Jak ukrainskaja hnutkaja stratehija pieramahaje zastarełuju rasijska-savieckuju madel na poli boju
The Wall Street Journal raskazvaje, jak kłasičnyja vajennyja apieracyi i sprytnaje pryniaćcie rašeńniaŭ ukraincami na poli boju, razam ź niekampietentnaściu ijerarchičnaha rasijskaha kamandavańnia, źmianiaje chod vajny.
Kamandavańnie va Ukrainie zaachvočvaje małodšych aficeraŭ da pryniaćcia imhniennych rašeńniaŭ na poli boju, jany apieratyŭna vykarystoŭvajuć mahčymaści i słabyja baki praciŭnika. Rasiejcaŭ, naadvarot, tarmozić struktura pryniaćcia rašeńniaŭ savieckaj epochi, u jakoj zahady pastupajuć pa łancuhu ad kamandavańnia z Maskvy, a vojski na pieradavoj prajaŭlajuć mała inicyjatyvy.
Za niekalki tydniaŭ Ukraina ačyściła ad rasijskich vojskaŭ tysiačy kvadratnych kiłamietraŭ u Charkaŭskaj vobłaści. Zaraz ukrainskija siły prasoŭvajucca na poŭdzień da akupavanaha Chiersona.
Zamiest taho, kab niepasredna ŭdzielničać u žorstkich artyleryjskich pierastrełkach i tankavych bajach, jakim addaje pieravahu Rasija, ukraincy imknucca akružyć rasijskija siły i pierakryć linii zabieśpiačeńnia. Ukraina efiektyŭna abjadnała abstalavańnie savieckaha času i zachodnija artyleryjskija i rakietnyja sistemy, kab pazbavić voraha paliva, bojeprypasaŭ i inšych materyjałaŭ.
Ukrainski nastup na ŭschodzie i poŭdni krainy vyhladaje častkaj skaardynavanaha płana. Vajennyja historyki kažuć, što razhrom rasijskich vojskaŭ na Charkaŭskim froncie z dapamohaj vysokamabilnych sił pieraklikajecca z kłasičnymi prykładami stratehii XX stahodździa.
Fransua Esbur, daradca pa abaronie paryžskaha Fondu stratehičnych daśledavańniaŭ, paraŭnaŭ apieracyju ź pierapravaj niamieckaha hienierała Chajnca Huderyjana cieraz raku Maas u Bielhii suprać francuzskich vojskaŭ u mai 1940 hoda. Hety krok dapamoh adkryć astatniuju častku Bielhii i paŭnočnuju Francyju da chutkaha nastupleńnia niamieckaj bronietechniki.
Jon taksama zhadaŭ niečakany krok izrailskaha hienierał-majora Aryela Šarona ŭ dačynieńni da Sueckaha kanała ŭ Vajnie Sudnaha dnia 1973 hodzie, jaki dapamoh Izrailu pieravieści vajnu ź Jehiptam i inšymi arabskimi dziaržavami na svaju karyść.
U toj čas jak ukrainskija siły chutka prasoŭvalisia ŭ Charkaŭ, Chiersonski front ruchaŭsia pavolna. Sutyknuŭšysia z bolš bujnymi i bolš efiektyŭnymi siłami, čym u Charkavie, ukrainskija vojski na praciahu niekalkich tydniaŭ źniasilvali rasijski supraciŭ, nanosiačy ŭdary pa składach zabieśpiačeńnia i maršrutach praz masty cieraz Dniepr, adrazajučy tysiačy rasijskich vajskoŭcaŭ u Chiersonie i vakolicach.
Zamacavaŭšy płacdarm na ŭschodnim bierazie raki Inhulec u žniŭni, ukrainskija vojski pačali ŭ hetym miesiacy naciskać na zachodni bierah Dniapra, pahražajučy ŭziać u abcuh rasijskija vojski i prymušajučy ich da adstupleńnia.
Mik Rajan, vajenny strateh i hienierał-major aŭstralijskaj armii ŭ adstaŭcy, acharaktaryzavaŭ ukrainskuju stratehiju jak «stratehiju karozii».
Pa słovach Rajana, Ukraina vykarystała «ŭskosny padychod», jaki ŭpieršyniu byŭ akreśleny brytanskim vajennym strateham XX stahodździa Beziłam Lidełam Chartam. Hetym padychodam Ukraina imkniecca źmianić bałans sił, «vysmoktvajučy siły praciŭnika, asłablajučy jaho ŭkołami zamiest ryzykoŭnych udaraŭ». Padychod abapirajecca na niečakanaść i sprytnyja ruchi.
«Rasiejcy žadajuć źniasileńnia, jany chočuć masavych sutyknieńniaŭ farmiravańniaŭ — voś u čym jany pryvykli mieć pieravahu, — skazaŭ Džon Śpiensier, kiraŭnik adździeła daśledavańniaŭ haradskoj vajny Medysanskaha palityčnaha foruma. — Ale ŭkraincy im hetaha nie dazvolać».
Sakratar Rady nacyjanalnaj biaśpieki i abarony Ukrainy Alaksiej Daniłaŭ zajaviŭ, što ŭviadzieńnie kamandna-administracyjnaj madeli na asnovie Paŭnočnaatłantyčnaha aljansu daje kankurentnuju pieravahu. «Małodšy kamandzir umieje prymać rašeńni ŭ zaležnaści ad situacyi i biare adkaznaść za siabie, za svaich sałdat i za terytoryju», — skazaŭ jon.
Kali ŭ kancy žniŭnia ukraincy z dapamohaj bieśpiłotnikaŭ i atradaŭ śpiecnaza prasoŭvalisia ŭ Charkaŭskaj vobłaści, jany byli ździŭlenyja tym, nakolki rassłablenymi vyhladali rasijskija sałdaty. U pryfrantavych vioskach byli tolki adzinki bronietechniki.
U rasijskich vajskoŭcaŭ časta nie było internetu abo sihnału sotavaj suviazi, a radyjosuviaź časta dasiahała ŭsiaho niekalkich kiłamietraŭ.
Rasijskija vojski vykapali niekalki tranšej vakoł pazicyj u Charkaŭskaj vobłaści, što dazvoliła ŭkrainskim vojskam chutka prasunucca ŭ bok akupavanych haradoŭ. U mnohich vypadkach prasoŭvańnie ŭkraincaŭ zapavolvali tolki miny, u tym liku tyja, jakija jany sami pastavili padčas adstupleńnia piać miesiacaŭ tamu.
Ukrainskija vajskoŭcy paźbiahali vuličnych bajoŭ u haradskich centrach, u tym liku ŭ haradach Bałakleja i Šaŭčenkava, zachoplivajučy vioski vakoł ich, a potym atačajučy rasiejcaŭ u nievialikija kišeni, prymušajučy ich adstupić. I ŭ adroźnieńnie ad rasiejcaŭ, Ukraina nie bambavała harady.
«U nas nie było pieravahi ŭ pavietry, u nas nie było pieravahi ŭ ahniavoj mocy, my prosta mieli adpaviednyja ŭmovy i skarystalisia mienšaj kancentracyjaj rasijskich vojskaŭ, niedachopam ich reziervaŭ i hieahrafijaj», — skazaŭ Mikoła Bielaskoŭ, navukovy supracoŭnik ukrainskaha Nacyjanalnaha instytutu stratehičnych daśledavańniaŭ.
Ciapier čytajuć
U sacsietkach Chlastova apublikavałasia videa, zapisanaje na vypadak jaho zatrymańnia. Sam śpiavak na Akreścina15
Kamientary
Było by prievoschodstvo v aviacii i tankach, to vybivali by sostav obučiennyj, vmiesto kotoroho prichodił by nieopytnyj. Eto vsie zatiahivajet vojnu k sožaleniju.