Zdareńnie na vajskovym aeradromie ŭ Mačuliščach stała hałoŭnaj padziejaj apošnich dzion. Adziny aficyjny kamientar dyviersii byŭ z vusnaŭ MZS. «Čarhovy fejk», — zajaviŭ namieśnik kiraŭnika viedamstva Juryj Ambrazievič. Čamu režym Łukašenki maŭčyć? Jakija nastupstvy moža paciahnuć za saboj hety incydent? «Naša Niva» abmierkavała heta z historykam, palityčnym ahladalnikam Alaksandram Frydmanam i palitołaham Valeryjem Karbalevičam.
«Hałoŭny mesedž Łukašenku: jon kantraluje situacyju ŭ Biełarusi kudy horš, čym žadaje»
Alaksandr Frydman ličyć, što sam fakt taho, što paviedamleńnie pra incydent u Mačuliščach uklučyli ŭ svaje spravazdačy i Ministerstva abarony Vialikabrytanii, i amierykanski Instytut vyvučeńnia vajny, što pra heta piša zachodniaja presa, śviedčyć pra toje, što niešta ŭsio-taki adbyłosia.
A ŭ maŭčańni biełaruskich uład jość svaja łohika. «Kali ŭsie viersii dla ciabie drennyja, dyk lepš maŭčać. Takoje praciahłaje maŭčańnie pakazvaje, što niešta niepryjemnaje adbyłosia», — zaŭvažaje ahladalnik.
«Kali aceńvać incydent jak častku prapahandysckaj vajny, to hety akt za biełaruskimi demakratyčnymi siłami. U ich atrymałasia prapanavać svaju viersiju, jakaja na hety momant zastajecca adzinaj, bo ŭkrainski bok na siabie adkaznaść nie biare i vidavočna nie voźmie, — dadaje jon. — Demakratyčnyja siły padvysili svaju vahu, jany pakazali, što zdolnyja prapanavać Ukrainie nie tolki maralnuju padtrymku, ale i kankretnyja dziejańni».
Čym režym Łukašenki moža adkazać?
«Kali my ŭjavim, što dyviersiju ździejśnili ŭkraincy, to heta možna razhladać jak peŭny mesedž Łukašenku: ty nam pahražaješ, a my zrabili heta na tvajoj terytoryi, ty nam źbiraŭsia «žestačajše adkazać», a adkazvać niama čym — vajny jon nie žadaje. Jahonyja pahrozy — tolki vierbalnaja ekvilibrystyka. Chiba pojdzie vojskam va Ukrainu? Dyk heta samahubstva. Adkažu ŭkraincam tym, što sam siabie zabju? Duraść. Pryznać, što jon na 100 pracentaŭ nie kantraluje situacyju ŭ Biełarusi?
Kali ŭjavić, što za zdareńniem stajać biełaruskija partyzany, to situacyja dla Łukašenki jašče horšaja: treba pryznać, što ŭ krainie dziejničajuć ludzi, jakija zdolnyja atakavać vajskovy aeradrom. Iznoŭ-taki heta pryznańnie, što ty situacyju nie kantraluješ, a tvaje ŭłasnyja śpiecsłužby nie pracujuć.
Pakul narmalnaha pracoŭnaha vychadu niama, to jon vymušany maŭčać».
Hety kiejs pahražaje bolš aktyŭnym uciahvańniem Biełarusi ŭ vajnu, ličyć Frydman.
Dyviersija ŭ Mačuliščach moža źmianić i adnosiny da Cichanoŭskaj i jaje atačeńnia. Ale hałoŭny mesedž, jaki Łukašenka atrymaŭ: jon kantraluje situacyju ŭ Biełarusi kudy horš, čym žadaje.
«Jość viersija, što pierad vizitam u Kitaj Łukašenku pakazali realnuju situacyju ŭ Biełarusi, ci moža, heta akcyja pieraśledavała metu sarvać jaho pajezdku ŭ Kitaj. Nie biarusia hadać. Dla Łukašenki heta nadzvyčaj važnaja pajezdka, nie viedaju, što pavinna było b adbycca ŭ Biełarusi, kab jon nie pajechaŭ.
Darečy, zachodniaja presa źviazvaje i pajezdku ŭ Kitaj, i zdareńnie ŭ Mačuliščach. Ale tut iduć absalutna roznyja acenki kitajskaha vizitu, časta — pamyłkovyja, z majho punktu hledžańnia: kali Łukašenku pakazvajuć tolki ŭ roli vasała, jaki nakiroŭvajecca ŭ Kitaj, kab pravieści pieramovy ad imia Pucina, to heta vyhladaje dosyć śmiešna. Kali b Rasija žadała pravieści pieramovy z Kitajem, to Łukašenka, napeŭna, apošni čałaviek, jakoha nakiravali b na pieramovy. Heta dla jaho asabisty prajekt i jamu vielmi važna zaručycca kitajskaj padtrymkaj. Tamu i vyrašyli spačatku pravieści vizit u Kitaj, a tam užo niejkim čynam reahavać na Mačuliščy», — ličyć Alaksandr Frydman.
«Hety incydent nie vyrašaje los vajny, ale heta mocny simvaličny krok», — dadaje ahladalnik.
«Režym moža adkazać uzmacnieńniem palityčnych represij»
Valeryj Karbalevič adznačaje: incydent u Mačuliščach razburaje ŭvieś ideałahičny kancept astraŭka stabilnaści i spakoju.
«Uładam ciažka pryznać, što vajna pryjšła ŭ biełaruski dom. Prosta ŭ sercy krainy, za 20 kiłamietraŭ ad stalicy ździejśnieny napad na vajskovy aeradrom. Na fonie pastajannaj militarysckaj lichamanki: ceły hod vialisia mabilizacyjnyja mierapryjemstvy. Ceły hod na terytoryi krainy pravodzili raznastajnyja vajskovyja vučeńni. I što ŭ suchim vyniku? Vorah pranik u samaje serca krainy.
A dzie znakamitaja supraćpavietranaja abarona, jakaja, darečy, sumiesnaja, biełaruska-rasijskaja? Surjoznyja pytańni mohuć uźniknuć u rasijskaha boku, jakomu abiacanyja nadziejnyja tyły».
Režym Łukašenki moža adkazać na padziei ŭ Mačuliščach uzmacnieńniem palityčnych represij, ličyć palitołah.
«Heta ŭžo adbyvajecca. Zatrymlivajuć ludziej u nasielenych punktach niepadalok ad Mačuliščaŭ, siłaviki pačali palavać na kamientataraŭ u sacsietkach. Incydent, naturalna, pryviadzie da ŭzmacnieńnia militarysckaj lichamanki».
«Dasiul vajna nie zakranała krainu niepasredna, — miarkuje Karbalevič. — Kaniečnie, byli incydenty na biełaruska-ŭkrainskaj miažy, askołki rakiety padali na biełaruskaj terytoryi, štości zdaryłasia na aeradromie ŭ Ziabraŭcy, ale ŭsio možna było śpisać na vypadkovaść. A tut napad na vajskovy aeradrom — heta śviedčańnie taho, što vajna pryjšła ŭ Biełaruś. A kali napady praciahnucca? Vielmi surjozny pavarot jak minimum dla biełaruskaj ułady».
«Naša Niva» — bastyjon biełaruščyny
PADTRYMAĆ«Žestačajšaj dyscypliny!» Łukašenka adčytaŭ kiraŭnictva siłavoha błoku. Chrenin siadzieŭ jak myła źjeŭšy
Rasijski samalot A-50 u Mačuliščach moža być surjozna paškodžany — pra heta śviedčyć adna detal
U Kramli admovilisia kamientavać ataku na rasijski samalot u Biełarusi
«Samym składanym była evakuacyja». Azaraŭ pra padrabiaznaści padryvu rasijskaha samalota ŭ Mačuliščach
Krasamoŭna. Što łukašenkaŭskija kanały napisali pra vybuchi ŭ Mačuliščach
-
HUBAZiK pierastaŭ vykładać videa z zatrymanymi. Z dnia, kali da hetaha zaklikaŭ kanał, blizki da Markava
-
Kali Ukraina zachavaje suvierenitet uzamien za niejtralnaść, što heta budzie značyć dla Biełarusi?
-
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?
Kamientary