«Zapłaciŭ hrošy — dali infarmacyju». Jak pracujuć kampanii, jakija dapamahajuć pryzyŭnikam
Dniami siłaviki apublikavali videa z zatrymanymi kiraŭnikami resursaŭ, jakija dapamahali pryzyŭnikam, i namiaknuli, što ludziej, jakija tudy źviartalisia, čakajuć niepryjemnaści. «Naša Niva» parazmaŭlała z čałaviekam, jaki źviartaŭsia ŭ «Pryzyŭnik.baj» pa dapamohu i z byłym supracoŭnikam firmy i daviedałasia, jakija kansultacyi jany akazvali i kolki kaštavali pasłuhi.
Adzin z byłych supracoŭnikaŭ «Pryzyŭnik.baj» tłumačyć: takija kampanii dapamohi junakam zajmajucca prosta kansultavańniem.
«Tam siadziać ludzi, jakija viedajuć zakanadaŭstva, miedycynskija aśpiekty (tyja zachvorvańni, ź jakimi nie biaruć u vojska). Dajuć parady, na jakija abśledavańni schadzić, na jakija momanty ŭ zakanadaŭstvie źviarnuć uvahu.
Naprykład, kali čałaviek zajmaŭsia niejkim sportam, jamu rajać abśledvać peŭnuju častku cieła abo orhany. Ci kali ŭ čałavieka baćki majuć invalidnaść, jamu raskazvajuć, ci mohuć jaho zabrać u vojska. Faktyčna ludzi płaciać za toje, što im dajuć prostyja adkazy pra toje, za što možna začapicca. Tut niama nijakich harantyj, tamu što heta prosta kansultatyŭnyja pasłuhi. Zapłaciŭ hrošy — dali infarmacyju.
Kali ŭ čałavieka ŭsie dobra za zdaroŭjem, niama jurydyčnych padstaŭ nie słužyć u vojsku, to zrazumieła, što dapamahčy z vydačaj niejkaj daviedki ab inšym niemahčyma».
Siłaviki apublikavali videa z zatrymanymi kiraŭnikami resursaŭ, jakija dapamahali pryzyŭnikam. Ich byłych klijentaŭ čakajuć prablemy
Firma pracavała kala 5 hod. Kali «Pryzyŭnik.baj» tolki zapuskaŭsia, pasłuhi ŭ siarednim kaštavali tam 300-400 dalaraŭ.
«Hrošy viartali, kali čałavieka ŭsio ž pryzyvali ŭ vojska.
Raniej było niekalki chvalaŭ, kali da pryzoŭnikoŭ prychodzili. Siłavyja struktury i tady cikavilisia imi. Ale zaraz vidavočna heta ŭsio zdaryłasia na fonie vajskovaj aktyŭnaści ŭ Biełarusi. Sprabujuć jak maha bolš ludziej adpravić u vojska», — miarkuje surazmoŭca.
Alaksiej (imia źmieniena) karystaŭsia pasłuhami kampanii «Pryzyŭnik.baj» u minułym hodzie. Vojska nie ŭvachodziła ŭ płany chłopca, jon nie chacieŭ «pravodzić lepšyja hady svajho žyćcia ŭ armii».
«Dumaŭ, što ŭ mianie jość šmat roznych zachvorvańniaŭ, jakija sa mnoj pa žyćci daŭno: skalijoz, prablemy sa zrokam, alerhija. Mama jašče ŭ dziacinstvie kazała, što z hetym usim mianie ŭ vojska nie voźmuć. Kali pryjšoŭ čas vyrašać hetaje pytańnie, ja davieryŭsia ludziam, jakija zajmajucca supravadžeńniem takich pracesaŭ, — raskazvaje jon.
U firmie jamu dali ankietu na čatyry staronki, u jakoj treba było paznačyć, što ŭ jaho baleła, jakija dyjahnazy jość.
«Adpraviŭ jaje im, jany dastatkova doŭha i drenna jaje apracoŭvali, — kaža chłopiec. — Pieraadrasoŭvali mianie ad adnaho čałavieka da druhoha. Zapłaciŭ 950 rubloŭ za pasłuhi, dosyć adčuvalnaja suma.
Paśla taho, jak jany vyvučyli maju ankietu, da mianie prystavili čałavieka, jaki zajmaŭsia kankretna maimi pytańniami. Paśla hetaha sprava pajšła lepiej.
U samoj ankiecie byli, naprykład, takija pytańni: «adznačcie na malunku vobłaści, dzie ŭ vas balić śpina». Prosta šukali, za što možna začapicca. Sychodziačy z adkazaŭ na pytańni, jany mnie pačali pryznačać daktaroŭ, jakich mnie treba było prajści. Zdajecca, u śpisie było 9 śpiecyjalistaŭ. Navat upisali tudy hłytańnie zonda, chacia ŭ ankiecie ja paznačaŭ, što žyvot u mianie nie balić».
Strachoŭki ŭ Alaksieja nie było, tamu za kansultacyi daktaroŭ i abśledavańni płaciŭ jon sam. Sama kampanija padabrała aptymalnyja miedycynskija centry (u asnoŭnym pryvatnyja), u jakich u ich byli pravieranyja daktary, što niepraduziata aceniać situacyju i zmohuć dać ekśpiertnaje zaklučeńnie.
«Kali ja chadziŭ pa daktarach, u mianie pytalisia, ad «Pryzyŭnik.baj» ja ci nie. Zapisvali jany mianie sami. Paśla pryjomu ja fatahrafavaŭ im zaklučeńnie, dasyłali mnie kamientar. Ale i bieź ich kamientara było ŭsio zrazumieła.
Nichto z daktaroŭ ničoha nie znajšoŭ, ništo nie źjaŭlałasia padstavaj dla taho, kab nie stać pryzyŭnym.
Ad hłytańnia zonda ja, praŭda, admoviŭsia, chacia mnie vielmi prapanoŭvali. Viedaŭ, što z žyvatom u mianie sapraŭdy ŭsio narmalna.
Za ŭsie hetyja kansultacyi daktaroŭ, abśledavańni ja zapłaciŭ jašče kala 600-700 rubloŭ», — padličvaje Alaksiej.
Pa słovach chłopca, paśla ŭ firmy jamu prapanavali prosta čakać pozvu. Kali jana budzie nie pa formie — možna abskardzić.
«Ja zrazumieŭ, što raźličvać na ich asabliva sensu niama. Budzie ŭ mianie, moža, adterminoŭka na adzin pryzyŭ, i što? Heta ničoha nie mianiaje», — kaža jon.
Tady Alaksiej źjechaŭ ź Biełarusi va Ukrainu. Nie tolki z-za nabližajučahasia pryzyvu, ale i z-za palityčnaj situacyi ŭ krainie.
Jechaŭ jon praz Rasiju. Tam jaho zatrymaŭ FSB. Chłopcu paviedamili, što z Rasii jon nievyjazny.
«Usie pytańni skazali zadavać MUS Biełarusi. Ja składanym i doŭhim šlacham vyjechaŭ z Rasii.
Niadaŭna daviedaŭsia, što znachodžusia ŭ mižnarodnym vyšuku pa zapycie Biełarusi. Z-za taho, što ŭciok ad vojska. Za ŭchileńnie mohuć vydać, darečy. Padazraju, što heta nie asnoŭnaja pryčyna, ale heta toje, što napisana ŭ dakumientach. A daviedaŭsia ja pra heta, kali atrymlivaŭ daviedku ab niesudzimaści.
Potym hetaja kantora mnie pisała, pytalisia, jak spravy. Ja adkazaŭ, što vyjechaŭ i viartacca nie planuju. Hrošy jany mnie nijakija nie viartali — pieršapačatkova nie davali harantyj. U damovie było napisana, što kali ničoha nie znojduć z zachvorvańniaŭ, jany mohuć viarnuć 20 adsotkaŭ ad koštu ich pasłuh paśla taho, jak mianie pryzavuć. Heta kala 180 rubloŭ.
Nakolki viedaju, usie astatnija padobnyja kampanii taksama tak pracujuć. Prosta «Pryzyŭnik.baj» — adna z samych viadomych. Pa fakcie ja im płaciŭ hrošy za toje, kab jany nakiroŭvali mianie da daktaroŭ, sychodziačy z maich skarhaŭ», — dzielicca chłopiec.
Jon dadaje, što praca firmy vyhladała całkam lehalna — u ich byŭ vialiki ofis u centry horada, z Alaksiejem jany zaklučali damovu na akazańnie kansultacyjnych pasłuh.
Pra toje, što jany aficyjna pracujuć, raskazvali raniej i sami kampanii. Tak, «Pryzyŭnik.baj», pa słovach firmy, praviarali pravaachoŭniki na pradmiet, ci nie ŭdzielničajuć jany ŭ karupcyjnych schiemach i zmovach ź miedcentrami ci vajenkamatami. Takich faktaŭ nie znachodzili.
Kamientary