Łukašenka pahražaje novymi represijami: Vyleźli z-pad plintusa — reakcyja budzie žorstkaja
Siońnia na naradzie pa hramadska-palityčnym stanoviščy ŭ krainie Alaksandr Łukašenka čarhovy raz uźniaŭ temu tych, chto pakinuŭ krainu, ratujučysia ad masavych represij. Ën taksama vystupiŭ z čarhovymi pahrozami nasielnictvu krainy. Asablivuju pahrozu sabie jon bačyć u stvareńni «niezakonnych vajenizavanych farmavańniaŭ».
Jon skazaŭ, što daručyŭ Administracyi z udziełam hramadskaści prapracavać pytańnie taho, jak hetyja ludzi mohuć viarnucca, i prapanavać miechanizm jaho rašeńnia. Jaho słovy pryvodzić BiełTA.
«Kožny, chto staŭ na šlach vypraŭleńnia i choča zahładzić svaju vinu, pavinien mieć šaniec na razumieńnie i litaść. Heta tyčycca tolki tych, chto zasłuhoŭvaje hetaha prabačeńnia. Nu a chto śviadoma parušyŭ zakon, pastaviŭ pad pahrozu čałaviečyja žyćci, pry padtrymcy zachodnich śpiecsłužb praciahvaje destruktyŭnuju dziejnaść suprać našaj krainy, budzie adkazvać pierad zakonam.
Zakon my pryviali ŭ adpaviednaść i zrabili bolš strohim. Tym bolš, što asobnyja z tych, chto tudy pabiehli (jeści ž chočacca), zrabili bolš žorstkaj pazicyju i ciapier staŭku robiać na prymianieńnie siły i stvareńnie niezakonnych vajenizavanych farmavańniaŭ. U takim vypadku zvarotnaj darohi niama i nie budzie», — zajaviŭ Łukašenka.
Jon baicca, što niekatoryja «mohuć skarystacca krokami nasustrač, kab nanieści peŭnuju škodu».
«Niekatoryja stailisia. Chtości prytaiŭsia, chtości siabie prajaŭlaje — my vielmi žorstka pracujem.
Prajšoŭ 2020 hod. Kiepska, što ŭ nas tak składvajecca situacyja vakoł krainy. Asabliva z našaj Ukrainaj. Ale heta ž dla nas navuka. Dla ŭsich dziesiaci miljonaŭ i haściej, jakija ŭ nas tut byvajuć, heta navuka», — praciahnuŭ jon.
«Ja nie chaču, kab mnie ci vam kłanialisia za heta i nam dziakavali, ale ŭsim zrazumieła, u imia čaho i dziakujučy kamu vystajali.
I kali ŭžo paśla hetaha chtości vyłazić z-pad plintusa, jak prusak, i znoŭ pačynaje abo praciahvaje hetuju svaju brydkuju spravu, vajujučy … suprać ułady… Kali niechta, nie daj boh… Ale adkryta jany ciapier niekatoryja pabojvajucca», — dadaŭ Łukašenka.
I zajaviŭ, što nikoli nie dapuścić paŭtareńnia 2020 hoda.
Vyrašać, kamu možna viarnucca, a kamu nie, budzie śpiecyjalnaja kamisija na čale z hienprakuroram.
«Pryniataje pryncypovaje rašeńnie: budzie stvoranaja mižviedamasnaja kamisija, jakuju ŭznačalić hienieralny prakuror. U skład hetaj kamisii buduć uklučanyja pradstaŭniki hramadskaści, deputackaha korpusa, słužbovyja asoby dziaržaŭnych orhanaŭ.
Tyja, chto znachodzicca za miažoj, žadaje viarnucca na radzimu, ale čahości baicca, buduć mieć mahčymaść źviarnucca (infarmacyja budzie raźmieščanaja va ŭsich srodkach masavaj infarmacyi) u kamisiju i atrymać adpaviednyja tłumačeńni — ab mahčymaści viarnucca, ab najaŭnaści abo adsutnaści niejkich pretenzij z boku dziaržaŭnych orhanaŭ da hetaj kankretnaj asoby», — skazaŭ hienieralny prakuror Andrej Švied pa vynikach narady ŭ Łukašenki.
Prapahandystka ANT Natalla Stelmach źmianiła imia na Naci Ryšna i zarablaje ŭ Mieksicy na šamanach i narkatyčnych hrybach50
Kamientary