«Navat za kratami kłapocicca pra inšych». U paniadziełak pačnuć sudzić Volhu Załatar, joj pahražaje da 7 hod
Maci piaciarych dziaciej Volhu Załatar zatrymali 18 sakavika, kali jana viezła dačku ŭ muzyčnuju škołu. Doma prajšoŭ pieratrus, muža zatrymali i dali 10 sutak. Volhu paśla Akreścina ŭžo nie vyzvalili, adpravili na Vaładarku, dzie jana pa siońnia i znachodzicca. Jaje abvinavačvajuć u arhanizacyi i navučańni ŭdzielnikaŭ akcyjaŭ pratesta, i padstrakalnictvie ŭdziełu, a taksama ŭ stvareńni ekstremisckaha farmiravańnia ci ŭdziele ŭ im. Vinu jana nie pryznaje.
Zatrymlivali Volhu Załatar apieratyŭniki HUBAZiK, jany raźviarnuli jaje mašynu na kalcavoj, razam pajechali na pieratrus dadomu, paśla hetaha advieźli jaje ŭ centralny ofis upraŭleńnia pa vulicy Revalucyjnaja, dzie pa jaje słovach, jaje katavali, prymušajučy pradastavić dokazy suprać siabie. Pad ciskam žančyna skazała parol ad mabilnaha telefona i telehrama. Ale navat paśla hetaha da jaje prymianiali hvałt.
Advakat Volhi paviedamlaŭ presie, što
u jaje byli siniaki i kryvapadcioki — bili pa hałavie, dušyli, kłali na ziamlu, pryciskali nahami da padłohi.
Pra źbićcio žančyna paviedamiła na pieršym ža dopycie, ale śledčy heta prosta praihnaravaŭ: Volhu nie ahledzieŭ sudmiedekśpiert, jaki pavinien byŭ zafiksavać paškodžańni, na padstavie ekśpiertyzy paśla pavinny byli acanić dziejańni siłavikoŭ, ale nijakaha raźbiralnictva ŭ vyniku nie było. Advakat Andrej Mačałaŭ, jaki prakamientavaŭ situacyju, u vyniku byŭ pazbaŭleny licenzii.
Volha Załatar skončyła licej BDU i fakultet fiłasofii i sacyjalnych navuk BDU. Maje ad dziaržavy orden jak maci piaciarych dziaciej: starejšaj dačce na momant zatrymańnia było 17 hod, małodšamu synu — usiaho čatyry.
Volha była naziralnicaj na vybarach u 2020-m na učastku ŭ Ždanovičach, ale na padlik jaje nie puścili. Paśla razhona mirnych demanstrantaŭ i žorstkich zatrymańniaŭ žančyna vałancioryła na Akreścina, u sudach, dapamahała zatrymanym i ich siemjam.
Da kryminalnaha pieraśledu jaje trojčy zatrymlivali pa administratyŭnych artykułach, dva razy spravy dachodzili da suda, dzie joj davali vialikija štrafy — pa zakonie, niemahčyma adpravić na sutki žančynu, jakaja vychoŭvaje niepaŭnahadovych dziaciej. Dadomu da jaje prychodzili z pravierkami, kab acanić, u jakich umovach žyvuć dzieci.
Siłaviki zajaŭlali, što Załatar była administratarkaj ždanovickaha čatu ŭ Telehramie, dzie abmiarkoŭvałasia hramadska-palityčnaja situacyja ŭ krainie paśla vybaraŭ. Milicyja ličyć, što jana była arhanizataram «niesankcyjanavanych akcyj» — prahułak, dvaravych kancertaŭ i sustrečaŭ z susiedziami.
Niahledziačy na chadajnictvy abarony źmianić mieru ŭtrymańnia na nieźviazanuju z utrymańniem pad vartaj, amal vosiem miesiacaŭ žančynu trymajuć u SIZA. Chadajnictvy katalickich śviataroŭ, jakija byli hatovyja paručycca za Załatar, śledstva taksama adchiliła.
Viadoma, što za hety čas Volha źmianiła niekalki kamier, pierachvareła na karanavirus. Taksama jaje adpraŭlali na ekśpiertyzu ŭ RNPC psichičnaha zdaroŭja, dzie jana sustreła svoj dzień naradžeńnia.
Žančyny, jakim davodziłasia siadzieć razam z Volhaj na Vaładarcy, kažuć, što
navat u tych składanych umovach jana starajecca kłapacicca pra inšych, pa-maciarynsku i z asablivym kłopatam stavicca da sukamiernic, jakija ŭpadajuć u adčaj, u jakich niama vialikaj padtrymki z voli. Kaža, što navat u turmie adčuvaje siabie svabodnym čałaviekam.
Šmat raskazvaje pra Boha, heta možna ŭbačyć i ŭ jaje listach. Što da budučyni, to Volha vieryć, što źmieny ŭ Biełarusi niepaźbiežnyja. Sama jana b chacieła adkryć piakarniu, raniej jana vypiakała svoj chleb na zakvascy.
Pieršaje pasiedžańnie pa spravie Volhi Załatar pryznačana na 15 listapada ŭ Minskim haradskim sudzie, pačatak u 10:00.
Praces budzie vieści sudździa Anastasija Papko. Raniej jana pracavała ŭ sudzie Pieršamajskaha rajona, dzie adznačyłasia pracesami suprać palityčnych aktyvistaŭ i žurnalistaŭ. Pajšła na pavyšeńnie. Litaralna na dniach skončyła razhlad spravy palitviaźnia Mikałaja Dziadka, jaki atrymaŭ 5 hod kałonii.
Kamientary