Ci varta niepakoicca z-za adjezdu biełaruskich dypłamataŭ z Kijeva? Ci značyć heta, što biełaruskija vajskoŭcy ŭvojduć va Ukrainu?

Ci nie źbirajecca naša kraina evakuiravać svajo pasolstva ŭ suviazi z rašeńniem uviadzieńnia biełaruskich vojskaŭ na terytoryju Ukrainy i čaho čakać u najbližejšaj budučyni, raskazaŭ «Salidarnaści» eks-dypłamat, staršy daśledčyk Centra novych idej Pavieł Macukievič.

‒ Za dzień da napadu Rasii na Ukrainu ŭsie rasijskija dypłamaty pakinuli krainu. Ciapier my bačym masavy adjezd biełaruskich. Pra što heta moža śviedčyć?

‒ Ja pakul nie bačyŭ navin ab tym, što Biełaruś evakujuje svaju ambasadu. Na aficyjnym sajcie pasolstva Biełarusi va Ukrainie pakul ničoha pra heta niama.

Sama pa sabie evakuacyja była b łahičnaj, bo ŭ krainie idzie vajna, i Kijeŭ abstrelvajecca. Pieravažnaja bolšaść krain daŭno evakujavała svaich dypłamataŭ.

Iznoŭ ža adjezd i evakuacyja dypłamataŭ nie adbyvajecca tajemna. Jość dypłamatyčnaja pracedura: kali pasoł pakidaje krainu, u jakoj jon pracuje, to pasolstva abaviazana prainfarmavać MZS krainy, što ŭ hety pieryjad pasła nie budzie i vykonvać abaviazki časovaha pavieranaha budzie niejki dypłamat. Kali razmova idzie ab evakuacyi, ja dumaju, była b adpaviednaja nota.

Heta nie toje, što schavaješ.

‒ Ale kali vykazać zdahadku, što takoje rašeńnie ŭsio ž pryniataje, ci aznačaje jano, što Biełaruś płanuje vajennaje ŭvarvańnie va Ukrainu?

‒ Heta moža być, viadoma, simptomam.

Ale, mnie zdajecca, heta bolš ukazvaje na toje, što rasiejskija vojski płanujuć šturm i bambardziroŭku Kijeva. I pakolki Łukašenka — sajuźnik Pucina ŭ hetaj brudnaj spravie, biełaruski bok moža viedać bolš, i heta prymušaje ich evakuiravać svaich dypłamataŭ.

Takoje lohka sabie ŭjavić. Rasiejskija vojski nastupajuć. Pavolna, spyniajucca, ciahnuć čas, papaŭniajuć zapasy, ale tak ci inakš nadychodziać. I, miarkujučy pa tym, što havoryć Pucin, jon pakul ad svaich płanaŭ pa zachopie Ukrainy nie admoviŭsia. Navat niahledziačy na toje, što vajna zaciahvajecca, kolkaść achviar raście, harady pieratvarajucca ŭ ruiny.

Heta, vidać, u rasiejska-savieckaj tradycyi — prakładać darohu da svaich sumnieŭnych pieramoh trupami i razbureńniami.

Ale nie treba zabyvacca, što amierykancy ŭ Biełarusi ŭžo miesiac jak evakuiravali svajo pasolstva. Vidavočna, u metach biaśpieki, miarkujučy, što kanflikt moža vyjści na terytoryju Biełarusi. Jany pryniali hetaje rašeńnie, chacia pakul u samoj Biełarusi vajny niama.

‒ Łukašenka da apošniaha adchryščvaŭsia ad uviadzieńnia biełaruskich vojskaŭ va Ukrainu. Niešta mahło b jaho zaraz padšturchnuć źmianić hetaje rašeńnie?

‒ Ja nie vyklučaju, što ŭ Biełarusi budzie pryniataje takoje rašeńnie i niejki vajskovy kantynhient moža pryniać udzieł u hetaj vajnie na baku Rasiei. Ja prosta liču, što hetaje rašeńnie ŭžo navat nie ŭ kampietencyi biełaruskich uładaŭ.

Kali pastupić adpaviedny zahad z Kramla, Alaksandru Łukašenku nie zastaniecca ničoha inšaha, jak hety zahad vykanać. Inakš na hetym skončycca jahonaja palityčnaja karjera jak kiraŭnika hetaj terytoryi, na jakoj i tak užo prysutničajuć rasiejskija vajskoŭcy.

Tak, hetaha jamu nie chaciełasia b, heta spałučana z ryzykami destabilizacyi sacyjalna-palityčnaha stanovišča, ale ad jaho heta nie zaležyć.

‒ A nakolki Rasieja zacikaŭlena ŭ prysutnaści biełaruskich vojskaŭ na terytoryi Ukrainy?

‒ Dumaju, što ciapierašniaja rola, jakuju adyhryvaje Biełaruś, Kreml pakul što zadavalniaje. Naša kraina dla Rasii ‒ płacdarm, nazapašvalnik rasijskich vojskaŭ, terytoryja, ź jakoj viadziecca nastup i abstreł Ukrainy (u pryvatnaści, kirunak Čarnihaŭ-Kijeŭ), miesca, dzie zalizvajucca rasijskija rany (tut lečać, kormiać i pojać rasijskich vajskoŭcaŭ). I druhaja rola ‒ heta rola pieramoŭnaj placoŭki.

U Rasii, na moj pohlad, dastatkova pakul ułasnych reziervaŭ dla vajny z Ukrainaj. U ich jość razumieńnie, što ŭdzieł biełaruskich vajskoŭcaŭ u hetaj apieracyi moža destabilizavać situacyju ŭ samoj Biełarusi. Heta stvoryć značna bolš prablemaŭ dla rasiejskich vojskaŭ na terytoryi Biełarusi ŭ płanie ich pieramiaščeńnia, ratacyi, manieŭraŭ.

Tamu Kreml zadavalniaje Łukašenka jak čałaviek, jaki zabiaśpiečvaje płacdarm, i pradstaŭlaje Biełaruś jak pieramoŭnuju placoŭku. Choć pa fakcie naša kraina ‒ nijakaja nie placoŭka ŭ sensie miratvorčaści, heta prosta adras, pa jakim adbyvajucca hetyja pieramovy.

Ale ŭsio moža źmianicca. I heta nie ad nas zaležyć. Tut my pieška. I byli hetaj pieškaj. Navat samyja surjoznyja biełaruskija čynoŭniki typu Makieja žyli ŭ niaviedańni i ličyli, što my pravodzim vučeńni «Sajuznaja rašučaść-2022», što vojski syduć, jak jon zajaŭlaŭ, až da apošniaha tanka i sałdata. Ale za šyrmaj hetych vučeńniaŭ rychtavałasia nastupalnaja apieracyja, rychtavałasia ŭvarvańnie.

I ŭvieś maštab biedstva dla nas u tym, što kali b nie Biełaruś jak płacdarm dla hetaj apieracyi, to i vajny nie było b u takim maštabie. Niemahčymy byŭ by hety nastup na Kijeŭ. Maksimum sprava abmiežavałasia b tolki rehijonam Łuhanskaj i Danieckaj abłaściej.

I kožny dzień vajny, achviary, razbureńni ‒ heta taksama ŭsio na sumleńni biełaruskich uładaŭ.

Prynamsi, tyja achviary i razbureńni, jakija iduć z terytoryi Biełarusi.

• 0
• 0
• 0
• 0
• 0
• 0
• 0
• 0