Śledčy kamitet raskazaŭ, jak viadziecca kryminalnaja sprava suprać Nexta i inšych «terarystaŭ»
Načalnik upraŭleńnia Śledčaha kamiteta pa horadzie Minsku Siarhiej Pasko raskazaŭ BiełTA, jak viadziecca rasśledavańnie «kryminalnaj spravy ab masavych biesparadkach, jakija mieli miesca ŭ Miensku ŭ 2020 hodzie». Z ahulnaha kantekstu vidać, što havorka idzie ŭ asnoŭnym pra papularny telehram-kanał Nexta, advolna abvieščany karnymi orhanami spačatku «ekstremisckim farmavańniem», a paśla «terarystyčnaj arhanizacyjaj». Choć i ŭsie inšyja krytyčna nastrojenyja adnosna režymu Łukašenki resursy fantazijaj śledčych splecienyja ŭ adnu sietku.
Pavodle Pasko, «dakazana, što padrychtoŭka da ździajśnieńnia złačynstvaŭ, ich arhanizacyja i niepasrednaje vykanańnie, ažyćciaŭlalisia kankretnymi hrupami hramadzian (farmiravańniami) z dapamohaj stvoranych i kiravanych imi resursaŭ sietki Internet».
U Internecie, pavodle funkcyjaniera Śledčaha kamiteta, i jość korań prablem, ź jakimi sutyknuŭsia ciapierašni palityčny režym Biełarusi: «Mienavita internet-resursy źjavilisia asnoŭnymi krynicami maštabnaha raspaŭsiudžvańnia na terytoryi Biełarusi infarmacyi, jakaja navučała i padbuchtorvała hramadzian da ździajśnieńnia złačynstvaŭ pa matyvach palityčnaj i sacyjalnaj varožaści i varožaści. U publikacyjach ŭtrymlivalisia ekstremisckija materyjały, napoŭnienyja zaklikami da dziejańniaŭ, nakiravanym na pryčynieńnie škody nacyjanalnaj biaśpiecy Biełarusi, i supraćpraŭnym pavodzinam».
«Infarmacyjnaja napampoŭka ludziej», jak śćviardžaje Pasko, «zaklučałasia ŭ stvareńni i raźmiaščeńni ekstremisckich materyjałaŭ praz bolš čym 80 kiravanych jaho členami internet-resursaŭ. Była stvorana adzinaja sistema dublavańnia, pieradačy i kamientavanaj padtrymki adpaviednaj infarmacyi».
Udzielnikaŭ adnoj tolki nibyta «terarystyčnaj arhanizacyi» vyjaŭlena, pavodle słoŭ funkcyjaniera SK, bolš za 70, «niahledziačy na pryniatyja imi miery kanśpiracyi, pryjomy ŭtojvańnia i źniščeńnia elektronnych śladoŭ svajoj złačynnaj dziejnaści».
Zusim niadaŭna, maŭlaŭ, «śledčym upraŭleńniem USK pa horadzie Minsku va ŭzajemadziejańni z HUBAZiK MUS zatrymanyja administratary, jakija adkazvali za infarmacyjnaje ŭździejańnie na žycharoŭ Homielskaj, Viciebskaj i Bresckaj vobłaści, a taksama za kansalidacyju na ich terytoryi radykalnaha ruchu».
Uvohule ž «tolki ŭ mai biahučaha hoda minskimi śledčymi nakiravanyja ŭ sudy iskavyja zajavy ab pryznańni infarmacyjnaj pradukcyi ekstremisckimi materyjałami bolš za 55 internet-resursaŭ».
Taksama «śledčymi bieśpierapynna ŭstanaŭlivajucca kankretnyja asoby, jakija majuć dačynieńnie da stvareńnia i administravańnia takich resursaŭ».
U dziejańniach apanientaŭ režymu Śledčym kamitetam uhledžvajucca «prykmiety cełaha šerahu naŭmysnych złačynstvaŭ» pa bolš čym 10 ciažkich artykułach Kryminalnaha kodeksa.
Nahadajem, što pry hetym zabojstvy Juryja Zacharanki, Viktara Hančara, Ramana Bandarenki, jak i falsifikacyja vybaraŭ zastajucca nierasśledavanymi.
Pamiatajecie «paśpiachovuju miljanierku» Zareckuju? Vyhladaje, što jaje kampanija — usio19
Kamientary