Ukraina pieramahła na «Jeŭrabačańni», dziakujučy rekordnaj padtrymcy telehledačoŭ
Ukrainskija muzyki Kalush Orchestra pieramahli na «Jeŭrabačańni-2022» u italjanskim Turynie. Pa vynikach hałasavańnia žury jany byli tolki 4-ja, ale atrymali rekordnyja ŭ historyi konkursu 439 bałaŭ z 468 mahčymych ad hledačoŭ. Pryčym za Ukrainu ŭ hetaj demanstracyi salidarnaści hałasavali navat prarasijskija Sierbija i Armienija.
Chto jak hałasavaŭ?
Pa vynikach hałasavańnia žury i hledačoŭ Kalush Orchestra atrymali 631 bał. Ad hledačoŭ Ukraina atrymała 439 bałaŭ. Heta najvialikšaja kolkaść hladackich bałaŭ za ŭsiu historyju konkursu.
Hledačy ŭsich krain-udzielnic prahałasavali za pieśniu Stefania. Sama Ukraina nie mahła hałasavać za svaich pradstaŭnikoŭ.
Sierbija dała 7 bałaŭ. Malta i Paŭnočnaja Makiedonija dali pa 8 bałaŭ. Hrecyja, Armienija, Ałbanija, Šviejcaryja, Rumynija, Čarnahoryja, Charvatyja i Słavienija dali pa 10 bałaŭ. Usie astatnija 28 krain dali Kalush Orchestra pa 12 bałaŭ.
Taksama Kalush Orchestra atrymali pa 12 bałaŭ ad žury Polščy, Litvy, Małdovy, Łatvii i Rumynii. Ahułam prafiesijnaje žury dało ŭkrainskamu hurtu 192 bały. Pa hałasach žury Ukraina zajmała b tolki 4-je miesca.
Padtrymali abaroncaŭ Maryupala
U žyvym efiry «Jeŭrabačańnia» ŭkrainski hurt Kalush Orchestra zaklikaŭ śviet dapamahčy ŭratavać ukrainski Maryupal i jaho abaroncaŭ.
«Mariupol, help Azovstal right now!» — skazaŭ frontmen hurta Aleh Psiuk paśla vystupu.
Druhoje miesca dastałasia Vialikabrytanii, treciaje — Ispanii.
Heta treciaja pieramoha Ukrainy na «Jeŭrabačańni». U 2004-m hodzie pieramohu zdabyła śpiavačka Rusłana, a ŭ 2016-m — Džamała.
Siarod zatrymanych pa spravie pažaru ŭ viciebskim handlovym centry, vierahodna, jahony ŭładalnik2
Kamientary