Hatel na Majakoŭskaha, były Dom druku. Jaki los čakaje viadomyja staličnyja daŭhabudy
U hetym hodzie pačnuć abnaŭlać niekatoryja bujnyja abjekty niezavieršanaha budaŭnictva. Mnohija ź ich znachodzilisia ŭ śpisie daŭhabudaŭ. Što ź imi budzie dalej, vyśvietlili «Minsk-Naviny».
«Mahnit Minska»
Na skryžavańni praśpiekta Niezaležnaści i vulicy Kiryły Turaŭskaha jašče ŭ 2010-m płanavali pabudavać šmatfunkcyjanalny kompleks «Mahnit Minska». Prava asvojvać učastak stalicy atrymała daččynaje pradpryjemstva iranskaj kampanii. Pieršapačatkova zapłanavali ŭźvieści budynak, jaki pa formie nahadvaje pieraviernutuju padkovu. U im płanavali raźmiaścić biznes-centr i apart-hatel. Dva vyšynnyja kryły zbudavańnia pavinna była abjadnoŭvać čatyrochpaviarchovaja častka, pryznačanaja dla adpačynku i zabaŭ, — ź ladovym katkom, dziciačym centram, kinateatram, restaranami i kramami. Zdać kompleks u ekspłuatacyju pa dakumientacyi mieli namier u 2013 hodzie. Adnak terminy nie raz padaŭžalisia, abjekt doŭhi čas byŭ zakansiervavany. Zaviaršyć pracy ŭ zakazčyka nie atrymałasia.
Ciapier budynak vyrašana dabudavać za košt biudžetnych srodkaŭ. Pa novaj kancepcyi ŭ im budzie padziemny ŭzrovień z parkovačnymi miescami i abjektami absłuhoŭvańnia, a vyšej — Biełaruski handlovy dom. Kožnaja vobłaść krainy zmoža pradstavić tut pradukcyju svaich pradpryjemstvaŭ. U vyšynnych kryłach budynka raźmieścicca arendnaje žyllo.
— Budtrest №4 užo vyjšaŭ na placoŭku, idzie častkovy demantaž, — padzialiłasia staršynia kamiteta budaŭnictva i inviestycyj Minharvykankama Iryna Hontarava. — Z fasada zdymuć vitražy, pakolki zaviaršyć azdableńnie ŭ raniejšym vyhladzie niemahčyma. Abličča budynka niekalki źmienicca, zamiest sucelnaha škleńnia źjaviacca ścieny i zvyčajnyja vokny ŭ žyłoj častki. Namiačajecca paralelnaje prajektavańnie i budaŭnictva, pakolki Łukašenka pastaviŭ zadaču adkryć handlovy centr da kanca 2023-ha. Adpaviedna, u hety termin pavinien być zavieršany ŭvieś kompleks.
Hatel na Majakoŭskaha
U 2013-m na vulicy Majakoŭskaha pačali budavać šmatfunkcyjanalny hramadska-handlova-haściničny kompleks Novotel Minsk Mayakovskaya. Tut płanavali ŭźvieści haścinicu francuzskaha apieratara, biznes-centr, adkryć handlovyja, fizkulturna-azdaraŭlenčyja i inšyja ŭstanovy. Paźniej zabudoŭščyk — kampanija «Łada OMS — Inženierynh» — paviedamiŭ ab namiery raźmiaścić u kompleksie miedcentr. Adnak raboty spynilisia na pačatkovym etapie. U 2020 hodzie źmianiŭsia ŭłaśnik abjekta, ale i jamu nie ŭdałosia zaviaršyć prajekt.
Ciapier hetym zojmiecca UKB Savieckaha rajona.
— Idzie abśledavańnie budaŭničych kanstrukcyj, paśla čaho «Minskprajekt» padrychtuje prajektna-kaštarysnuju dakumientacyju. Sioleta vyjdziem na placoŭku i ŭ 2024-m uviadziom budynak u ekspłuatacyju. U im raźmieścicca dziaržaŭnaja ŭstanova achovy zdaroŭja, — prakamientavała Iryna Hontarava.
Dom druku
Korpus, jaki raniej naležaŭ Domu druku i dzie kaliści znachodzilisia redakcyi haziet, u 2020 hodzie nabyła na aŭkcyjonie kampanija «Pryvatkapitał». Pa ŭmovach prodažu zachoŭvałasia funkcyjanalnaje pryznačeńnie abjekta — administracyjna-dziełavoje.
Pakupnik infarmavaŭ, što płanuje adkryć na hetym miescy biznes-centr. Pakolki budynak — pomnik architektury, jaho źniešni vyhlad mianiać nielha, nadbudovy i pierabudovy taksama nie dazvolenyja. Inviestar pavinien byŭ na praciahu dvuch hadoŭ raspracavać i zaćvierdzić prajektnuju dakumientacyju na rekanstrukcyju. Praz dva hady źjaviłasia infarmacyja, što nieruchomaść u inviestara zabrali, budynak znoŭ apynuŭsia ŭ kamunalnaj ułasnaści. Jaho viernuć da žyćcia za košt biudžetu, zakazčykam vyznačany UKB Savieckaha rajona. Vyrašana, što paśla abnaŭleńnia ŭ korpus pierajeduć Kamitetu pa achovie zdaroŭja i Kamitetu pa pracy i sacyjalnaj abaronie Minharvykankama. Budaŭničyja raboty płanujecca pačać u vieraśni, ciapier zaviaršajecca raspracoŭka prajektna-kaštarysnaj dakumientacyi.
Prybudova na Alibiehava
Niedaloka ad skryžavańnia z praśpiektam Haziety «Źviazda» jość daŭni niezavieršany abjekt. Heta prybudova da doma na vulicy Alibiehava, 15, u jakim raźmiaščajucca krama «Pinskdreŭ», fitnes-centr i inšyja absłuhoŭvajučyja ŭstanovy. U novaj častcy płanavaŭsia jašče adzin administracyjna-handlovy abjekt, ale zakazčyk nie zmoh zdać jaho ŭ ekspłuatacyju. Ciapier tut raźmieściać arendny dom. Idzie abśledavańnie kanstrukcyj.
Korpus na vulicy Karvata
Na placoŭcy, dobra bačnaj z MKAD, raźmiaščajecca jašče adzin daŭhabud — niezavieršany korpus na terytoryi, jakuju raniej zajmaŭ Respublikanski atrad śpiecyjalnaha pryznačeńnia MNS. U abjekta ciapier novy zakazčyk — pradpryjemstva «Miedyk». Raspracoŭvajecca prajekt, u 2023 hodzie płanujuć vyjści na budoŭlu. Na vulicy Karvata ŭźviaduć adziny kompleks Minskaha haradskoha kliničnaha narkałahičnaha centra. Pakul hetaha padraździaleńni ŭstanovy (stacyjanar, ambułatorna-palikliničnaja słužba, adździaleńnie dzionnaha znachodžańnia i reabilitacyi, słužba pa vydačy daviedak) bazujucca pa roznych adrasach.
Korpus MAZa
Znajści hety niezavieršany budynak na Partyzanskim praśpiekcie, 154-a, praściej z vulicy Mašynabudaŭnikoŭ, adkul jon dobra prahladajecca. Pačynali jaho ŭzvodzić jak korpus administracyjna-bytavych i dapamožnych pamiaškańniaŭ Minskaha aŭtamabilnaha zavoda. Tut nie viaducca raboty z 2008 hoda, a paźniej daŭhabud pieradali z respublikanskaj u kamunalnuju ŭłasnaść. Viadomy i jaho dalejšy los: korpus pieraprafilujuć pad haradski archiŭ. Zakazčykam vystupaje «Minskaja spadčyna»
Zamiest «Sučaśnika»
Kaliści na vulicy Charkaŭskaj, 70, raźmiaščaŭsia kinateatr «Sučaśnik», jaki začyniŭsia ŭ 2002 hodzie z-za niezapatrabavanaści. Paźniej abmiarkoŭvałasia ideja pieraŭtvareńnia abjekta ŭ Pałac kultury, ale na heta patrabavalisia niemałyja srodki. U 2011-m budynkam zacikaviŭsia turecki inviestar, jaki vyrašyŭ stvaryć na hetym miescy kulturna-zabaŭlalny centr z haścinicaj, kinazałaj, dyskakłubam, spartyŭnym centram. Byŭ zaklučany inviestycyjny dahavor, i ŭ 2013 hodzie zakazčyk pačaŭ ažyćciaŭlać prajekt. Na pracy vydzielili kala dvuch hadoŭ, adnak budoŭla prypyniłasia, a ŭ 2016-m jaje i zusim zakansiervavali. Z tych časoŭ situacyja na placoŭcy nie źmianiłasia.
— Abjekt kanfiskavany ŭ byłoha zakazčyka, kampanii «Minsk Prynces Hatel», — paviedamiła Iryna Hontarava. — UKB Zavodskaha rajona zojmiecca znosam, i sioleta placoŭku vyzvalać i akulturać. Inšaje budaŭnictva tut pakul nie płanujecca.
Chto taja žančyna, jakuju Marzaluk u efiry BT abazvaŭ «švallu z Hrodna», i što jana piša ŭ čatach? Raskazvajem pra doktarku Stefanovič24
Kamientary