U vaŭkavyskaha pradprymalnika Uładzimira Asipienki apisali majomaść. Pra heta BiełaPAN paviedamiŭ pravaabaronca Aleh Vołčak.
Pavodle jaho słoŭ, 17 vieraśnia ŭ siamji Asipienki śledčyja MUS apisali majomaść. Dla ažyćciaŭleńnia hetaj farmalnaj pracedury ŭ Vaŭkavysk pryjechaŭ kiraŭnik śledčaj hrupy pa spravie Mikałaja Aŭtuchoviča, Uładzimira Asipienki i Juryja Lavonava, načalnik upraŭleńnia pa rasśledavańni asabliva ciažkich złačynstvaŭ minułych hadoŭ hałoŭnaha ŭpraŭleńnia pa baraćbie z arhanizavanaj złačynnaściu Ministerstva ŭnutranych spraŭ Biełarusi Viktar Kłačko.
«Heta standartnaja pracedura — nakładańnie aryštu na majomaść. Miarkujučy pa ŭsim, śledstva padychodzić da kanca.
Ja liču, što heta adna z zaviaršalnych stadyj. Kali b spyniali kryminalnuju spravu — aryšt na majomaść nie nakładvali b. Heta sihnał, što chutka budzie aznajamleńnie z materyjałami spravy i jaho nakirujuć na acenku prakuroru, potym u sud»,— skazaŭ Vołčak.
Mikałaj Aŭtuchovič prachodzić ciapier pa adnoj spravie z Uładzimiram Asipienkam. Advakat Aŭtuchoviča — Pavieł Sapiełka — paviedamiŭ BiełaPAN, što nijakich novych źviestak ab prasoŭvańni spravy jaho padabaronnaha jon nie maje, i nahadaŭ, što jon znachodzicca pad padpiskaj ab nievydavańni tajny śledstva.
«Najbližejšym časam ja sustrenusia z maim padabaronnym», — skazaŭ advakat.
***
Pradprymalniki Mikałaj Aŭtuchovič, Juryj Lavonaŭ i Uładzimir Asipienka byli zatrymanyja ŭ Vaŭkavysku (Hrodzienskaja vobłaść) 8 lutaha i dastaŭlenyja ŭ minski śledčy izalatar №1.18 lutaha im było pradjaŭlena abvinavačańnie pa art. 218 Kryminalnaha kodeksa (naŭmysnaje źniščeńnie albo paškodžańnie majomaści). 23 červienia ŭ dačynieńni da Aŭtuchoviča i «inšych asobaŭ» (farmuloŭka pres‑słužby MUS) była raspačata sprava pa art. 359 KK (terarystyčny akt) u vyhladzie padrychtoŭki (art. 13).
Z 16 krasavika pa 16 lipienia Aŭtuchovič pravodziŭ haładoŭku, patrabujučy ŭ samyja ścisłyja terminy abo pieradać spravu ŭ sud, abo źmianić usim padślednym mieru strymańnia z utrymańnia pad vartaj na padpisku ab niavyjeździe.
8 žniŭnia Lavonava vyzvalili ź SIZA, źmianiŭšy mieru strymańnia na padpisku ab niavyjeździe. Asipienka i Aŭtuchovič zastajucca pad vartaj.
Kamientary