Dačka Uładzimira Pucina Kaciaryna Cichanava stvaryła siamju z mastackim kiraŭnikom Bavarskaha dziaržaŭnaha baleta Iharam Zialenskim i apošnija hady žyła ź im na dźvie krainy — u Rasii i ŭ Niamieččynie, pišuć «Važnyja historyi» sa spasyłkaj na dakumienty, jakija akazalisia ŭ ich rasparadžeńni, a taksama krynicu ŭ Bavarskim balecie.
Adzin z dakumientaŭ, na jakija abapirajucca «Važnyja historyi», — heta śpis pasažyraŭ čartarnaha rejsa Miunchien — Maskva 9 śniežnia 2019 hoda. Jak vynikaje z publikacyi, hetym rejsam lacieli Kaciaryna Cichanava, Ihar Zialenski, ich dvuchhadovaja dačka, a taksama dźvie niani, nastaŭnica fartepijana i troje supracoŭnikaŭ Słužby biaśpieki prezidenta Rasii.
U rasparadžeńni žurnalistaŭ taksama akazalisia danyja z elektronnaj pošty supracoŭnika Słužby biaśpieki prezidenta, jaki, jak śćviardžajecca, źjaŭlajecca asabistym achoŭnikam Kaciaryny Cichanavaj. Siarod hetych dakumientaŭ jość danyja pašpartoŭ Cichanavaj, Zialenskaha i ich dački.
Narešcie, krynica ŭ Bavarskim balecie zajaviła vydańniu Der Spiegel, ź jakim «Važnyja historyi» supracoŭničali ŭ pracy nad materyjałam, što Ihar Zialenski — «chutčej za ŭsio, partnior dački Pucina».
52-hadovy Ihar Zialenski — paśpiachovy rasijski artyst baleta, byŭ zaprošanym salistam mnohich zachodnich teatraŭ. Z 2016 hoda pa krasavik 2022-ha ŭznačalvaŭ Bavarski dziaržaŭny balet. Jon taksama ŭvachodzić u Naziralnuju radu fondu «Nacyjanalnaja kulturnaja spadčyna», jakaja pavinna była pa prapanovie Uładzimira Pucina budavać kulturna-adukacyjnyja kompleksy ŭ roznych rehijonach Rasii i staŭ viadomy z-za maštabnych skaračeńniaŭ supracoŭnikaŭ u 2020 hodzie, piša Meduza.io.
Aleksijevič narešcie vykazałasia pra Izrail i Paleścinu45
Kamientary