Jeŭropa pierachodzić na «zialonuju» enierhietyku. I dla Rasii heta paraza

Zhodna z płanami Jeŭrakamisii, da 2030 hoda vykidy vuhlakisłaha hazu ŭ krainach ES pavinny źnizicca na 55% u paraŭnańni ź ličbami 1990 hoda. Pryčym jeŭrapiejcy chočuć mocna źnizić vykarystańnie nie tolki vuhalu, ale i zasnavanych na nafcie vidaŭ vadkaha paliva i navat hazu. Jeŭropa choča pierachodzić na ŭznaŭlalnuju enierhiju, i dla Rasii takaja tendencyja — strukturnaja i stratehičnaja paraza, piša businessinsider.com.pl.

Raście kolkaść elektrakaraŭ: mierkavana, da 2030 hoda 60% usich mašyn, što buduć rehistravać u Zachodniaj Jeŭropie, buduć hetaha kłasa. Što da elektrastancyj, jakija vykarystoŭvajuć uznaŭlalnuju enierhiju, na ich u Jeŭropie ŭ 2020 hodzie prychodziłasia 37,5% usioj spažyvanaj elektryčnaści. Anałahičnyja tendencyi nazirajucca i ŭ ZŠA.

Zhodna z prahnozami OPEC, pačynajučy z 2035 hoda ŭ śviecie pierastanie raści popyt na naftu, a ŭžo z 2025 hoda jon pačnie padać u najbolš raźvitych krainach, i heta niahledziačy na rost kolkaści aŭtamabilaŭ u hetych krainach.

Uładzimir Pucin nie moža ihnaravać hety trend. Kali ŭ Jeŭropie ŭ nastupnyja 28 hadoŭ vykidy na transpart źniziacca na 90%, heta aznačaje, što jeŭrapiejcy buduć kuplać na 90% mienš paliva. Maskva pavinna być zadavolenaja vialikimi cenami na haz i naftu zaraz, ale ž hety fienomien moža chutka skončycca. Jon źviazany z małymi inviestycyjami ŭ paliŭnuju industryju praź jaje chutki zaniapad u budučyni, a taksama z nastupstvami pandemii dla suśvietnaj ekanomiki i z małoj kolkaściu miesca ŭ schoviščach syraviny. Ale pa miery taho, jak raźvityja krainy buduć admaŭlacca ad vykapniovych resursaŭ, u Rasii budzie zastavacca ŭsio mienš kozyraŭ.

Ekanamisty padličyli, što pry canie nafty 90 dalaraŭ za baral Rasija atrymlivaje ŭ biudžet dadatkovyja 65 miljardaŭ dalaraŭ u paraŭnańni z pakazčykami minułaha hoda, kali ceny byli nižejšyja. Kali ž nafta budzie aceńvacca ŭ 100 dalaraŭ za baral, dadatkovy prybytak składzie 73 miljardy dalaraŭ. Biudžetnyja prybytki ad padatkaŭ z prodažu nafty i haza skłali ŭ minułym hodzie 119 miljardaŭ dalaraŭ, a ŭ hetym hodzie jany mohuć pieravysić hetuju sumu.

Amal pałova z usich prybytkaŭ ad ekspartu nafty i haza idzie ŭ formie padatkaŭ u rasijski biudžet. Nakolki vialikaj budzie hetaj suma ŭ nastupnyja hady, kali spažyvańnie vuhlevadarodaŭ u śviecie dakładna źmienšycca? Z kožnym hodam dla Rasii budzie ŭsio bolš ciažka nie adstavać ad krain, jakija pastavili ŭ svaim raźvićci na siektary pramysłovaści i pasłuhaŭ, a nie na vykapniovaje paliva. Praz heta ŭ krainy ź ciaham času budzie ŭsio mienš hrošaj na toje, kab utrymlivać vialikuju armiju i stvarać novuju zbroju.

• 0
• 0
• 0
• 0
• 0
• 0