Historyja nievierahodnaha pośpiechu. Jak Binance stała najvialikšaj u śviecie kryptabiržaj

Finansavaja birža, jakaja raście chutčej za ŭsie inšyja ŭ śviecie, nie maje centralnaha ofisu ci aficyjnaha adrasu, nie atrymoŭvaje licenzij u krainach, dzie ažyćciaŭlaje tranzakcyi, a jejny dyrektar da niadaŭniaha času naohuł nie pryznavaŭsia, dzie jon fizična znachodzicca.

Kampanija była zasnavanaja ŭsiaho čatyry hady tamu, ale siońnia jana viadzie rej ŭ śviecie ličbavaj valuty:

jaje dzionny abarot bolšy za abarot čatyroch hałoŭnych kankurentaŭ razam uziatych (i siahaje 76 miljardaŭ dalaraŭ!).

Ale, zdajecca, nadychodzić kaniec jaje nierehulavanamu raźvićciu. Finansisty razumiejuć: ličbavyja aktyvy, što tak chutka vyraśli, stanoviacca sistemna važnymi.

Zasvoiŭšy ŭrok z kryzisu 2008 hodu, spravakavaha niekantralavanaj vydačaj kredytaŭ na žytło, ułady chvalujucca, kali štości ŭ finansavaj sistemie raście chutka i niekantralavana.

Ułady šerahu krain užo papiaredzili karystalnikaŭ, što hetaja birža ‒ niezarehistravanaja i nie maje prava akazvać pasłuhi. Amierykanskaja Kamisija pa kaštoŭnych papierach i biržach ščylna vyvučaje, nakolki zakonna dziejničaje Binance.US u Amierycy i jak jana źviazanaja ź pieršapačatkovaj kampanijaj Binance.

Mnohich chvaluje toje, što kampanija była zasnavanaja ŭ Kitai, a značyć Kitaj moža mieć dostup da ŭsich dannych amierykanskaj ličbavaj biržy.

Zasnavalnik Binance Čžanpen Čžao zajaviŭ u interviju, što kampanii ŭsio ž varta ŭzhadnić svaju dziejnaść z nacyjanalnymi zakonami i praviłami. U tym liku — atrymać nieabchodnyja licenzii.

Sprava ŭ tym, što tolki 2% nasielnikaŭ ziamli majuć kryptavalutu — kab zaanhažavać astatnija 98%, ličbavaj biržy daviadziecca lehalizavacca. Ciapier jany dumajuć ab tym, kab adkryć štaby i ofisy, i ŭžo ŭviali abaviazkovuju sistemu identyfikacyi karystalnikaŭ, kab praduchilić niezakonnyja finansavyja abaroty na biržy. Tym nie mienš, pakul inśpiektary nie mohuć dabicca ad kryptabiržy adkazu na prostaje pytańnie: adkul tyja ažyćciaŭlajuć svaju dziejnaść.

Na siońnia viadoma niašmat pra dyrektara-zasnavalnika kampanii, Čžanpena Čžao.

U tvitary jon padpisany svaimi inicyjałami CZ i maje amal 4 miljony padpisčykaŭ. Jamu 44 hady i na pracu (a jon narešcie pryznaŭsia, što žyvie i pracuje ŭ Sinhapury) jon jeździć na elektrasamakacie.

Pra bitkojn jon upieršyniu pačuŭ u 2013 za hulnioj u pokier i mocna natchniŭsia samoj kancepcyjaj. Pakolki ludzi paśla krachu 2008 hodu bolš nie daviarali bankaŭskaj sistemie, skarystaŭsia nahodaj adkryć svaju anłajn placoŭcu dla abmienu kryptavaluty. Dla hetaha jamu nie byli patrebnyja ni bankaŭski rachunak ni centralny ofis.

Jaho pieravahaj nad kankurentami, jakija taksama adkryvali padobnyja sajty, byli dźvie rečy: akramia anhielskaj movy, sajt mieŭ pierakład jašče na 8 moŭ, i jon byŭ prosta arhanizvany dla zručnaści karystalnikaŭ.

I tak kampanija vyrvałasia nieŭzabavie ŭ lidary pa abmienie ličbavych valut.

Kali ŭ 2017 hodzie Kitaj zabaraniŭ dziejnaść kryptabirž unutry svajoj krainy, «naša kamanda z 30 supracoŭnikaŭ prosta spakavała rečy i źjechała ŭ Japoniju», raskazaŭ Čžao na virtualnaj kanfierencyi pa technałohijach.

U 2018 japoncy taksama papiaredzili kampaniju, što tyja parušajuć zakon, pracujučy bieź licenzii ŭ Japonii. Paśla hetaha kampanija pierastała adkazvać na pytańni, adkul jaje supracoŭniki ažyćciaŭlajuć svaju dziejnaść.

Niahledziačy na prablemy z zakonam, kampanija kvitnieje i chutka raście. Čžao ličyć, što treba zapavolić tempy rostu, kab dazvolić inšym biržam padraści. Heta budzie vyhadna i samoj Binance.

Novaja zapatrabavanaja prafiesija data scientist z šaściznačnym zarobkam

Mahutny ŭdar pa vytvorcu prahram ličbavaha špijanažu. ZŠA nakłali sankcyi na izrailskuju IT-kampaniju

• 0
• 0
• 0
• 0
• 0
• 0
• 0
• 0