Adpraŭka vojskaŭ u Kazachstan adbiłasia na valutach? Raźbirajemsia, čamu tak mocna raście dalar i padaje rasijski rubiel
Z kanca śniežnia biełaruski rubiel istotna asłabieŭ da dalara i jeŭra. Staršy analityk «Alpary Jeŭrazija» Vadzim Iosub tłumačyć, u čym pryčyna valutnych arelaŭ.
Dalar i jeŭra praciahvajuć rost užo amal dva tydni. Pry hetym my nazirajem pavolnaje padzieńnie biełaruskaha i surjoznaje padzieńnie rasijskaha rubla.
«Biełaruski rubiel padaje — valutny košyk raście, — kamientuje Vadzim Iosub. — Kali mierkavać pa košcie valutnaha košyka, to na tarhach 6 studzienia biełaruski rubiel navat krychu ŭmacavaŭsia. A heta śviedčyć pra toje, što ŭsio, što ciapier adbyvajecca z dalaram, jeŭra i rasijskim rublom, nie źjaŭlajecca značnaj prablemaj dla biełaruskaj ekanomiki i biełaruskaha rubla ŭ pryvatnaści.
Pierš za ŭsio, heta prablema dla rasijskaha rubla. Možam navat praanalizavać: jašče ŭ 20-ch čysłach śniežnia dalar kaštavaŭ 73 rasijskija rubli, a ŭžo siońnia na tarhach dasiahnuŭ 77 rubloŭ. Stolki amierykanskaja valuta ŭ Rasii nie kaštavała ź siaredziny krasavika minułaha hoda. Za apošnija paru tydniaŭ rost dalara da rasijskaha rubla ŭvohule skłaŭ 5,5%. I heta davoli surjozny pakazčyk».
Razvažajučy ab pryčynach padzieńnia rasijskaha rubla, ekanamist kaža, što jano pačałosia jašče ŭ apošni tydzień śniežnia minułaha hoda i źviazanaje z eskałacyjaj kanfliktu pamiž Rasijaj i Ukrainaj.
Nahadajem, u apošnija dni śniežnia 2021-ha Rasija praciahnuła naroščvać kolkaść vojskaŭ na miažy z Ukrainaj i ściahvać u rehijon vajskovuju techniku. Mnohija zamiežnyja vydańni sa spasyłkaj na krynicy ŭ amierykanskaj vyviedcy paviedamlali, što ŭ pieršyja tydni 2022 hoda Rasija nibyta rychtujecca ŭvarvacca na terytoryju Ukrainy.
«Tady ž Zachad zajaviŭ, što ŭ vypadku dalejšaj ahresii suprać Rasii buduć uviedzienyja samyja žorstkija ekanamičnyja sankcyi. Takim čynam, z-za ryzyki takich sankcyj, rasijski rubiel i pačaŭ svajo padzieńnie, — razvažaje Vadzim Iosub. — Ale litaralna za apošnija sutki źjaviŭsia jašče adzin faktar padzieńnia rasijskaha rubla. I heta nie stolki sam fakt pieravarotu ŭ Kazachstanie, kolki navina ab udziele Rasii ŭ padziejach u Kazachstanie ŭ ramkach ADKB. Rasijskamu rublu hetyja padziei, vidavočna, naškodziać jašče bolš».
Na dumku ekanamista, chutčej za ŭsio, spracuje nastupny miechanizm: častka inviestaraŭ, jakija trymajuć hrošy ŭ rasijskaj ekanomicy (heta mohuć być rasijskija akcyi abo rasijskija dziaržablihacyi), uzvažać ŭsie ryzyki i ź vialikaj vierahodnaściu prymuć rašeńnie vyvieści svoj kapitał. Heta značyć, što jany pradaduć svaje akcyi i ablihacyi za rubli i kupiać na ich valutu. U vyniku padymiecca popyt na jeŭra i dalar, a kurs rasijskaha rubla ŭpadzie jašče bolš.
«Navat kali mierkavać pa tarhach 6 studzienia, to rasijski rubiel užo asieŭ dastatkova surjozna, — analizuje Vadzim Iosub. — Dalar i jeŭra rastuć prykładna na 0,5%, a rasijski rubiel padaje ŭ dačynieńni da biełaruskaha bolš čym na 1%. Kali situacyja i dalej budzie takoj napružanaj, rasijski rubiel praciahnie tańnieć u dačynieńni da zamiežnych valut. Što tyčycca biełarusaŭ, to dla nas heta budzie aznačać, što dalar i jeŭra i dalej buduć raści, a rasijski rubiel — padać».
Čytajcie taksama: Pratesty ŭ Kazachstanie pryviali da źnižeńnia cen na bitkoin
Ciapier čytajuć
Bližejšym časam buduć vyzvaleny bolš za 150 palitźniavolenych7
Kamientary