Samy niebiaśpiečny syr u śviecie, unutry jakoha źvivajucca žyvyja ličynki: voś dzie jaho znajści
Pryhožy italjanski vostraŭ Sardzinija znachodzicca pasiaredzinie Tyrenskaha mora. Mienavita ŭ hetych miaścinach pastuchi vyrablajuć syr kasu marcu, jaki ŭ 2009 hodzie Kniha rekordaŭ Hinesa pryznała samym niebiaśpiečnym u śviecie.
Asnova dla kasu marcu — salony syr piekaryna. U tyja raskoliny, jakija jość u hetym syry, svaje jajki adkładajuć syrnyja muchi Piophila casei. Ź ličynak vyłuplajucca aparyšy, jany prabivajucca praz syr i pieravarvajuć u pracesie białki, i ŭ vyniku piekaryna pieratvarajecca ŭ miakki kremavy syr, piša CNN.
I potym nadychodzić momant nie dla słabaniervnych: handlar syram zrazaje vierchniuju skarynku syra, jakuju amal nie kranajuć ličynki, i vyciahvaje łyžku kremavaha smakoćcia. U hety momant ličynki ŭnutry syra pačynajuć šalona źvivacca.
Niekatoryja miascovyja žychary sprabujuć źlić ličynki z syra, inšyja ž jaduć kasu marcu takim, jakim jon i stvorany — z usim.
Lohka zrazumieć, kali taki syr vyklikaje ŭ vas ahidu. Ale, kali vy zdolejecie jaje pieraadoleć, vas čakaje nasyčany i vielmi rezki smak, jaki vy budziecie adčuvać jašče na praciahu niekalkich hadzin paśla taho, jak pakaštavali kasu marcu.
Niekatoryja kažuć, što hety syr — afradyzijak. Inšyja ž ličać, što spažyvańnie takoj stravy moža być niebiaśpiečnym dla čałavieka, bo ličynki mohuć pieražyć praces pieravarvańnia, trapić žyvymi ŭ kišečnik i stvaryć u im mikrapierfaracyi, ale ž dahetul ni adzin taki vypadak nie byŭ źviazany z kasu marcu.
Žychary Sardzinii jaduć hety syr na praciahu niekalkich stahodździaŭ, ale ž zaraz jon zabaronieny da kamiercyjnaha prodažu. Kasu marcu ličać tradycyjnym praduktam Sardzinii, tamu jon abaronieny na miascovym uzroŭni. Ale ŭ Italii z 1962 hoda dziejničaje zakon, jaki zabaraniaje spažyvańnie ježy z parazitami, tamu kasu marcu ličycca pa-za zakonam. Tyja, chto jaho pradaje, mohuć atrymać štraf da 50 tysiač jeŭra, ale žycharoŭ Sardzinii zabarona ich lubimaha syra chutčej śmiašyć.
U dziesiaci inšych rehijonach Italii taksama jość svaje varyjanty syra ź ličynkami, ale tam heta chutčej marhinalnaja źjava, u toj čas jak kasu marcu — dakładna važnaja častka kultury Sardynii. Jašče staražytnyja historyki pisali pra toje, što na hetym vostravie jaduć čarviakoŭ, i zaraz tradycyja praciahvajecca.
Kamientary