Ihar Łosik upieršyniu za čas znachodžańnia ŭ kałonii stelefanavaŭsia z žonkaj
Apošnimi navinami pra muža z Intex-press padzialiłasia Darja Łosik.
Pa słovach Darji, joj užo dvojčy ŭdałosia pahavaryć ź Iharam pa telefonie. Stelefanoŭvacca možna było b i čaściej, ale pakolki Ihar «schilny da ekstremizmu», jaho ŭ hetym abmiažoŭvajuć.
— Adzin zvanok na dva tydni praciahłaściu kala piaci chvilin, — raspaviadaje pra abmiežavańni Darja Łosik.
Tak ci inakš, kaža dziaŭčyna, dziakujučy hetym zvankam, jana moža chutka niešta spytać u muža, daviedacca, jak jaho zdaroŭje, nastroj i abstanoŭka ŭ cełym. U apošniaj telefonnaj razmovie, u pryvatnaści, Ihar, jaki pakutuje na arteryjalnuju hipiertenziju, supakoiŭ jaje, skazaŭšy, što ŭsie nieabchodnyja miedycynskija preparaty jamu vydajuć rehularna.
— Vielmi chvalujusia za zdaroŭje muža, bo ciapier takaja haračynia, — tłumačyć pryčynu svajoj tryvohi Darja.
Listy ad Ihara, pa słovach dziaŭčyny, dachodziać rehularna: try-čatyry na tydzień. Jak i raniej, listy dachodziać tolki ad svajakoŭ.
Darja kaža, što Ihar imkniecca adkazać u pieršuju čarhu joj.
— Viečaram paśla pracy ŭ Ihara zusim mała času, adkazać na listy, ja tak razumieju, jon moža tolki pa niadzielach, bo jon pracuje šeść dzion na tydzień, — adznačaje dziaŭčyna.
U maralnym płanie, pa słovach Darji, mužu značna praściej, čym u SIZA, dzie jon byŭ adzin na adzin z kamiennymi ścienami. U kałonii ŭ jaho chacia b jość mahčymaść nienadoŭha vychodzić na vulicu.
Darja ź nieciarpieńniem čakaje mahčymaści atrymać spatkańnie ź Iharam.
— Ja nie budu zahadvać, kali heta atrymajecca, ale vielmi spadziavajusia, što jano adbudziecca jak maha chutčej, — reziumuje jana.
Nahadajem, błohier znachodzicca ŭ PK-1 Navapołacka. Jon byŭ zatrymany ŭ siabie doma ŭ Baranavičach 25 červienia 2020 hoda, a 14 śniežnia 2021 hoda asudžany na 15 hadoŭ kałonii pa «spravie Cichanoŭskaha».
Ciapier čytajuć
Kala Safii ŭ Połacku pastavili pomnik lotčykam Ničyparčyku i Kukanienku. Ale navat nie samalot toj madeli, na jakoj jany zahinuli, a aerapłan stalinskaha času1818
Kamientary