«Nie vytrymlivajuć niervy, paśla dziažurstvaŭ płačaš». Daktary pra razhar čaćviortaj chvali karanavirusa
U balnicach addajuć pad kavid usio bolš adździaleńniaŭ, kažuć pra pavieličeńnie ciažkich pacyjentaŭ i źniasileńnie piersanału. Zapisali nazirańni daktaroŭ z roznych rehijonaŭ.
«Miescy ŭ minusach — zahruzka na 105-110%»
«Horš za pieršuju chvalu», — tak apisvaje situacyju adzin sa staličnych daktaroŭ.
«Miescy ŭ minusach — zahruzka na 105-110%. Dzieści prystaŭnyja łožki dadali, a dzieści pad pałaty prystasavali byłyja padsobnyja pamiaškańni, — kaža jon pra abstanoŭku ŭ 10-j balnicy. — Kisłarodu chapaje zbolšaha, ale ŭprytyk. Heta z ulikam taho, što z časoŭ pieršaj chvali dadatkovyja kropki praviali».
Niahledziačy na zahruzku, niedalečanych dadomu nie adpraŭlajuć, trymajuć, kolki patrebna, da stanu, kali nie strašna vypisać.
«Čystym» adździaleńniem u balnicy zastałasia aftalmałohija. Jaje adździalili ścienami ad astatniaj kliniki i zrabili asobny ŭvachod.
«Chvaroba pamaładzieła. Ciapier bolšaść pacyjentaŭ — 40-60 hadoŭ, ale byvaje, što ŭ reanimacyju traplajuć i ludzi, maładziejšyja za 30. Chutčej za ŭsie tamu, što inšy štam hulaje — taja samaja delta.
Pryščeplenych vielmi mała, i jany chvarejuć značna lahčej. U reanimacyi takich było, zdajecca, dva čałavieki. Pryčym aboje vakcynavalisia ŭ pieršych partyjach, bolš za paŭhoda tamu, i ŭžo byŭ čas revakcynacyi», — dzielicca miedyk nazirańniami.
Pa jaho słovach, chvorych ciapier bolš i chvarejuć jany ciažej. Bolš ludziej z dychalnaj niedastatkovaściu, stojkaj lichamankaj, jakuju ciažka źbić, čaściej zdarajucca ŭskładnieńni.
«Nie vytrymlivajuć niervy, my pracujem na znos»
U 5-j balnicy Minska pad karanavirus pieraprafilavali nieŭrałahičny korpus.
«Štodzień patrabujuć bolš vypisvać ci pieravodzić pacyjentaŭ, ale hetyja miescy vielmi chutka zapaŭniajucca. Naš korpus nie raźličvaŭsia na pulmanałahičnych pacyjentaŭ, na troch etažach niama kisłarodu (centralnaj razvodki), tamu jaho nie chapaje.
Dniami adkryŭsia stary korpus, adździaleńnie na 45 łožkaŭ. Umovy nie lepšyja, ale jość kisłarod. Užo zakłali i hetaje adździaleńnie całkam», — raskazvaje doktarka.
Pracavać ciažka, bo ŭ adździaleńniach nie chapaje miedykaŭ.
«Nie vytrymlivajuć niervy, pastajanna na nas vylivajecca stolki niehatyvu. My pracujem na znos, ale ludzi ŭsio adno łajacca, nibyta my vinavatyja, što miescaŭ niama va ŭsim horadzie.
Praca sutkami, da nočy nie možaš vyjści z «brudnaj» zony, niama času navat źbiehać u tualet. A pajeści naohuł raskoša — učora pajeli tolki a 22-j hadzinie. Jašče byli ludzi, ale my ŭžo sami valilisia z noh.
Ciapier vyrazna bačna źniasileńnie i emacyjnaje vyharańnie ŭ daktaroŭ, a dalej budzie tolki horš, paśla dziažurstvaŭ płačaš. Ni pra jakoje asabistaje žyćcio nie idzie razmova, prychodžu dadomu i ničoha nie mahu rabić», — emacyjna raskazvaje surazmoŭca.
Za čas epidemii ŭ miedykaŭ nazapasiŭsia dośvied pracy z kavidam, novyja mietady lačeńnia, tamu ŭdajecca dapamahčy bolšaj kolkaści ludziej. Pa słovach doktarki, pamiraje šmat, ale mienš, čym u papiarednija chvali.
«Ale treba ŭličvać, što za ŭvieś čas vielmi šmat pamierła ludziej z uraźlivaj hrupy — pažyłyja, imunadeficytnyja sa spadarožnaj patałohijaj.
Va ŭsich balnicach viadziecca statystyka pacyjentaŭ, jakija zachvareli paśla vakcynacyi. Heta nievialikaja kolkaść ludziej, i karanavirus jany pieranosiać nie tak ciažka. Svaich baćkoŭ ja pryščapiła».
«Adčuvańnia ŭsieahulnaj katastrofy niama, ale prablema z płanavaj dapamohaj»
U Viciebsku abłasnaja balnica častkova pieraprafilavana pad karanavirus: urałahičny korpus, niefrałahičny i dadatkovyja reanimacyjnyja łožki. Kavidnyja miescy ŭsie zaniatyja.
«Zaniatyja, bo ludzi ŭsimi mahčymymi sposabami adusiul sprabujuć patrapić u abłasnuju balnicu. U joj nasamreč lepš lečać kavid, čym u lubym inšyja stacyjanary.
Pa niekavidnych łožkach — płanavaj špitalizacyi niama, na ekstrannuju dapamohu miescaŭ uprytyk, ale chapaje.
U mnohich inšych balnicach pieraprafilavali adździaleńni pad karanavirus. Tam miescy ŭ pryncypie jość. Adčuvańnie, što ahułam pa horadzie zastajecca jašče zapas pa łožkach. Ciažkich pacyjentaŭ šmat, ale heta zrazumieła, pakolki pry pavieličeńni kolkaści chvorych praparcyjna pavialičvajecca kolkaść ciažkich», — tłumačyć viciebski doktar.
Adčuvańnia ŭsieahulnaj katastrofy niama: Viciebsk užo nie ŭpieršyniu ŭ takoj situacyi akazvajecca. Prablema tolki z pacyjentami, jakim nieabchodna płanavaja dapamoha. Asabliva pakutuje onkadapamoha.
«Usio padobna na pieršuju chvalu, tolki my ŭžo krychu ŭ kursie. Daktary mienš chvarejuć, čym tady (vialiki pracent pryščeplenych i adno adnaho mienš zaražajem).
Pa ŭzroście pacyjentaŭ pryncypovaj roźnicy niama: čym starejšyja, tym bolš chvarejuć. Čym nižejšy sacyjalny status, tym čaściej zaražajucca».
«Kali ŭ žniŭni było 10 vyklikaŭ za dzień, to ciapier 50»
U rajonach taksama napružana.
«Značna pavialičyłasia kolkaść vyklikaŭ z karanavirusam. Kali ŭ žniŭni było 10 za dzień, to ciapier 50»,
— dzielicca miedyk z Marjinaj Horki.
Siarod pacyjentaŭ u rajonie ciapier šmat dziaciej i ludziej va ŭzroście 40-50 hod. Pryščeplenyja siarod ich jość, asabliva ŭ liku kantaktaŭ pieršaha ŭzroŭniu.
«Vakcyna nie vyklučaje, što čałaviek zachvareje, jana ablahčaje simptomy. Vakcynavanyja pieranosiać karanavirus u lohkaj ci bieśsimptomnaj formie. Niekatoryja sami kažuć, što nie zachvareli, choć žyvuć u adnoj kvatery z chvorym čałaviekam».
Pytańnie špitalizacyi zvyčajna vyrašajecca da pryjezdu bryhady chutkaj dapamohi — jaho vyrašaje doktar, jaki pačynaŭ lačeńnie i adpraŭlaŭ na mazok ci zdymak.
«Kali jość pnieŭmanija, paćvierdžany PŁR-test, saturacyja nižejšaja za normu, to viazuć u balnicu. U maje źmieny dastaŭlali ŭ našu rajonnuju».
Miedyk kaža, što pik chvali čakajuć bližej da zimy, jak heta byvaje ź inšymi siezonnymi zachvorvańniami.
Kamientary