Ilhoty dla vypusknikoŭ vajskova-patryjatyčnych kłasaŭ, metavaje raźmierkavańnie ŭ Minsk — sabrali asnoŭnuju infu pra ŭstupnuju kampaniju — 2022
U nastupnym hodzie nabuduć moc asnoŭnyja źmieny Kodeksa ab adukacyi, jakija paŭpłyvajuć u tym liku na ŭstupnuju kampaniju (u pryvatnaści, zamiest CT buduć tolki centralizavanyja ekzamieny — nie treba budzie zdavać adzin i toj ža asnoŭny pradmiet spačatku ŭ škole, a paśla jašče i ŭ farmacie testavańnia). Dla abituryjentaŭ — 2022 aktualnyja staryja praviły — ale z paraj niuansaŭ.
Lhoty dla vypusknikoŭ spartova-piedahahičnych, sielskahaspadarčych i vajenna-patryjatyčnych kłasaŭ
U hetym hodzie, jak raspavioŭ načalnik hałoŭnaha ŭpraŭleńnia prafiesijnaj adukacyi Ministerstva adukacyi Siarhiej Kaśpiarovič, pašyranaja hrupa asob, jakich mohuć zaličyć u VNU biez ustupnych ekzamienaŭ: takaja surjoznaja lhota budzie dastupnaja vypusknikam spartova-piedahahičnych kłasaŭ. Ëść adno «ale»: adznaki ŭ atestacie — nie nižejšyja za siem bałaŭ, a dla profilnych pradmietaŭ — nie mienš za vosiem. Plus rekamiendacyi ad piedahohaŭ na rukach.
Na ŭmovach metavaj padrychtoŭki prymuć vypusknikoŭ, što abiaruć sielskahaspadarčyja kirunki, jakija vyznačyć Ministerstva sielskaj haspadarki i charčavańnia.
Darečy, kali raniej metaviki mahli zaklučać damovy tolki z pradpryjemstvami ź sielskaj miascovaści ci nievialikich nasielenych punktaŭ, to ciapier možna i z arhanizacyjami sa stalicy. I paśla atrymańnia dypłomu raźmierkavacca tudy na piać hod.
Vypusknikam, jakija vučylisia ŭ kłasach vajenna-patryjatyčnaj skiravanaści dy zasvoili fakultatyvy «Juny pamiežnik», «Hatovy radzimie słužyć», taksama abiacajuć bonusy pry pastupleńni (viadoma, na profilnyja vajennyja fakultety). Takim abituryjentam treba budzie zdavać ustupnyja ekzamieny, ale, kali jany atrymajuć bały, nižejšyja čym tyja, chto pastupaje na ahulnych umovach, ich usio adno mohuć pryniać.
Hramadzianie RF mohuć pastupać u Biełaruś paśla ekzamienu ŭ svajoj krainie
Kali śpiecyjalnaść «zapatrabavanaja ekanomikaj», to rasijanie mohuć pastupić na jaje płatna, zdaŭšy adziny dziaržaŭny ekzamien u siabie na radzimie. Praŭda, jość limit: abituryjenty mohuć zaniać nie bolš za 20% miescaŭ, vyznačanych płanam pryjomu dla płatnikaŭ.
Minimalny paroh bałaŭ — ad 10 i vyšej
Dla taho, kab pretendavać na ŭdzieł u konkursie, važna nabrać minimalnuju kolkaść bałaŭ:
- 10 — dla biełaruskaj i ruskaj movy (vyklučeńnie: fiłołahi, u ich paroh — 25);
- 20 — pa matematycy, fizicy, chimii i bijałohii;
- 25 — pa historyi, hramadaznaŭstvie, hieahrafii i zamiežnych movach.
Kali matematyka, fizika, chimija, bijałohija źjaŭlajucca druhim profilnym pradmietam, dastatkova nabrać ad 10 bałaŭ. A kali druhi profilny — historyja, hramadaznaŭstva, hieahrafija, zamiežnyja movy — ad 15.
CT pa biełaruskaj movie budzie iści adzin dzień, pa ruskaj — dva
Rehistracyja na centralizavanaje testavańnie ŭžo pačałosia i praciahniecca da 1 červienia.
Zarehistravacca možna naŭprost na sajcie Respublikanskaha instytuta kantrolu viedaŭ. Sami vyprabavańni startujuć 14 červienia ź biełaruskaj movy. 16 i 17 projdzie CT pa ruskaj movie. Dva dni budzie iści pravierka viedaŭ i pa matematycy — 21 i 22 červienia. Samym apošnim z asnoŭnych budzie testavańnie pa suśvietnaj historyi — 6 lipienia. Siertyfikaty z vynikami pačnuć vydavać z 14 lipienia.
Usiaho ŭ hetym hodzie płanujecca pryniać 27,7 tysiačy abituryjentaŭ na biudžetnuju formu navučańnia i 25,8 na płatnuju. Tolki ŭ BDU, naprykład, čakajuć 2100 byłych školnikaŭ na biudžet i 1571 na płatnaje navučańnie (biez uliku vajskovaha fakulteta, płan pryjomu kudy zaćviardžajecca asobna).
Najbolš miescaŭ praduhledžana na technična-technałahičny profil, śpiecyjalnaści sadova-parkavaha budavańnia, sielskaj i lasnoj haspadarki, achovy zdaroŭja i piedahohiki.
Jak paviedamlaje Ministerstva adukacyi, padača dakumientaŭ pačniecca 18 lipienia i praciahniecca da 24 lipienia, na płatnuju formu navučańnia — da 8 žniŭnia (unutranyja ekzamieny projduć z 25 lipienia pa 2 žniŭnia). Zaličeńnie na biudžet skončycca 4 žniŭnia, a na płatnaje adździaleńnie — 10-ha.
Dla siarednich śpiecyjalnych navučalnych ustanoŭ daty svaje: ustupnaja kampanija dla tych, chto vyrašyŭ atrymać siaredniuju adukacyju, projdzie z 20 lipienia pa 18 žniŭnia. A na ŭzrovień prafiesijna-techničnaj adukacyi — z 15 červienia pa 25 žniŭnia.
Kamientary