Cichanoŭskaja zaklikała ES uvieści biaźvizavy režym dla biełarusaŭ i «płan Maršała» paśla Łukašenki
Lidarka biełaruskaj apazicyi Śviatłana Cichanoŭskaja vystupiła pierad kiraŭnikami dziaržaŭ-udzielnic ES na samicie Jeŭrapiejskaj narodnaj partyi.
Śviatłana Cichanoŭskaja 31 maja i 1 červienia ŭziała ŭdzieł u Kanhresie Jeŭrapiejskaj narodnaj partyi, adnoj z samych bujnych palityčnych arhanizacyj u ES, paviedamlaje jaje pres-słužba.
Čarhovy kanhres prachodzić u Raterdamie. 31 maja tam prajšoŭ kruhły stoł, pryśviečany Biełarusi. Na kanhresie prysutničajuć kiraŭniki ŭradaŭ i dziaržaŭ ES, jakija naležać da hetaj partyi.
Śviatłana Cichanoŭskaja zaklikała Jeŭrasajuz «raździalać biełaruski narod i režym Łukašenki, adznačyła dyskryminacyju, jakuju zaznajuć biełarusy (i studenty ŭ pryvatnaści) za svaju nacyjanalnaść.
«Zamiest hetaha lepš uvieści biaźvizavy režym dla biełarusaŭ, — prapanavała Cichanoŭskaja, — a pamahatych režymu trymać pad sankcyjami».
Cichanoŭskaja taksama zaklikała ŭmacavać supracoŭnictva pamiž ES i demakratyčnymi siłami Biełarusi, a taksama paskoryć raspracoŭku i pryniaćcie «płana Maršała» dla Biełarusi, jaki dapamoh by ŭ praviadzieńni chutkich reformaŭ paśla sychodu Łukašenki. «Dla biełarusaŭ heta było b mocnym znakam taho, što ich baraćba nie daremnaja», — skazała Cichanoŭskaja.
Udzieł u Kanhresie prymali prezident Rumynii Kłaŭs Jahanis, kancler Aŭstryi Karł Niehamier, staršynia Jeŭrakamisii Ursuła fon der Lajen, prezident Kipra Nikas Anastasijadys, premjer Charvatyi Andrej Plenkavič, usiaho — kala 50 lidaraŭ uradaŭ i najbujniejšych jeŭrapiejskich partyj.
Jeŭrapiejskaja narodnaja partyja (faktyčna heta kaalicyja partyj pravacentrysckaha śpiektru) ciaham dvuch apošnich dziesiacihodździaŭ maje ŭ Jeŭraparłamiencie najbolšuju frakcyju.
Ciapier čytajuć
Łukašenka pieraabuŭsia: Pozna ŭviečary Minsk pahruzili ŭ ciemru. Navošta? Ja ž ad vas hetaha nie patrabavaŭ20
Kamientary