Čerhi lehkavikoŭ na miažy z Polščaj praciahvajuć raści. Va ŭsim vinavatyja palaki?
Tym časam, jak čerhi hruzavikoŭ na hranicach Biełarusi i ES amal źnikli, na lehkavym kirunku nazirajecca advarotnaja situacyja. Pa infarmacyi Dziaržpahrankamiteta, tolki za minuły tydzień kolkaść lehkavoha transpartu, jaki čakaje ŭjezdu ŭ ES, pavialičyłasia na 71%. Asabliva składanaja situacyja na miežach z Polščaj. «Naša Niva» raźbirałasia, čamu tak adbyvajecca.
Apošnim časam achvotnym źjeździć u Polšču ŭ pramym sensie davodzicca sutkami stajać u čarzie. Biełaruskija pamiežniki vinavaciać u hetym svaich zamiežnych kaleh, maŭlaŭ, tyja nie vykonvajuć abaviazki i prapuskajuć praź miažu mienš transpartu, čym pavinny heta rabić.
Kali pahladzieć na spravazdaču Dziaržpahrankamiteta, to vyhladaje, što prynamsi na polskim kirunku tak jano i adbyvajecca.
U pahraničnym punkcie «Bierastavica-Babroŭniki» polski bok aformiŭ 57% aŭtamabilaŭ ad normy, a ŭ «Brest-Ciarespal» — usiaho 34%
U toj ža čas litoŭski bok, miarkujučy pa hrafikach, nie tolki vykonvaje svaje abaviazki, ale i značna pieravyšaje hetyja pakazčyki va ŭsich punktach propusku za vyklučeńniem «Kamienny Łoh — Miadzininkaj».
Adnak nievykanańnie polskim bokam damoŭlenaściaŭ pa kolkaści aformlenaha transpartu — tolki adna z pryčyn, čamu ludzi vymušanyja dziasiatki hadzin pravodzić u čerhach.
Pałova pahranpierachodaŭ zakrytaja
Sprava ŭ tym, što da pandemii COVID-19 na biełaruska-polskaj miažy funkcyjanavali šeść aŭtadarožnych punktaŭ propusku, ciapier takich zastałosia tolki try. Adzin ź ich praduhledžany vyklučna dla ruchu hruzavoha transpartu. Praz heta vynikaje, što zamiest raniejšych piaci punktaŭ dla lehkavikoŭ zastajucca dasiažnymi tolki dva: «Brest-Ciarespal» i «Bierastavica-Babroŭniki». Ahulnaja prapusknaja zdolnaść ich składaje 2600 lehkavikoŭ u sutki.
Punkty propusku «Piasčatka-Pałoŭcy» i «Damačava-Kukuryki» zastajucca zakrytymi ŭžo bolš jak dva hady. Ich ahulnaja prapusknaja zdolnaść składała 1300 lehkavikoŭ u sutki.
Spravakavany biełaruskimi ŭładami kryzis z uciekačami i situacyja, jakaja skłałasia ŭ mižnarodnym multyfunkcyjanalnym punkcie propusku «Bruzhi», pryviała da taho, što polski bok pryniaŭ rašeńnie spynić pracu hetaha pamiežnaha punktu z 21 listapada 2021 hoda. Prapusknaja zdolnaść «Bruzhoŭ» składała 1600 lehkavych i 580 hruzavych aŭto ŭ sutki.
Takim čynam, ahulnaja prapusknaja zdolnaść punktaŭ propusku na biełaruska-polskaj hranicy skaraciłasia z 5500 mašyn u sutki da 2600.
Kali nie pahłyblacca ŭ sutnaść prablemy, možna pryjści da vysnovy, što ŭ joj vinavaty vyklučna polski bok. Pakolki farmalna ŭsie try punkty propusku byli zakrytyja pa inicyjatyvie Polščy. Kavidnyja ž abmiežavańni ŭžo daŭno źniatyja, dy navat i łahier uciekačoŭ u «Bruzhach» likvidavali jašče 22 sakavika. Ale da źniaćcia kavidnych abmiežavańniaŭ i zakryćcia łahiera dla ŭciekačoŭ Biełaruś paśpieła stać suahresaram u vajnie z Ukrainaj.
Pa hetaj i inšych pryčynach napružanaść pamiž aficyjnymi Minskam i Varšavaj tolki praciahvaje raści, tamu naŭrad ci varta raźličvać na toje, što polski bok pojdzie na adkryćcio raniej zakrytych pahraničnych punktaŭ.
Čamu tak šmat ludziej jedzie ŭ Polšču?
Mnohija z tych, chto ciapier staić u šmatkiłamietrovych «kalejkach» u Polšču, — ludzi, dla jakich pajezdki praź miažu nie što inšaje, jak praca.
«Kaniečnie, jość tyja, chto jedzie tudy z turystyčnymi metami abo naviedać svajakoŭ i siabroŭ ci naohuł jedzie dalej na Zachad, ale vialikaja častka — heta «čaŭnaki» i kantrabandysty, jakija zarablajuć na hetym hrošy. Tamu pakul u krainie niama hodnych zarobkaŭ, a pajezdki ŭ Polšču mohuć prynosić vialikija pa biełaruskich mierkach hrošy, čerhi nikudy nie źniknuć», — miarkuje surazmoŭca.
Apošnim časam źjavilisia i pradprymalnyja hramadzianie, jakija zarablajuć nie na pieravozie kantrabandy praź miažu, a na samich čerhach. Jak paviedamlajuć u ŚMI, u zaležnaści ad addalenaści košt miesca ŭ čarzie pradajecca pa cenach ad 50 rubloŭ da 100 jeŭra.
Miesca ŭ čarzie možna zabraniravać taksama anłajn praź dziaržaŭny servis. Košt pasłuhi — 1 bazavaja (32 rubli). Ale vychapić volnaje miesca niaprosta. Tak, naprykład, pa stanie na 16 hadzin 4 žniŭnia ŭ punkcie propusku «Bierastavica» ŭsie miescy raspradadzienyja na tydzień napierad. U punkcie propusku «Brest» na toj čas zastavałasia kala dziasiatka broniaŭ na 11 žniŭnia. Usie raniejšyja daty i hadziny ŭžo vykuplenyja.
«Naša Niva» — bastyjon biełaruščyny
PADTRYMAĆČytajcie taksama:
Na biełaruskich miežach amal źnikli čerhi z hruzavikoŭ. Čamu tak adbyvajecca?
Miljony dalaraŭ štomiesiac. Kolki Biełaruś zarablaje na miažy
Na mahilnym pomniku Makieja vybili častku šyfru kalinoŭcaŭ FOTA19
Kamientary