Łukašenka zajaviŭ, što moža ŭdaryć pa Kijevie, nie zachodziačy va Ukrainu. Ale ci maje Biełaruś takuju zbroju?
Na sustrečy ŭ Babrujsku Łukašenka zajaviŭ: kali ŭkraincy ŭdarać pa Mazyry, to «my ŭdarym pa Kijevie, nie zachodziačy va Ukrainu». Ale ci zmohuć biełaruskija vajskoŭcy heta zrabić? Majuć takuju zbroju? Łukašenka hetaha choča ci baicca? Spytali ŭ vajskovaha ekśpierta Alaksandra Alesina.
«Tearetyčna Biełaruś moža ŭdaryć pa Kijevie i svajoj zbrojaj: jość dyvizijon apieratyŭna-taktyčnych kompleksaŭ «Pałanez». Heta sistema moža stralać reaktyŭnymi snaradami na dalečyniu kala 300 kiłamietraŭ. Taksama moža stralać apieratyŭna-taktyčnaj rakietaj, ale ž vyprabavańni takoj rakiety jašče amal nie pravodzilisia.
Kali havaryć pra reaktyŭnyja snarady, tam sistema takaja: kali bolš paliva, tady mienšaja bojehałoŭka. Kali bolšaja bojehałoŭka, mienš paliva, adpaviedna, rakieta lacić na mienšuju adlehłaść. Heta sistema dla kropkavych udaraŭ, — tłumačyć Alesin. —
Tamu reaktyŭnyja snarady nie naniasuć asablivaj škody takomu vialikamu horadu, jak Kijeŭ. Ale psichałahičny efiekt i rezanans budzie vialiki».
A kolki ŭ krainie tych «Pałanezaŭ»?
«U Biełarusi, jak ja razumieju, siońnia adzin dyvizijon «Pałanez».
Artyleryjskaja batareja — heta try ŭstanoŭki, u dyvizijonie try batarei. Byvaje i bolš, ale, miarkuju, prykładna ź dziasiatak ustanovak. Kab nanieści značnyja paškodžańni Kijevu takoj kolkaści ŭstanovak niedastatkova. Mahčymyja razbureńni asobnych pradpryjemstvaŭ, budynkaŭ, ale nie bolš za toje», — kaža Alesin.
Što tyčycca rakiet «Točka U» albo rakietnych sistem załpavaha ahniu «Śmierč» ci «Urahan», jakija taksama maje Biełaruś, to jany laciać na mienšuju adlehłaść. «Točka U» pralataje trochi bolš za 100 kiłamietraŭ, snarady RSZA jašče mienš. Ź biełaruskaj terytoryi da Kijeva jany nie dastanuć, adznačaje ekśpiert.
Jon razvažaje:
«Mahčyma, Łukašenka mieŭ na ŭvazie rasijskija kompleksy «Iskander», jakija znachodziacca na terytoryi Biełarusi. «Iskander» maje dalečyniu da 500 kiłamietraŭ. Łukašenka choča kupić dla Biełarusi taksama «Iskander», ale tam budzie viersija z dalečynioj da 300 kiłamietraŭ — pa režymie kantrolu za rakietnym uzbrajeńniem bolš mahutnuju viersiju Rasija nie maje prava pradać».
Na dumku Alesina, niehledziačy na pahroźlivyja zajavy, vajavać Łukašenka zaraz zusim nie choča:
«Ustupać u kanflikt siońnia — apošniaje, čaho b chacieŭ Łukašenka. Heta budzie patrabavać vialikich finansavych zatrat. Mabilizavać vojska, nazapasić resursy — heta hrošy, jakich u nas niama.
Nu i pryjdziecca pierakanać biełarusaŭ, što vajna z Ukrainaj nieabchodnaja. Heta budzie ciažka. Jak by Łukašenka ni kazaŭ pra mahčymaść pravakacyj z boku Ukrainy, biełaruskaje nasielnictva ŭ masie nie vieryć u vialikuju vajnu Biełarusi i Ukrainy.
Tamu, miarkuju, słovy Łukašenki — papiaredžańnie. Amierykanskaja, brytanskaja raźviedka kazali, što nie bačać padrychtoŭki Biełarusi da ŭstupleńnia ŭ vajnu.
Ale Łukašenku ciapier nie treba vajavać jašče tamu, što jon złaviŭ viecier u vietraź. Rasija vydzielić 1,5 miljarda dalaraŭ na madernizacyju biełaruskich pradpryjemstvaŭ, jakija buduć vypuskać pradukcyju dla Rasii. Heta elektronnyja schiemy, aptyčnaje abstalavańnie, ciahačy. Rasii zaraz budzie treba ŭsio, što raniej pastaŭlaŭ Zachad, ad aŭtobusaŭ da traktaroŭ. I biełaruskija tavary, ad jakich raniej Rasija admaŭlałasia, zaraz patokam pojduć u Rasiju. U takoj situacyi Łukašenka mienš za ŭsio choča vajavać».
Ciapier čytajuć
Unučki Łukašenki paśpiachova zamacavalisia ŭ Rasii4
Kamientary