Na paryžskim refierendumie prahałasavali za zabaronu ŭ horadzie arendy elektrasamakataŭ. Voś čamu
Być ci nie być u francuzskaj stalicy prakatu elektrasamakataŭ, vyrašali na miascovym refierendumie. Amal 90% hałasoŭ było addadziena za ŭviadzieńnie zabarony, choć kampanii-apieratary źviartajuć uvahu na nizkuju jaŭku.
Jak paviedamlajecca, mer Paryža An Idalho zajaviła, što ŭ horadzie budzie ŭviedzienaja zabarona na prakat elektrasamakataŭ — takoje rašeńnie pryniataje pa vynikach kansultatyŭnaha refierendumu, jaki prajšoŭ 2 krasavika.
Za ŭviadzieńnie abmiežavańniaŭ było addadziena 89% hałasoŭ.
Praŭda, šerynhavyja kampanii źviarnuli ŭvahu na nizkuju jaŭku: u refierendumie ŭziali ŭdzieł tolki krychu bolš za 100 tys. čałaviek z 2,2 młn žycharoŭ francuzskaj stalicy.
Pavodle zajavy paryžskaha mera, arenda elektrasamakataŭ pavinna źniknuć z horada z 1 vieraśnia — mienavita tady minaje termin dziejańnia ŭžo zaklučanych z apieratarami kantraktaŭ.
Akramia taho, u Paryžy ŭviaduć abmiežavańni i dla ŭładalnikaŭ padobnaha transpartu: im dazvolać pierasoŭvacca na elektrasamakacie z chutkaściu nie bolš za 20 kiłamietraŭ na hadzinu, a taksama pakidać transpart vyklučna na śpiecyjalnych parkoŭkach.
Kampanii, jakija zdajuć elektrasamakaty ŭ karotkaterminovuju arendu praz mabilnyja prahramy, užo zajavili, što rasčaravanyja pryniatym rašeńniem, ale spadziavajucca na admovu haradskich uładaŭ ad idei poŭnaj zabarony. Zamiest hetaha jany prapanujuć raspracavać novuju narmatyŭna-pravavuju bazu dla svajoj dziejnaści.
Dla elektrasamakataŭ u Paryžy ŭžo dziejničajuć niekatoryja zabarony. Da prykładu, nielha pierasoŭvacca pa chodnikach, a taksama vykarystoŭvać telefon ci navušniki padčas pajezdki — parušalnikam mohuć vypisać štraf u pamiery da 1,5 tys. jeŭra.
Prychilniki abmiežavalnych mier śćviardžajuć, što elektrasamakaty stvarajuć niebiaśpiečnyja situacyi jak dla piešachodaŭ, tak i dla aŭtamabilistaŭ. Tak, u 2022 hodzie ŭ Paryžy adbyłosia 459 avaryj z udziełam hetaha vidu transpartu, u vyniku ich zahinuli try čałavieki.
Kamientary