U Minsku prajšoŭ mižnarodny fiestyval «Vialikaje Kniastva Paezii».
U Minsku prajšoŭ mižnarodny fiestyval «Vialikaje Kniastva Paezii». 23 kastryčnika amatary vieršavanaha słova sabralisia ŭ Akademii mastactvaŭ, kab pasłuchać paeziju na čatyroch jeŭrapiejskich movach. Biełarusy sustrakali haściej ź Litvy, Polščy i Ukrainy.
Usprymać u jakaści fiestyvalu bieśpierapynnaje čytańnie vieršaŭ ciažka. Ale było b horš, kab toje rabili tolki čaćviora aŭtaraŭ. A tak ich sabrałasia ažno vasiemnaccać. Času, praŭda, brakavała. Dźvie hadziny padzialili na ŭsich. Heta, kaniešnie, vyprabavańnie dla paetaŭ. Asabliva polskich i ŭkrainskich. Jechać stolki hadzin, kab vystupić z paraj-trojkaj vieršaŭ. Zatoje atrymałasia svojeasablivaja chvilina słavy na biełaruskaj scenie.
Ale hałoŭnaje nie kolkaść, a jakaść. Kali ŭ słuchačoŭ i prysutničała stomlenaść na tvarach, to abyjakavaści nie było. Navat aŭtary niemaładyja zmahli vyklikać intares da svajoj paezii ŭ moładzi.
Paety čytali vieršy pa čarzie ź pierakładčykami pad muzyku ad Siarhieja Puksta. Viadoŭcami fiestyvalu byli Andrej Chadanovič i Maryjka Martysievič. Jany byli i adzinymi, chto pramaŭlaŭ sa sceny nie tolki vieršami.
Kamiernaść, u jakoj prachodziła impreza, parušyŭ Viktar Žybul. Ścipły daśledčyk litaratury ŭ paŭsiadzionnym žyćci na scenie pieratvarajecca ŭ vydatnaha słemiera.
Vystup Žybula zadaŭ temp i astatnim paetam.
Svabodnych miescaŭ u zale Akademii mastactvaŭ chapała. Raniej na imprezy z udziełam Andreja Chadanoviča raźličanaja na paŭtysiačy miescaŭ zała była poŭnaju. Paet hublaje papularnaść? Naŭrad ci. Vinoj tamu stała paralelnaja paetyčna-madeljerskaja viečaryna ŭ Biblijatecy Ciotki, što sabrała 60 čałaviek, a pieradusim «Rok pa vakacyjach», što prachodziŭ u toj samy viečar u «Reaktary» z udziełam «Lapisa Trubiackoha». Chadanoviča časta možna sustreć i na minskich vulicach. A voś Michałka ŭ Biełarusi ŭbačyš kudy radziej.
Raduje, što ŭ našaj krainie jość maładyja pierakładčyki. Kali raniej nivodnaja prezientacyja pierakładaŭ nie abychodziłasia biez udziełu Lavona Barščeŭskaha, to zaraz jon byŭ prostym słuchačom u zale. Heta nadaje aptymizmu, što padobnyja fiestyvali ŭ Biełarusi buduć prachodzić i nadalej. Bo mienavita maładość źjaŭlajecca ruchavikom usich pačynańniaŭ.
Udzieł u fiestyvali «Vialikaje Kniastva Paezii» uziali paety ź Litvy Uładas Braziunas, Vitas Dekšnis, Antanas A. Joninas, Danatas Piatrošus, Alvidas Šlapikas, z Polščy — Jacak Hutaraŭ, Bohdan Zadura, Lešak Enhielkinh, z Ukrainy — Dmytro Łazutkin, Marjana Saŭka, Astap Ślivinski. Biełaruski bok pradstaŭlali Andrej Chadanovič, Maryjka Martysievič, Viktar Žybul, Viera Burłak, Siarhiej Pryłucki, Vital Ryžkoŭ, Uładzimir Arłoŭ.
Ciapier čytajuć
Pahladzieli film «Piaščotna da siabie», źniaty pa dzika papularnaj biełaruskaj knizie — pra zaciukanuju žančynu, jakuju chočuć zrabić dla ŭsich zručnaj33
Kamientary