Pasoł Aŭstryi sustrełasia z maci aryštavanaha pres-sakratara A1
Pasoł Aŭstryi ŭ Biełarusi Ałaizija Viorhieter sustrełasia z Taćcianaj Bredzielevaj, maci aryštavanaha na 15 sutak pres-sakratara kampanii A1 Mikałaja Bredzieleva. Sumiesny zdymak spadarynia pasoł pastaviła na vokładku svajho profilu ŭ Facebook, paviedamlaje REFORM.by.
Dypłamat napisała, što nie moža ŭ treciuju niadzielu Adventu być sa svajoj siamjoj, adnak pabačyłasia z Taćcianaj, jakuju nazyvaje častkaj svajoj «hłabalnaj siamji». Jana taksama raspaviała historyju svajoj biełaruskaj siabroŭki.
Pavodle jaje słoŭ, kali adbyŭsia vybuch na Čarnobylskaj AES, Taćciana Bredzieleva žyła ŭ Babrujsku, a jaje muž Aleh byŭ adnym z tych, chto tušyŭ stancyju i atrymaŭ asabliva vialikuju dozu radyjacyi. Pasoł paviedamiła, što ŭ 1990 hodzie tradycyjny dla Aŭstryi Kaladny dabračynny telemarafon «Śviatło ŭ ciemry» byŭ pryśviečany paciarpiełym ad katastrofy na ČAES biełaruskim dzieciam.
Jana napisała, što chacieła b padziakavać mužu Taćciany za toje, što razam ź inšymi ryzykavaŭ žyćciom dla źnižeńnia niebiaśpieki apramieńvańnia dla biełaruskich, a taksama i aŭstryjskich siemjaŭ, ale heta ŭžo niemahčyma.
«Tamu ja abdymaju Taćcianu», — napisała jana.
«Čałaviečnaść nie viedaje dziaržaŭnych miežaŭ. Ja rada i ščaślivaja, što na nastupnym tydni zmahu adznačać Kalady ŭ siabie doma. I ja nie stamlusia raskazvać majoj siamji pra ludziej ź Biełarusi», — dadała pasoł.
Ab zatrymańni Mikałaja Bredzieleva, pres-sakratara kampanii A1, stała viadoma 10 śniežnia. «Pakajannaje» videa ź im źjaviłasia ŭ praŭładnych Telegram-kanałach. Tam ža pisali pra toje, što Bredzieleŭ nibyta «źlivaŭ» zakrytuju infarmacyju pra klijentaŭ kampanii. U pasolstvie Aŭstryi ŭ Biełarusi vykazali pratest suprać zatrymańnia, u kampanii A1 Telekom Austria paabiacali skarystacca ŭsimi mahčymymi jurydyčnymi i dypłamatyčnymi sposabami dla abarony supracoŭnika. Paźniej stała viadoma, što apieratar pravodzić rasśledavańnie taho, što adbyłosia. Siarod inšaha paviedamlałasia, što Bredzieleŭ nie mieŭ dostupu da danych klijentaŭ.
Na dniach źjaviłasia infarmacyja, što kandydatura Ałaizii Viorhieter prapanujecca na pasadu stałaha pradstaŭnika Aŭstryi pry Radzie Jeŭropy ŭ Strasburhu, a na jaje miesca ŭ Minsk rekamiendavany Ronald Šturm, jaki doŭhi čas pracavaŭ pasłom Aŭstryi ŭ Livii.
Maci zatrymanaha pres-sakratara A1 Mikałaja Bredzieleva: «Mnie pišuć šmat słovaŭ padtrymki»
Prapahanda nakinułasia na A1 i zaklikaje nacyjanalizavać kampaniju. Nakolki heta mahčyma?
Ciapier čytajuć
Načalnik milicyi Brahina stralaŭ u svaju žonku. Jana cudam vyžyła3
Kamientary