na kaleniach.
Hetyja navacyi ŭ takoj tradycyjnaj struktury, jak Kaścioł, vyklikali dyskusii.
«Fsio surjozna», — iranizuje ŭ katalickaj hrupie ŭ fejsbuku manach-kapucyn Siarhiej Maciušonak z namiokam na toje, što heta nie spravy pieršaradnaj važnaści, jakimi siońnia pavinien zajmacca biskup.
«Cudoŭna, nikoli nie plaskaju ŭ kaściole, vielmi heta napaminała partyjnyja schody», — uchvalaje pastanovu biskupa Lilija Ihnatovič.
«Navošta prymušać usich rabić adnolkava? Niaŭžo dla Chrysta nastolki važna, što my, padychodziačy da Jaho, pavinny ŭklenčyć? Čytajučy Śviatoje Pisańnie, možna sustrecca z roznymi situacyjami dzie da Jezusa padychodziać roznyja ludzi i nie ŭsie jany adrazu kidajucca klenčyć, dy i Jezus hetaha im nie zahadvaje, — piša ŭ liście ŭ «Našu Nivu» naš čytač Dzianis Suchavaraŭ. — I chiba Jezus azdaraŭlaŭ i vysłuchoŭvaŭ tolki tych, chto ŭklenčyŭ pierad Im?» — dadaje jon.
Krytykuje jon i zabaronu apładysmientaŭ.
«Apładysmienty — heta prajava śvieckaja, bo ludzi zvyčajna apładzirujuć u teatry, tamu nie prystojna rabić heta ŭ śviatym miescy. Ale, z druhoha boku, plaskańnie ŭ dałoni — heta vyraz radaści, zadavalnieńnia i padtrymki. Niaŭžo heta niešta błahoje i nieprystojnaje? Kali vierniki — žyvoje Cieła Chrysta — vyražajuć hetak, navat adno da adnaho, radaść i padtrymku, to možna skazać, što sam Chrystus apładziruje. Darečy, apładysmienty ŭ biełaruskim kaściole pieravažna źjaŭlajucca padčas «dušpastyrskich abjaŭ», jakija naturalna mohuć pasłužać padstavaj dla takich emocyj jak radaść, zadavalnieńnie i padtrymka, — piša Dzianis Suchavaraŭ i dadaje. — Zhadvajucca i inšyja katalickija kaścioły śvietu (naprykład, u Afrycy) dzie plaskańnie ŭ dałoni, tancy dy inšyja «šumnyja» praktyki padčas liturhii źjaŭlajucca normaj».
Zahad biskupa Viciebskaha nie raspaŭsiudžvajecca na inšyja dyjacezii krainy, u Minsku, Mahilovie, Pinsku i Trakielach apładziravać pa-raniejšamu možna. Varta adznačyć, što dapamožny biskup Alaksandr Jašeŭski, vikaryj Mahiloŭski pazityŭna adhuknuŭsia na viciebskuju navacyju ŭ instahramie: «Mužna, advažna i pravilna!»
48-hadovy Aleh Butkievič byŭ pryznačany biskupam Viciebskim siem hadoŭ tamu. Razam z 51-hadovymi Juryjem Kasabuckim (Minsk) i Juzafam Stanieŭskim (Hrodna) dy 46-hadovym Alaksandram Jašeŭskim (Mahiloŭ) jon naležyć da maładoha pakaleńnia biełaruskich prełataŭ, jakija kirujuć Kaściołam va ŭsio bolš śvieckim hramadstvie. Pastanova biskupa Butkieviča — sproba achavać «sakralnaść» chramavaj prastory, abaranić jaje ad praniknieńnia śvieckich zvyčak i ŭzmacnić uračystaść abradu pryčaścia.
Ciapier čytajuć
U dakumientach pa «spravie Epštejna» znajšli ślady bujnych hrašovych pieravodaŭ u Minsk. Znoŭ uspłyło imia Karyny Šulak30
Kamientary